ភ្នំពេញ៖ នៅថ្ងៃទី១៣ ខែមករា រាជរដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១៨២,០៣៥ ដុល្លារអាមេរិក ដល់អង្គការមូលនិធិជប៉ុន (PHJ) ក្រោមគ្រោងការណ៍ជំនួយហិរញ្ញប្បទានឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុន ដើម្បីអនុវត្ត “គម្រោងពង្រឹងការថែទាំសុខភាពសហគមន៍ និងបណ្តាញគាំទ្រសម្រាប់កុមារក្នុងខេត្តកំពង់ចាម (ឆ្នាំទី ២)”។
ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុន និងលោកស្រី កាណាកុ អ៊ីហ្ស៊ីយ៉ាម៉ា នាយិកាប្រចាំប្រទេសនៃអង្គការ PHJ បានចុះហត្ថលេខាលើកិច្ចសន្យាផ្តល់ជំនួយឥតសំណងនេះដើម្បីអនុវត្តគម្រោង “ពង្រឹងការថែទាំសុខភាពសហគមន៍ និងបណ្តាញគាំទ្រសម្រាប់កុមារ ក្នុងខេត្តកំពង់ចាម (ឆ្នាំទី ២)”។ យើងជឿជាក់ថា ជំនួយឥតសំណងនេះ នឹងជួយក្នុងការកែលម្អគុណភាពជីវិតរបស់ប្រជាជនដែលរស់នៅក្នុងទីតាំងនៃគម្រោង។
នៅក្នុងគម្រោងនេះ អង្គការ PHJ មានគោលបំណងកាត់បន្ថយអត្រាមរណភាពនៃកុមារអាយុក្រោម ៥ឆ្នាំ និងលើកកម្ពស់សុខភាពកុមារ តាមរយៈការភ្ជាប់បណ្តាញរវាងបុគ្គលិកសុខាភិបាល និងអ្នកស្ម័គ្រចិត្តសុខភាពនៅក្នុង សហគមន៍។ គម្រោងនេះក៏រួមបញ្ចូលទាំងការរៀបចំវគ្គបណ្តុះបណ្តាលស្តីពីការលើកកម្ពស់អាហារូបត្ថម្ភ ទៅដល់ ក្រុមទ្រទ្រង់សុខភាពភូមិ (VHSG) ដោយពួកគេនឹងអាចបង្ហាញពីរបៀបរៀបចំអាហារដែលមានជីវជាតិជាមួយនឹង គ្រឿងផ្សំក្នុងស្រុកនៅក្នុងសហគមន៍របស់ពួកគេ។
កម្មវិធីជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជាតាំងពីឆ្នាំ ២០០២ ដើម្បីគាំទ្រដល់សកម្មភាពអង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែងដើម្បីជួយដល់ការអភិវឌ្ឍ និង ស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ ចាប់តាំងពីឆ្នាំ២០០២មក រដ្ឋាភិបាលជប៉ុន បានផ្តល់ថវិកា ជាង ៤១លានដុល្លារអាមេរិក ដល់គម្រោងចំនួន១៣១ ដែលផ្តោតសំខាន់ទៅលើវិស័យអប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា។
ឯកឧត្តម ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជាថ្លែងក្នុងពិធីចុះហត្ថលេខាលើកិច្ចសន្យាផ្តល់ជំនួយក្នុងគម្រោង ហិរញ្ញប្បទានឥតសំណងសម្រាប់អង្គការក្រៅរដ្ឋាភិបាលជប៉ុនថា រដ្ឋាភិបាលជប៉ុនបានចាប់ផ្តើមហិរញ្ញប្បទានឥតសំណងសម្រាប់អង្គការក្រៅរដ្ឋាភិបាល ជប៉ុនចាប់តាំងពីឆ្នាំ២០០២ ដើម្បីជួយដល់គម្រោងអភិវឌ្ឍន៍សេដ្ឋកិច្ចនិងសង្គមរបស់អង្គការ ក្រៅរដ្ឋាភិបាលជប៉ុនក្នុងប្រទេសឬតំបន់កំពុងអភិវឌ្ឍន៍។ រហូតមកដល់ពេលនេះ ស្ថានទូតជប៉ុនបានផ្តល់ជំនួយជាង១៣០គម្រោងនៅកម្ពុជាតាមរយៈកម្មវិធីនេះ។ គម្រោងនីមួយៗបាន ចូលរួមចំណែកក្នុងការលើកកម្ពស់គុណភាពជីវភាពរស់នៅរបស់ប្រជាជនកម្ពុជា។
