ភ្នំពេញៈ ជនង្ស័យជាស្ត្រី០២នាក់ បុគ្គលិកផ្នែកគណនេយ្យបម្រើការងារនៅក្នុងក្រុមហ៊ុនអាល់ ហ្វា ប្រូផឺធី ខោនស្ត្រាក់សិន ស្ថិតនៅក្រុមទី៩ ភូមិ៤ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ត្រូវបាននគរបាលខណ្ឌបឹងកេងកង ចាប់ឃាត់ខ្លួនកាលពីថ្ងៃ១៣ ខែមករា ឆ្នាំ២០២១ អនុវត្តតាមបណ្តឹងរបស់ក្រុមហ៊ុនប្តឹងចោទប្រកាន់ពីបទរំលោភទំនុកចិត្ត(លួចលុយក្រុមហ៊ុនក្នុងកុងធនាគារជាង១២ម៉ឺនដុល្លា)។
សេចក្តីរាយការណ៍ពីអធិការដ្ឋាននគរបាលខណ្ឌបឹងកេងកងឱ្យដឹងថា ជនសង្ស័យដែលរងការចាប់ខ្លួនបានលួចលុយក្នុងកុងធនាគារក្រុមហ៊ុនសរុប ១២ម៉ឺន២ពាន់ដុល្លា។ ជនសង្ស័យ១. ឈ្មោះ ចាន់ វុធសីហា អាយុ២៧ឆ្នាំ រស់នៅផ្ទះលេខ៤៥ ផ្លូវលេខ១៣៤ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ជនសង្ស័យរូបនេះលួចលុយចំនួន១០ម៉ឺន ៥ពាន់ដុល្លារ និងទី២. ឈ្មោះ វង្ស សៀកឡេង អាយុ២៦ឆ្នាំ រស់នៅផ្ទះលេខ១៨៤Z ភូមិ៤ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញជនសង្ស័យលួចលុយ ១ម៉ឺន ៧ពាន់ដុល្លារ។
ប្រភពបានបន្តថា កាលពីអំឡុងឆ្នាំ២០១៦ ជនសង្ស័យទាំង០២នាក់ បានចូលបំរើការងារនៅក្នុងក្រុមហ៊ុនអាល់ ហ្វា ប្រូផឺធី ខោនស្ត្រាក់សិន ខណៈដែលជនសង្ស័យបំរើការងារដល់ឆ្នាំ២០១៧ ក៏បានលួចដកលុយរបស់ក្រុមហ៊ុនដែលបានយកទៅដាក់ក្នុងធនាគារជាបន្តបន្ទាប់រហូតដល់ឆ្នាំ២០២០ ។ លុះដល់ថ្ងៃទី១៣ ខែមករា ឆ្នាំ២០២១ ក្រុមហ៊ុនស្រាវជ្រាវថាបានបាត់លុយក្នុងធនាគារក៏ហៅជនសង្ស័យទាំង០២នាក់មកសាកសួរ បន្ទាប់មកជនសង្ស័យទាំង០២នាក់ឆ្លើយសារភាពថា ពួកខ្លួនពិតជាបានលួចដកលុយរបស់ក្រុមហ៊ុនពិតប្រាកដ ទើបខាងក្រុមហ៊ុនបានប្តឹងសមត្ថកិច្ចអនុវត្តតាមផ្លូវច្បាប់។ជនសង្ស័យទាំង២នាក់ក៏ត្រូវបាននគរបាលខណ្ឌបឹងកេងកងកសាងសំណុំរឿងចាប់បញ្ជូនទៅតុលាការចាត់ការតាមផ្លូវច្បាប់៕ រក្សាសិទ្ធិដោយៈ ចេស្តារ