ភ្នំពេញ៖ របាយការណ៍ស្រាវជ្រាវរបស់ក្រុមហ៊ុនជំនាញក្នុងវិស័យអចលនទ្រព្យមួយ បានបង្ហាញថា នៅរាជធានីភ្នំពេញ ចំនួនផ្ទះជាប់ដី (ផ្ទះល្វែង ផ្ទះវីឡា មិនរាប់ខុនដូ) បានកើនលើស ១៨៦ ៣០៩ ខ្នងគិតត្រឹមដំណាច់ឆ្នាំ ២០២០ ដោយបានកើនពីចំនួន ១៥៤ ១០០ ខ្នង កាលពីដំណាច់ឆ្នាំ២០១៨។
ទិន្នន័យរបស់ក្រុមហ៊ុន Z1 Data Co., LTD (Cambodia) បានបង្ហាញថា ការផ្គត់ផ្គង់លំនៅឋាននៅទូទាំងរាជធានីភ្នំពេញ នារយៈពេលពីរឆ្នាំចុងក្រោយនេះ កើនឡើង ២១ភាគរយ។ ទិន្នន័យដដែលនេះបានបន្ថែមថា ចំនួនលំនៅឋានផ្គត់ផ្គង់ជាង១៨ម៉ឺនខ្នង (យូនីត) បានសម្រេចការលក់ សរុប ១៥៧ ៨៤៣ យូនីត ឬស្មើនឹង៨៤ភាគរយ នៃការផ្គត់ផ្គង់សរុប។
បើតាមរបាយការណ៍ដ៏ដែលនេះ បានបង្ហាញថា ក្នុងចំណោមខ័ណ្ឌទាំងអស់នៅរាជធានីភ្នំពេញ មានតែខ័ណ្ឌពីរប៉ុណ្ណោះ ដែលមានការផ្គត់ផ្គង់ចំនួនលំនៅលេចធ្លោជាងគេ គឹខ័ណ្ឌពោធិ៍សែនជ័យ និងខ័ណ្ឌដង្កោ។ បើបូកបញ្ចូលគ្នា ខ័ណ្ឌទាំងពីរនេះមានរហូតដល់ទៅ ៨៣ ៩០៣ យូនីត ឬស្មើនឹង ៤៥ ភាគរយ នៃចំនួនផ្គត់ផ្គង់លំនៅឋានសរុប។
បើយោងតាមរបាយការណ៍ត្រីមាសទី៣ របស់ការិយាល័យឥណទានកម្ពុជា CBC បានឱ្យដឹងថា កំណើនតម្រូវការនេះ ហាក់ឆ្លើយតបទៅនឹងកំណើនកម្ចីទិញផ្ទះ ដែលផ្តល់ឲ្យដោយគ្រឹះស្ថានធនាគារ និងហិរញ្ញវត្ថុនៅកម្ពុជា ដោយបានកើនដល់ជាង ៤,៦ ពាន់លានដុល្លារ គិតត្រឹមដំណាច់ខែកញ្ញា ឆ្នាំ២០២០ និងកើនឡើង គួរឲ្យកត់សម្គាល់ ពីត្រឹម ៣,៩ ពាន់លានដុល្លារ កាលពីដំណាច់ឆ្នាំ២០១៩។
បើយោងតាមរបាយការណ៍របស់ក្រុមហ៊ុនវាយតម្លៃអចលនទ្រព្យ V-Trust Appraisal បានឱ្យដឹងថា ចំនួនផ្ទះសង់ថ្មីនៅតាមបុរីធំៗ នៅភ្នំពេញ នឹងកើនឡើងបីដងនៅឆ្នាំ ២០៣០ ខាងមុខ ដែលកើនពីចំនួនបច្ចុប្បន្ន ដោយសារកំណើនចំនួនប្រជាជននៅទីក្រុង និងកំណើនលទ្ធភាពទិញដោយមានការបង់រំលស់។
របាយការណ៍ V-Trust Appraisal ដែលព្យាករណ៍ពីទីផ្សារអចលនទ្រព្យនៅកម្ពុជា សម្រាប់ ១០ ឆ្នាំទៀតមានចំណងជើងថា «ភ្នំពេញឆ្នាំ ២០៣០» បានឲ្យដឹងថា ការផ្គត់ផ្គង់ផ្ទះនៅតាមបុរី បានបន្តកើនឡើងជាមធ្យម ៩ ភាគរយ ក្នុងមួយឆ្នាំ ដែលស្មើរនឹងចំនួនផ្ទះ ២៥ ០០០ ខ្នងក្នុងមួយឆ្នាំ។ តាមរយៈអត្រាកំណើននេះ នៅឆ្នាំ ២០៣០ ចំនួនផ្ទះនៅតាមបុរីនៅភ្នំពេញ នឹងកើនដល់ ៤៥ ម៉ឺនខ្នងផ្ទះ៕
រក្សាសិទ្ធិដោយ៖CEN
