ភ្នំពេញៈ សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច ដែលកំពុងតែសម្រាកព្យាបាលព្រះរាជសុខភាពនៅប្រទេសបារាំង អស់រយៈពេលជាច្រើនខែ គឺមកដល់ពេលនេះ ព្រះអង្គមានព្រះរាជសុខភាពល្អប្រសើរជាងមុនច្រើន ពោលគឺព្រះអង្គអាចងើបឈរ ដើរបាន និងមានបន្ទូលបាន ដោយមិនដូចពីពេលមុនគង់នៅលើរទេះរុញ។
បើតាមលោក អ៊ា ឃីម៉េង ឧបការីសម្តេចក្រុមព្រះ នរោត្តម រណឫទ្ធិ បានឲ្យដឹងថា ចំពោះព្រះរាជសុខភាពរបស់សម្តេចក្រុមព្រះ មកដល់ពេលនេះ មានការធូរស្បើយច្រើនហើយ។
ចំពោះគម្រោងនៃការយាងមកកម្ពុជាវិញនៅមិនទាន់ច្បាស់នៅឡើយទេ ដោយសារក្នុងស្ថានភាពនេះ (កូវីដនៅបារាំង) គឺព្រះអង្គពិបាកនឹងយាងមកកម្ពុជាវិញ។ តែទោះជាយ៉ាងម៉េចក៏ដោយព្រះអង្គលោកត្រូវតែយាងមកកម្ពុជាវិញ ដើម្បីការងារដឹកនាំគណបក្សហ្វ៊ុនស៊ិនប៉ិច ពីព្រោះបើអត់មានព្រះអង្គយាងមកទេ រាល់កិច្ចការនៅក្នុងហ្វ៊ុនស៊ិនប៉ិច គឺគាំង មិនមានអ្នកណាដែលមានសិទ្ធិសម្រេចកិច្ចការធំៗ។
លោក អ៊ា ឃីម៉េង បានបន្តថា សមាជិក សមាជិកា នៅមូលដ្ឋានកំពុងតែទន្ទឹងរង់ចាំ និងស្វាគមន៍នៅវត្តមានរបស់សម្តេចក្រុមព្រះយាងមកកម្ពុជាវិញ។
សូមរម្លឹកថា សម្តេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍លើផ្លូវជាតិលេខ៤ ចន្លោះគីឡូម៉ែត្រ ២០០-២០១ នៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ កាលព្រឹកថ្ងៃទី១៧ ខែមិថុនា ឆ្នាំ២០១៨។ នៅក្នុងគ្រោះថ្នាក់ចរាចរណ៍នេះ សម្តេចក្រុមព្រះ បានរងរបួសធ្ងន់ និងអង្គរក្សរងរបួស។ ចំណែកអ្នកម្នាង អ៊ុក ផល្លា បានទទួលមរណភាព។ សម្តេចក្រុមព្រះ នរោត្តម រណឫទ្ធិ បច្ចុប្បន្ននេះ ត្រូវបានម្ចាស់ក្សត្រីយ៍ អេង ម៉ារី មើលថែទាំងព្រះរាជសុខភាពរបស់ព្រះអង្គចាប់តាំងពីព្រះអង្គជួបគ្រោះថ្នាក់ចរាចរណ៍នៅផ្លូវជាតិលេខ៤ កាលពីថ្ងៃទី១៧ ខែមិថុនា ឆ្នាំ២០១៨ រហូតមកដល់ពេលនេះ៕ រក្សាសិទ្ធិដោយ៖CEN