ភ្នំពេញ ៖ មហាជនច្បាស់ជាបានដឹងហើយអំពីសំណុំរឿងប៉ុនប៉ងបាញ់សម្លាប់បុរសម្នាក់ពីសំណាក់មន្ដ្រីនគរបាលពាក់ស័ក្កិ៤ម្នាក់ ឈ្មោះ កេត ផារ៉ែន នៅចំណុចផ្លូវ៣៧១ កាលពីវេលាម៉ោងជាង ៩យប់ ថ្ងៃទី០៩ ខែធ្នូ ឆ្នាំ២០២០ ក្នុងសង្កាត់បឹងទំពុន២ ខណ្ឌមានជ័យ បើគិតមកដល់ព្រឹកថ្ងៃទី១០ ខែមករា ឆ្នាំ២០២១នេះ រយៈពេល១ខែកន្លងមកហើយ នគរបាលមិនទាន់តាមចាប់ខ្លួនជន ដៃដល់បាននៅឡើយទេ ទោះស្គាល់អត្តសញ្ញាណច្បាស់លាស់ ក៏ដោយ ។
មជ្ឈដ្ឋានជាច្រើនសង្ឃឹមថា សមត្ថកិច្ចនឹងចាប់ខ្លួនប៉ូលិសស័ក្តិ៤ កេត ផារ៉ែន យកមកផ្តន្ទាទោសតាមផ្លូវច្បាប់ ដើម្បីជួយរកយុត្ដធម៌ជូនដល់ជនរងគ្រោះ ។
សូមបញ្ជាក់ថា បទល្មើសបាញ់ នេះ កើតឡើងកាលពីវេលាម៉ោងជាង ៩យប់ ថ្ងៃទី៩ ខែធ្នូ ឆ្នាំ២០២០ នៅចំណុចផ្លូវលេខ៣៧១ ក្នុងសង្កាត់បឹងទំពុន២ ខណ្ឌមានជ័យ ជាប់ព្រំប្រទល់ សង្កាត់ដង្កោ ខណ្ឌដង្កោ ។
ជនរងគ្រោះឈ្មោះ ប៊ុន ស៊ីម អាយុ៣៩ឆ្នាំ បញ្ជាក់ប្រាប់ថា មុនពេលកើតហេតុ គាត់មានគ្នា ៤នាក់ ជិះម៉ូតូចេញពីញាំអីនៅម្ដុំបឹងត្របែក រួចបានជូនមិត្តភក្តិមកផ្ទះ នៅកន្លែងកើតហេតុ (ផ្លូវ៣៧១) ។
លុះមកដល់មុខផ្ទះមួយភ្លែត ស្រាប់តែលេចមុខជនដៃដល់ដែលធ្លាប់ស្គាល់គ្នា តែមិនសូវជិតស្និទ្ធ បានចុះពីលើរថយន្តមិនចាំម៉ាក ហើយដើរឆ្លងផ្លូវមកសួរនាំមិត្តភក្តិគាត់ រួចក៏ដើរទៅជិះរថយន្តរបស់ខ្លួនវិញ នៅលើផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ ហើយជន ដៃដល់ បានបើកកញ្ចក់រថយន្ត ដកកាំភ្លើងខ្លីបាញ់សំដៅមកលើជនរងគ្រោះដែលនៅផ្លូវម្ខាងទៀត ក្នុងសង្កាត់ដង្កោខណ្ឌដង្កោ ចំនួន ២គ្រាប់ ដោយ១គ្រាប់ចំជើងខាងស្ដាំ និង ១គ្រាប់ទៀតចំទ្វារកញ្ចក់ផ្ទះមួយផ្ទាំងបែកខ្ទេច រួចក៏បើករថយន្តគេចខ្លួនបាត់ទៅ។
ជនរងគ្រោះបន្តថា រូបគាត់ក៏ប្រញាប់ទៅមន្ទីពេទ្យដើម្បីពិនិត្យ និងលាងរបួស , មួយសន្ទុះក្រោយមករូបគាត់បានមកកន្លែងកើតហេតុវិញ ទើបបង្កការភ្ញាក់ផ្អើលដល់អ្នកសារព័ត៌មានជាច្រើនចុះមកផ្ដិតយករូបភាព និង Live ទើបដឹងឮ ដល់សមត្ថកិច្ចប៉ុស្ដិ៍នគរបាលបឹងទំពុន២ និងសមត្ថកិច្ចប៉ុស្ដិ៍នគរបាលដង្កោ ចុះមកដល់កន្លែងកើតហេតុ និងចាត់ការតាមនីតិវិធី។
ទោះជាយ៉ាងណា គិតមកដល់ ថ្ងៃទី១០ ខែមករា ឆ្នាំ២០២១ នេះ សមត្ថកិច្ចពាក់ព័ន្ធនៅមិនទាន់អាចឃាត់ខ្លួនជនដៃដល់ជាម្ត្រីនគរបាល ពាក់ស័ក៤នោះ នៅឡើយទេ៕ រក្សាសិទ្ធិដោយ៖CEN