ភ្នំពេញ៖ ស្ថានឯកអគ្គរាជទូតកម្ពុជា ប្រចាំប្រទេសជប៉ុន នៅថ្ងៃទី៩ខែមករា ឆ្នាំ២០២០នេះ បានចេញសេចក្តីជូនដំណឹង មួយដោយបានសរសេរពណ៌ក្រហម (ការបន្ទាន់)ពាក់ព័ន្ធនឹងការដាក់ចេញវិធានការព្រំដែនថ្មី របស់រដ្ឋាភិបាលជប៉ុន ពាក់ព័ន្ធនឹងកម្ពុជា។
ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន សូមជម្រាបជូនសាធារណជន មេត្តាជ្រាបថា បន្ទាប់ពីបានប្រកាសដាក់ទីក្រុងតូក្យូ ខេត្ត Kanagawa, Saitama, និង Chiba ក្នុងភាពអាសន្នជាលើកទីពីរ នៅថ្ងៃទី៧ ខែមករា ហើយបានចូលជាធរមាននៅថ្ងៃទី៨ ខែមករា រដ្ឋាភិបាលជប៉ុន នៅយប់ថ្ងៃទី៨ ខែមករា បានចេញវិធានការព្រំដែនថ្មី ពាក់ព័ន្ធនឹងកម្ពុជា មានដូចខាងក្រោម៖
១. ប្រជាពលរដ្ឋខ្មែរដែលចូលជប៉ុនតាមរយៈ “ច្រកចូលសម្រាប់ការស្នាក់នៅ (Residence Track) ធានាដោយក្រុមហ៊ុនឬអង្គភាពនានា ត្រូវមានលិខិតបញ្ជាក់អវិជ្ជមានកូវីដ១៩ ក្នុងរង្វង់៧២ ម៉ោងមុនចេញដំណើរ ហើយត្រូវធ្វើតេស្តម្ដងទៀតពេលមកដល់ជប៉ុន ។ ក្រុមហ៊ុនឬអង្គភាពធានា ត្រូវបំពេញ “កិច្ចសន្យា” ថាត្រូវអនុវត្តវិធានការទាំងនេះ ។ ចំណាយលើការធ្វើតេស្តរកកូវីដ១៩ ពេលមកដល់ជប៉ុន ជាបន្ទុករបស់រដ្ឋាភិបាលជប៉ុន ។
២. ប្រជាពលរដ្ឋខ្មែរដែលមានសិទ្ធិស្នាក់នៅ ត្រូវមានលិខិតបញ្ជាក់អវិជ្ជមានកូវីដ១៩ ក្នុងរង្វង់៧២ម៉ោង មុនចេញដំណើរ ហើយត្រូវធ្វើតេស្តម្ដងទៀតពេលមកដល់ជប៉ុន ។ ក្នុងករណីមិនមានលិខិតបញ្ជាក់ អវិជ្ជមានកូវីដ១៩នេះទេ អ្នកដំណើរត្រូវស្នាក់នៅទីតាំងកំណត់ដោយប្រធានស្ថានីយ៍ចត្តាឡីស័កជប៉ុន ។ អ្នកដំណើរត្រូវធ្វើតេស្តម្ដងទៀតនៅថ្ងៃទី៣ ។ បើអវិជ្ជមាន ត្រូវទៅធ្វើចត្តាឡីស័កដោយខ្លួនឯងនៅផ្ទះបន្ថែម ឲ្យគ្រប់១៤ថ្ងៃ ហើយត្រូវទាញយកកម្មវិធីទូរស័ព្ទ “Covid-19 Contact-Confirming Application- COCOA។ ដើម្បីតាមដានការបំលាស់ទីរបស់អ្នកដំណើរ ។
៣. វិធានការខាងលើត្រូវអនុវត្តតាមកាលបរិច្ឆេទដូចខាងក្រោម ៖ ធ្វើតេស្តសម្រាប់អ្នកដំណើរទាំងអស់ ដែលមកដល់ជប៉ុន ពីម៉ោង ០០:០០ ថ្ងៃទី៩ ខែមករា ឆ្នាំ ២០២១ ។ ត្រូវមានលិខិតបញ្ជាក់អវិជ្ជមានកូវីដ១៩ ក្នុងរង្វង់៧២ម៉ោង មុនចេញដំណើរ សម្រាប់អ្នកដំណើរ ដែលមកដល់ជប៉ុនពីម៉ោង ០០:០០ ថ្ងៃទី១៣ ខែមករា ឆ្នាំ២០២១ ។ វិធានការទាំងនេះ នឹងត្រូវអនុវត្តរហូតដល់មានការលើកលែងស្ថានភាពអាសន្ន (តាមគម្រោងការប្រកាសភាពអាសន្ន នៅត្រូវលើកលែងនៅថ្ងៃទី៧ ខែកុម្ភៈ ឆ្នាំ២០២១)។ ក្នុងករណីបងប្អូន ចង់ប្រឹក្សាយោបល់ សូមទាក់ទង មកហ្វេសប៊ុកស្ថានទូត Royal Embassy of Cambodia in Japan៕រក្សាសិទ្ធិដោយ៖បញ្ញាស័ក្តិ