ភ្នំពេញៈ មន្ត្រីជាន់ខ្ពស់ប៉េអឹមលើផ្ទៃប្រទេសបានបង្ហើបឲ្យដឹងថា នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសបានបញ្ជាខាងជំនាញ និងឱ្យអធិការកិច្ច ធ្វើការស្រាវជ្រាវករណីនាយករងមជ្ឈមណ្ឌលហ្វឹកហ្វឺនភ្នំជំរាយ ដកកាំភ្លើងគំរាមបាញ់នៅក្នុងករណី គ្រោះថ្នាក់ចរាចរណ៍ ក្នុងសង្កាត់ផ្សារថ្មីទី១ ខណ្ឌ ដូនពេញ រាជធានីភ្នំពេញនៅរំលងអាធ្រាត្រឈានចូលថ្ងៃទី១០ ខែមករា ឆ្នាំ២០២១។
មន្ត្រីជាន់ខ្ពស់ប៉េអឹមបានបញ្ជាក់ថា បើសិនជាអធិការកិច្ចរកឃើញថា នាយករងមជ្ឈមណ្ឌលហ្វឹកហ្វឺនភ្នំជំរាយ បានប្រព្រឹត្តដូចសារព័ត៌មានចុះផ្សាយមែននោះ គឺអាចប្រឈមមុខទៅនឹងច្បាប់ គឺទី១. ទាក់ទងទៅនឹងវិន័យរបស់កងយុទ្ធពលខេមរៈភូមិន្ទ និងទី២. ត្រូវអនុវត្តទៅតាមច្បាប់ដែលបានចែកអំពីទោសទណ្ឌបើបុគ្គលនោះបានប្រព្រឹត្តមែន។
សូមជម្រាបថា ករណីគ្រោះថ្នាក់ចរាចរណ៍មួយកើតជាជម្លោះរហូតឈានដល់ការដកកាំភ្លើងគំរាមបាញ់សម្លាប់គូរបដិបក្ខថែមទៀតផង។ ហេតុការណ៍នេះ កើតឡើងនៅជិតផ្សារធំថ្មី ក្នុងសង្កាត់ ផ្សារថ្មីទី១ ខណ្ឌដូនពេញ រាជធានីភ្នំពេញនៅរំលងអធ្រាត្រឈានចូលថ្ងៃទី១០ ខែមករា ឆ្នាំ ២០២១ ។
សេចក្តីរាយការណ៍បានឲ្យដឹងថា មុនពេលកើតហេតុ គេឃើញរថយន្តព្រូសបើកបរដោយបុរសម្នាក់ដែលមានកាំភ្លើង បានបើកឡានស្របគ្នាតាមបណ្តោយផ្លូវ៧៣ គៀនផ្សារធំថ្មី ហើយឃើញរថយន្តបានបើកគៀរម៉ូតូបណ្តាលឲ្យដួល ហើយបានដកកាំភ្លើងពីចង្កេះហើយស្រែកថាហ្អែងចង់យ៉ាងម៉េច ភ្លាមៗនោះជនរងគ្រោះបានលើកដៃសុំកុំបាញ់គាត់អី ប្រជាពលរដ្ឋបានរត់មកជួយជនរងគ្រោះដែលដួលម៉ូតូ បាក់ដងកាំបិតនិងត្រូវត្រង់ប្រអប់ជើង បញ្ជូនទៅកាន់មន្ទីរពេទ្យ។ បន្ទាប់ មកអ្នកដែលអួតក្អេងក្អាង និងកាន់កាំភ្លើងនៅមុខសមត្ថកិច្ចថែមទៀតផង ក្រោយមកទើបសមត្ថកិច្ចបានដកទុក។
ប្រភពបានឲ្យដឹងថា ជនបង្កជាមន្ត្រីកងរាជអាវុធហត្ថ និងមានតួនាទីនាយករងមជ្ឈមណ្ឌលហ្វឹកហ្វឺនភ្នំជំរាយ បានចេញពីកន្លែងផឹកស៊ីមួយកន្លែង ហើយបានបើករថយន្តមកផ្ទះ ក៏ជួបហេតុការណ៍គ្រោះថ្នាក់ចរាចរណ៍ជាមួយម៉ូតូ។
ហើយជនរងគ្រោះមិនបានដាក់ពាក្យបណ្តឹងនៅទេ ដោយសុំឲ្យអ្នកបង្រសងថ្លៃព្យាបាលនៅមន្ទីរពេទ្យតែប៉ុណ្ណោះ។
ចំពោះករណីនេះមជ្ឈដ្ឋានទូទៅកំពុងតែរង់ចាំមើលថាតើ ចំណាត់ការរបស់នាយឧត្តមសេនីយ៍សៅ សុខា ទៅលើបុគ្គលរូបនោះ ដោយរបៀបណា?៕ រក្សាសិទ្ធិដោយ: ចេស្តា