បាត់ដំបង៖ នគរបាលស្រុករុក្ខគីរី បង្ក្រាបអ្នកប្រព្រឹត្តល្បែងភ្នាល់ជល់មានមួយករណីក្នុងមូលដ្ឋាន ឃាត់ខ្លួនអ្នកប្រព្រឹត្តចំនួន ៥នាក់ ក្នុងចំណោមអ្នកប្រព្រឹត្តផ្សេងទៀត ដែលរត់គេចខ្លួនស្របពេលសមត្ថកិច្ចចុះទៅដល់ទីនោះ រីឯវត្ថុតាងមួយចំនួនរួមមានម៉ូតូចំនួន១៣គ្រឿង មាន់ជល់ចំនួន០៣ក្បាលកៅស៊ូជ័រជាសង្វៀនសម្រាប់ជល់មាន់ចំនួន០៣ដុំ។
ស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីថ្ងៃទី ១១ ខែ មករា ឆ្នាំ២០២១ វេលាម៉ោង១៣និង៤៥នាទី អនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមទាំងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌនៃស្នងការដ្ឋាន លោកវរសេនីយ៍ឯក ឆាយ ម៉ាប់ អធិការនគរ បាលស្រុករុក្ខគីរី បានដឹកនាំកងកម្លាំងក្នុងអង្គភាព ចុះបង្ក្រាបករណីល្បែងជល់មាន់ភ្នាល់ដាក់ប្រាក់ មួយកន្លែង នៅចំណុចភូមិខ្នាចអំពរ ឃុំព្រែកជីក ស្រុករុក្ខគីរី ខេត្តបាត់ដំបង ដោយបានធ្វើការឃាត់ខ្លួនអ្នកប្រព្រឹត្តចំនួន ៥នាក់ភេទប្រុស ក្នុងចំណោមអ្នកប្រព្រឹត្តផ្សេងទៀតដែលរត់គេចខ្លួនស្របពេលសមត្ថកិច្ចចុះទៅដល់ទីនោះ រីឯវត្ថុតាងមួយចំនួនរួមមានម៉ូតូចំនួន១៣គ្រឿងមាន់ជល់ចំនួន០៣ក្បាលកៅស៊ូជ័រជាសង្វៀនសម្រាប់ជល់មាន់ចំនួន០៣ដុំស្ថិតនៅទីកន្លែងនោះត្រូវបានដកហូត ។
នៅក្រោយពេលធ្វើកំណត់ហេតុសាកសួរបំភ្លឺរួច សមត្ថកិច្ចនគរបាលបានធ្វើការអប់រំណែនាំដោយធ្វើកិច្ចសន្យា ឱ្យពួកគាត់បញ្ឈប់សកម្មភាពល្មើសនេះបន្តទៀត រួចបានឱ្យវិលត្រឡប់ទៅលំនៅដ្ឋានវិញ៕រក្សាសិទ្ធិដោយ៖បញ្ញាស័ក្តិ