ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ បានសម្រេចដាក់ភូមិព្រែកតាច្រែង ឃុំព្រែកនរិន្ទស្រុកឯកភ្នំ នៃខេត្តបាត់ដំបង ដែលមានសត្វមាន់ងាប់ជាង ១ពាន់ក្បាល ជាតំបន់ដែលមានការផ្ទុះជម្ងឺឆ្លងផ្តាសាយបក្សី និងបញ្ជាការសម្លាប់ចោលចំពោះបក្សីគ្រប់ប្រភេទក្នុងតំបន់ផ្ទុះជំងឺតាមវិធានបច្ចេក ទេសបសុពេទ្យ។
ក្រសួងកិសកម្ម រុក្ខាប្រមាញ់ និងនេសាទ នៅថ្ងៃទី១២ ខែមករា ឆ្នាំ២០២១ នេះ បានចេញប្រកាសស្តីពីការកំណត់តំបន់ជំងឺគ្រុនផ្តាសាយបក្សី ដែលស្ថិតនៅភូមិព្រែកតាច្រែង ឃុំព្រែកនរិន្ទស្រុកឯកភ្នំ នៃខេត្តបាត់ដំបង។ ការកំណត់តំបន់ជំងឺគ្រុនផ្តាសាយបក្សីនេះ បានធ្វើឡើងបន្ទាប់ពីមានសត្វមាន់ងាប់ជាបន្តបន្ទាប់ជាង ១ពាន់ក្បាល នៅក្នុងកសិដ្ឋានចិញ្ចឹមមាន់មួយកន្លែងស្ថិតនៅភូមិព្រែកតាច្រែង ឃុំព្រែកនរិន្ទស្រុកឯកភ្នំ នៃខេត្តបាត់ដំបង កាលពីថ្ងៃទី៥ ដល់ថ្ងៃទី៧ ខែមករា ឆ្នាំ២០២១។
ប្រកាសរបស់ក្រសួងកិសកម្ម រុក្ខាប្រមាញ់ និងនេសាទ បានបន្តថា អគ្គនាយកដ្ឋានសុខភាពសត្វ និងផលិតកម្មសត្វ ត្រូវចាត់វិធានការបសុព្យាបាលនៅតំបន់ផ្ទុះជំងឺផ្តាសាយបក្សី និងអនុលោមតាមមាត្រា១៤ នៃច្បាប់ស្តីពីសុខភាពសត្វ និងផលិតកម្មសត្វ ដូចជាៈ បំផ្លាញចោលចំពោះបក្សីគ្រប់ប្រភេទក្នុងតំបន់ផ្ទុះជំងឺទៅតាមវិធានបច្ចេកទេសបសុពេទ្យ។ ផ្អាកជាបណ្តោះអាសន្នលើការទិញ ការលក់ និងការដឹកជញ្ជូនបក្សីគ្រប់ប្រភេទចូល ចេញ ឬឆ្លងកាត់ក្នុង រង្វង់កាំប្រវែង ៣( បី) គីឡូម៉ែត្រ ពីចំណុចផ្ចិតនៃតំបន់ផ្ទុះជំងឺ និងដាក់តំបន់នេះជាតំបន់ត្រួតពិនិត្យ និងតាមដាន សិក្សាស្រាវជ្រាវប្រភពជំងឺផ្តាសាយបក្សីក្នុងរយៈពេល៣០(សាមសិប )ថ្ងៃ និងត្រួតពិនិត្យឃ្លាំមើលចលនាបក្សីជាប្រចាំក្នុងរង្វង់ដែលមានកាំប្រវែង ១០ គីឡូម៉ែត្រ ពីចំណុចផ្ចិតនៃតំបន់ផ្ទុះជំងឺ។
ប្រភពដដែលបានបន្តថា ការចិញ្ចឹម ទិញ លក់ និងដឹកជញ្ជូនបក្សីគ្រប់ប្រភេទនៅក្នុងតំបន់ផ្ទុះជំងឺផ្តាសាយបក្សីត្រូវផ្អាកជាបណ្តោះអាសន្ន។ ការអនុញ្ញាតចិញ្ចឹម ទិញ លក់ និងដឹកជញ្ជូនបក្សីឡើងវិញ និងការរំសាយតំបន់ ជំងឺផ្តាសាយបក្សី ត្រូវកំណត់ដោយប្រកាសជាថ្មី។ ជនណាប្រព្រឹត្តល្មើស ត្រូវផ្តន្ទាទោសតាមច្បាប់ស្តីពីសុខភាពសត្វ និងផលិតកម្មសត្វ៕ រក្សាសិទ្ធិដោយៈ ចេស្តារ