រតនគិរី៖ ក្រុមហ៊ុនវិនិយោគជិត៣០ កំពុងបោះទុនវិនិយោគលើគម្រោងចម្ការខ្នាតធំៗនៅខេត្តរតនគិរីដើម្បីនាំចេញកសិផលទៅក្រៅប្រទេស។
បើយោងតាមទិន្នន័យបច្ចុប្បន្នភាពរបស់រដ្ឋបាលខេត្តរតនគិរី ស្តីពីវឌ្ឍនភាពទិសដៅការងារឆ្នាំ២០២០ បានបង្ហាញថា មានក្រុមហ៊ុន ២៧ ដែលទទួលបានសិទ្ធពីរដ្ឋាភិបាលក្នុងការវិនិយោគដីសម្បទានសេដ្ឋកិច្ច ហើយដាំដុះដំណាំកសិកម្មសំខាន់ៗមួយចំនួនលើផ្ទៃដីសរុបប្រមាណ ១២ម៉ឺន៤ពាន់ហិកតា។
ក្រុមហ៊ុនទាំងនេះ វិនិយោគលើដំណាំកៅស៊ូ ស្វាយចន្ទី ចេកអំបូងលឿង ស្រកានាគ ខ្នុរ ដូង ស្វាយ និងប្រភេទឈើហូបផ្លែផ្សេងៗទៀតដូចជា ធុរេន តាង៉ែន មៀន ក្រូច និងម្នាស់ជាដើម។ ដំណាំកសិកម្មទាំងនេះបាននាំចេញទៅទីផ្សារបរទេសប្រមាណជាង ៨ម៉ឺន៧ពាន់តោន ហើយទឹកប្រាក់នៃការនាំចេញនេះមានជាង ៣៧លានដុល្លារកាលពីឆ្នាំ២០១៩។
បើតាមទិន្នន័យ ខេត្តរតនគិរី មានរោងចក្រកែច្នៃកៅស៊ូក្រែប ចំនួន ៧ទីតាំង ដែលមានបរិមាណផលិតជ័រកៅស៊ូក្រែប បានប្រមាណជាមធ្យម ៣០ ៤៧៩តោន ក្នុងមួយឆ្នាំ។ ក្រៅពីនេះ ក៏មានសិប្បកម្មកៅស៊ូសន្លឹកចំនួន ៩ទីតាំង និងរោងចក្រកែច្នៃដំឡូងមី ចំនួនមួយទីតាំង ដែលកំពុងកែច្នៃជាផលិតផលពាក់កណ្តាលសម្រេច ដើម្បីនាំចេញទៅទីផ្សារក្រៅប្រទេសផងដែរ៕
រក្សាសិទ្ធិដោយ៖CEN