ភ្នំពេញ ៖ ក្នុងរយៈពេល ៦ ឆ្នាំចុងក្រោយ ២០១៤-២០២០ ដៃគូអឺរ៉ុបបានផ្តល់ហិរញ្ញប្បទានសរុបប្រមាណ ១ ៤០០ លានដុល្លារអាម៉េរិក (ហិរញ្ញប្បទានឥតសំណងចំនួន ១.១០០លានដុល្លារអាមេរិក និងឥណទានសម្បទានប្រមាណ ៣០០ លានដុល្លារអាម៉េរិក) ដើម្បីគាំទ្រដល់ការអនុវត្តយុទ្ធសាស្ត្ររួមរបស់អឺរ៉ុបស្តីពីកិច្ចប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០១៤-២០២០ ។
ថ្លែងនៅក្នុងជំនួបពិភាក្សាការងារ រវាង តំណាងដៃគូអឺរ៉ុបប្រចាំកម្ពុជា (ឆែក, បារាំង, អាល្លឺម៉ង់, ស៊ុយអែត និងស្វីស) ដឹកនាំដោយលោក ហ្រេ្វក វាអត (Franck Viault) អគ្គទីប្រឹក្សា និងជាប្រធានទទួលបន្ទុកផ្នែកកិច្ចសហប្រតិបត្តិការនៃសហភាពអឺរ៉ុបប្រចាំកម្ពុជា កាលពីថ្ងៃទី១១ ខែមករា ឆ្នាំ២០២១ នៅទីស្តីការ ក្រុមប្រឹក្សាអភិវឌ្ឍន៍កម្ពុជា លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការ នីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជាថា ជំនួបនេះ គឺដើម្បីពិភាក្សាអំពីការត្រៀមរៀបចំកិច្ចពិគ្រោះយោបល់ រវាងរាជរដ្ឋាភិបាលកម្ពុជា និង សហភាពអឺរ៉ុប-ដៃគូអឺរ៉ុប លើសេចក្តីព្រាងយុទ្ធសាស្ត្ររួមរបស់អឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០២១-២០២៧ និងសេចក្តីព្រាងកម្មវិធីណែនាំពហុឆ្នាំរបស់សហភាពអឺរ៉ុប ឆ្នាំ២០២១-២០២៧ ។
លោក យ៉ាណារ៉ា បានសម្តែងការសា្វគមន៍យ៉ាងកក់ក្តៅចំពោះតំណាងសហភាពអឺរ៉ុប និងដៃគូអឺរ៉ុបទាំងអស់ ដែលបានអញ្ជើញចូលរួមក្នុងជំនួបពិភាក្សាផ្ទាល់នាថ្ងៃនេះ និងបានវាយតម្លៃខ្ពស់ចំពោះសមិទ្ធផល សម្រេចបានដ៏ល្អប្រសើរ ក្នុងការអនុវត្តយុទ្ធសាស្ត្ររួមរបស់អឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០១៤-២០២០ និងកម្មវិធីណែនាំពហុឆ្នាំរបស់សហភាពអឺរ៉ុប ឆ្នាំ២០១៤-២០២០ ក៏ដូចជាកិច្ចសហប្រតិបត្តិការអភិវឌ្ឍន៍ កន្លងមក ដែលបានរួមចំណែកយ៉ាងសំខាន់ក្នុងកិច្ចអភិវឌ្ឍន៍ប្រកបដោយចីរភាព និងបរិយាប័ន្ននៅកម្ពុជា ។
ដោយឡែក តំណាងដៃគូអឺរ៉ុប បានវាយតម្លៃខ្ពស់ចំពោះវឌ្ឍនភាពល្អប្រសើរដែលសម្រេចបានតាមរយៈវឌ្ឍនភាពនៃវិស័យ អាទិភាពចំនួន ៤ រួមមាន៖ ១) ការអភិវឌ្ឍវិស័យសង្គមកិច្ច, ២) ការជំរុញកំណើនសេដ្ឋកិច្ចប្រកបដោយសមធម៌ និងចីរភាព, ៣) ការអភិវឌ្ឍហេដ្ឋារចនាសម្ព័ន្ធនៅទីក្រុង និងជនបទ និង ៤) អភិបាលកិច្ច និងអន្តរវិស័យ ។
សមិទ្ធផលទាំងនេះ គឺជាសក្ខីភាពនៃការប្តេជ្ញាបន្តគាំទ្ររបស់សហភាពអឺរ៉ុប និងប្រទេសជាសមាជិកសហភាពអឺរ៉ុប និងសហព័ន្ធស្វីស សម្រាប់ដំណើរការនៃកិច្ចអភិវឌ្ឍន៍នៅកម្ពុជា ។ តំណាងដៃគូអឺរ៉ុប ក៏បានកោតសរសើរ និងវាយតម្លៃខ្ពស់ចំពោះភាពជាដៃគូ និងកិច្ចសហប្រតិបត្តិការដ៏ល្អប្រសើររវាងគ្រប់ដៃគូអឺរ៉ុបទាំងអស់ប្រចាំនៅកម្ពុជា និងក្រុមប្រឹក្សាអភិវឌ្ឍន៍កម្ពុជា កន្លងមក ។
គួរបញ្ជាក់ផងដែរថា ក្នុងចន្លោះឆ្នាំ១៩៩២-២០២០ ដៃគូអឺរ៉ុប (សហភាពអឺរ៉ុប និងប្រទេសសមាជិកចំនួន ១០ ព្រមទាំងសហព័ន្ធស្វ៊ីស) បានផ្តល់ហិរញ្ញប្បទានសហប្រតិបត្តិការសរុបប្រមាណ ៤ ២០០ លានដុល្លារអាម៉េរិក សមមូល នឹង ១៩% នៃហិរញ្ញប្បទានសរុបដែលផ្តល់ដោយដៃគូអភិវឌ្ឍន៍ទាំងអស់បានផ្តល់ដល់កម្ពុជា៕ រក្សាសិទ្ធិដោយ៖ CEN