សម្រាប់គម្រោងដែលអនុវត្តដោយអង្គការ “People Hope Japan” រដ្ឋាភិបាលជប៉ុនផ្តល់ ថវិកាប្រមាណ ១៨០,០០០ ដុល្លារអាមេរិក។ ចាប់តាំងពីឆ្នាំ ២០០៣ អង្គការនេះបានចូលរួមក្នុងការណែនាំបច្ចេកទេសដល់បុគ្គលិកមណ្ឌលសុខភាពក៏ដូចជាឆ្មបមូលដ្ឋាន ព្រមទាំងសកម្មភាព អប់រំសម្រាប់សហគមន៍នីមួយៗនៅក្នុងប្រទេសកម្ពុជា។ ខ្ញុំសូមសម្តែងនូវការកោតសរសើរ ចំពោះការចូលរួមចំណែកដល់ការកសាងទំនាក់ទំនងនៃការជឿទុកចិត្តគ្នារវាងមណ្ឌលសុខភាព និងប្រជាជន និងការពារការស្លាប់របស់មាតានិងទារក។ នៅខេត្តកំពង់ចាមអង្គការនេះនឹងបន្តធ្វើការលើការកសាងនិងពង្រឹងបណ្តាញបុគ្គលិកមណ្ឌលសុខភាពនិងអ្នកស្ម័គ្រចិត្តសុខភាពមូលដ្ឋាន កាត់បន្ថយជំងឺដែលអាចការពារបាននិងការស្លាប់របស់កុមារអាយុក្រោម ៥ ឆ្នាំនិងលើកកម្ពស់ការលូតលាស់និងការអភិវឌ្ឍរបស់កុមារឲ្យមានសុខភាពល្អ។ អង្គការនេះក៏នឹងធ្វើការលើ ការបង្កើតសម្ភារៈអប់រំ ការអប់រំអាហារូបត្ថម្ភ និងការបណ្តុះបណ្តាលធ្វើម្ហូប។ ខ្ញុំសម្តែងនូវការកោតសរសើរសម្រាប់ការចូលរួមចំណែករបស់អង្គការ People Hope Japan” ដែលបាននិងកំពុងធ្វើការលើកកម្ពស់សុខភាពនិងអនាម័យរបស់ប្រទេសកម្ពុជាអស់រ យៈពេលជាច្រើនឆ្នាំមកនេះ។ ខ្ញុំសង្ឃឹមថាគម្រោងនេះនឹងជំរុញកិច្ចសហប្រតិបត្តិការរវាងប្រជា ជនក្នុងតំបន់និងមណ្ឌលសុខភាពថែមទៀតដែលនាំទៅដល់ការលើកកម្ពស់សុខភាពនិងការ ថាលជំងឺដល់ទារក។
ខ្ញុំសង្កេតឃើញថានាពេលថ្មីៗនេះ ប្រទេសកម្ពុជាបាននឹងកំពុងអភិវឌ្ឍយ៉ាងឆាប់រហ័ស ប៉ុន្តែនៅតែមានបញ្ហាប្រឈមមួយចំនួនដែលត្រូវដោះស្រាយដើម្បីកែលម្អនូវគុណភាពជីវភាពរស់ នៅរបស់ប្រជាជន ដូចជា ការកាត់បន្ថយភាពក្រីក្រនិង ការអភិវឌ្ឍសង្គម រួមទាំងបរិស្ថានជុំវិញ សុខាភិបាលនិងការអប់រំ។ បញ្ហាសុខភាពនិងអនាម័យក៏កាន់តែមានសារសំខាន់ផងដែរជា ពិសេសនៅពេលដែលជំងឺកូរឹត១៩ មានការគំរាមកំហែងនៅលើទូទាំងពិភពលោក។ ប្រទេសជប៉ុន នឹងបន្តសហការជាមួយអង្គការក្រៅរដ្ឋាភិបាលដើម្បីដោះស្រាយបញ្ហាប្រឈមផ្សេងៗ៕ រក្សាសិទ្ធិដោយ៖បញ្ញាស័ក្តិ