តាកែវ៖លោក អ៊ូច ភា អភិបាលខេត្តតាកែវ បានជម្រុញដល់មន្ទីរសាធារណការ និងដឹកជញ្ជូនខេត្ត ត្រូវអនុវត្ត នីតិវិធីបិទយានដ្ឋានកែច្នៃ ខុសលក្ខណៈបច្ចេកទេស ដែលជាប្រភពនៃការកែច្នៃយានយន្តដឹកជញ្ជូនលើសទម្ងន់ នៃកម្រិតកំណត់ ដែលជាហេតុនាំឲ្យខូចខាតផ្លូវថ្នល់ ស្ពាន និងបង្កគ្រោះថ្នាក់ចរាចរណ៍ នៅលើដងផ្លូវ។
លោកថ្លែងបែបនេះ នៅក្នុងពិធីប្រជុំបូកសរុបលទ្ធផលការងារ អនុគណៈកម្មការសុវត្ថិភាពចរាចរណ៍ផ្លូវគោកខេត្តតាកែវ ប្រចាំខែធ្នូ និងប្រចាំឆ្នាំ២០២០ និងលោកទិសដៅអនុវត្តបន្ត ឆ្នាំ២០២១ នៅសាលប្រជុំសាលាខេត្តតាកែវ នាព្រឹកថ្ងៃទី ១១ខែមករា ឆ្នាំ២០២១ ។
លោកថ្លែងថា មន្ទីរជំនាញសហការជាមួយកងកម្លាំងនគរបាលចរាចរណ៍ ត្រូវបន្តធ្វើយុទ្ធនាការផ្សព្វផ្សាយ អំពីច្បាប់ចរាចរណ៍ផ្លូវគោកបន្ថែមទៀត ដល់បងប្អូនប្រជាពលរដ្ឋនៅតាមសាលារៀន ទីប្រជុំជន ឲ្យពួកគាត់ចូលរួមគោរពច្បាប់ចរាចរណ៍ទាំងអស់គ្នា បើកបរម៉ូតូត្រូវពាក់មួកសុវត្ថិភាព ជិះរថយន្តត្រូវពាក់ខ្សែរក្រវ៉ាត់ ព្រមទាំងធ្វើការបិទចំណាំងផ្លាតសុវត្ថិភាព (ស្ទីកគ័រចំណាំងផ្លាតពន្លឺពេលយប់) ដល់គោយន្ត ឬ រថយន្ត ម៉ូតូ ម៉ូតូរ៉ឺម៉ក កង់បីជាដើម ដើម្បីការពារអាយុជីវិតអ្នកបើកបរនាពេលយប់ពីករណីគ្រោះថ្នាក់ចរាចរ ដែលអាចកើតឡើងជាយថាហេតុ ។
ជាមួយគ្នានេះដែរលោក អ៊ូច ភា អភិបាលខេត្តតាកែវ ក៏បានស្នើសុំឲ្យសមត្ថកិច្ចពាក់ព័ន្ធ ក្នុងពេលត្រួតពិនិត្យយានយន្តដឹកជញ្ជូនតាមដងផ្លូវ ត្រូវបង្កើនការត្រួតពិនិត្យ វិញ្ញាបនបត្រ ត្រួតពិនិត្យលក្ខណៈបច្ចេកទេសយានយន្ត បណ្ណបើកបរ បណ្ណសម្គាល់យានយន្ត ការផាកពិន័យរថយន្តដឹកលើសទម្ងន់ រថយន្តដឹកសំពីងសំពោង ត្រួតពិនិត្យគ្រឿងញៀន ឬជាតិអកុល។ល។ ដើម្បីធានាសុវត្ថិភាព ក៏ដូចជាបង្ការបញ្ហាគ្រោះថ្នាក់ចរាចរណ៍របស់បងប្អូនប្រជាពលរដ្ឋ។ ចុងបញ្ចប់នៃកម្មវិធី ឯកឧត្តមអភិបាលខេត្ត ក៏បានថ្លែងអំណរគុណ និងធ្វើការកោតសរសើរ ដល់កងកម្លាំងសមត្ថកិច្ច ក៏ដូចជាមន្ត្រីជំនាញពាក់ព័ន្ធទាំងអស់ ដែលបានខិតខំប្រឹងប្រែងអនុវត្តការងារប្រកបដោយជោគជ័យកន្លងមក និងបានជំរុញលើកទឹកចិត្តឲ្យក្រុមការងារខិតខំប្រឹងប្រែងការងារបន្តទៀត ដើម្បីឲ្យខេត្តតាកែវ ក៏ដូចជាប្រទេសកម្ពុជាកាត់បន្ថយបាននូវគ្រោះថ្នាក់ចរាចរណ៍៕រក្សាសិទ្ធិដោយ៖ តាកែវ
