ភ្នំពេញៈ សត្វមាន់ជាច្រើនក្បាលបានងាប់ជាបន្តបន្ទាប់ស្ថិតនៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ ហើយបានធ្វើឲ្យប្រជាពលរដ្ឋរស់នៅតំបន់នោះ ព្រួយបារមម្ភខ្លាចមានជំងឺផ្តាសាយបក្សី។ ចំណែកមន្ត្រីជំនាញកំពុងតែធ្វើការតាមដាន និងបានយកសំណាកបញ្ជូនមករាជធានីភ្នំពេញដើម្បីធ្វើការពិសោធន៍។
លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់សារព័ត៌មាន CEN កាលពីល្ងាចថ្ងៃទី៩ ខែមករា នេះថា “ពាក់ព័ន្ធករណីមាន់ងាប់នេះ យើងកំពុងតែធ្វើការតាមដាន ហើយករណីនេះមានមាន់ងាប់មែន ឥឡូវនេះយើងកំពុងតែយកសំណាកមកធ្វើការវិភាគ ខ្ញុំនឹងជូនដំណឹងនៅពេលក្រោយថា ប្រភេទជំងឺអ្វីបានជាមាន់ងាប់?”។
ចំណែកលោកឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានបញញ្ជាក់ថា ករណីមាន់ងាប់ជាង ១៣០០ក្បាល នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង គឺបានយកសំណាកមកធ្វើការវិភាគ ដើម្បីឲ្យដឹងថា មាន់ងាប់នេះដោយប្រភេទជំងឺអ្វី?។ ដោយលោកបានអះអាងថា ករណីមាន់ងាប់នេះ វាមិនមានប៉ះពាល់ជំងឺផ្តាសាយបក្សីទេ គឺមាន់ងាប់ដោយសារជំងឺធម្មតា។ មាន់បានងាប់ជាបន្តបន្ទាប់ចាប់តាំងតាំងពីថ្ងៃទី៥ ដល់ថ្ងៃទី៧ ខែមករា ឆ្នាំ២០២១។
លោកបានបន្តថា ម្ចាស់កសិដ្ឋានចិញ្ចឹមមាន់មានឈ្មោះ ហូ ណាំ ជាមន្ត្រីមន្ទីរសុខាភិបាលខេត្តបាត់ដំបង រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ បានចិញ្ចឹមមាន់ ទាកាប៉ាជាលក្ខណៈគ្រួសារ។ ករណីមាន់ងាប់នេះ គឺម្ចាស់មិនបានរាយការណ៍មកជំនាញបសុព្យាបាលស្រុកនិងខេត្តឲ្យចុះទៅជួយអន្តរាគមន៍បាញ់ថ្នាំការពារទេ នេះជាកំហុសរបស់ម្ចាស់កសិដ្ឋានចិញ្ចឹមមាន់៕រក្សាសិទ្ធិដោយ៖CEN