ខេត្តព្រះវិហារ៖ នៅព្រឹកថ្ងៃទី១៤ ខែមករា ឆ្នាំ២០២១ ក្រុមការងារឧទ្យានបានសហការជាមួយក្រុមការងារចម្រុះខេត្តព្រះវិហារ គណៈអភិបាលស្រុកឆែ មន្ត្រីជំនាញពាក់ព័ន្ធ ដើម្បីបោះបង្គោល និងបែងចែកដីជូនប្រជាពលរដ្ឋចំនួន ០៧គ្រួសារ ដែលស្ម័គ្រចិត្តផ្ទេរចេញពីឧទ្យាន ដំណាក់កាលទី១។
សមាសភាពគណៈកម្មចម្រុះរួមមាន៖ ១. លោក ចាន់ លី អភិរងស្រុកឆែប ២. លោក នួន ស៊ីដេត ប្រធានការិយាល័យភូមិបាលស្រុកឆែប ៣. លោក ឈុន លន់ នាយកទីចាត់ការសាលាខេត្តព្រះវិហារ ៤. លោក អ៊ុន ប៊ុនណាត ប្រធានការិយាល័យលាសាខេត្តព្រះវិហារ ៥. លោក ហ៊ឹម យ៉ាណ មេឃុំឆែបពីរ ៦. លោក ជា សម្បត្តិ អនុប្រធានឫស្សីត្រឹប ៧. ព្រមទាំងមន្ត្រីជំនាញពាក់ព័ន្ធ។
គណៈកម្មកការបានសម្រេចវាស់វែង ចាប់ឆ្នោត និងប្រគល់ដីទំហំំ ៣០ម៉ែត្រគុណ៥០ម៉ែត្រ ជូនប្រជាពលរដ្ឋក្នុងមួយគ្រួសារ ដែលដីបម្រុងនេះ មានទីតាំងស្ថិតនៅភូមិដងផ្លឹត ជាប់របងវត្តដងផ្លឹត ជិតសាលារៀន មានផ្លូវក្រាសក្រួសក្រហម និងអណ្តូងទឺកស្អាត។
ប្រជាពរលដ្ឋទាំង៧គ្រួសារដែលទទួលបានដីដំណាក់កាលទី១មាន៖ ១. ហ៊ឹម យ៉ាន ទទួលបានឡូតិ៍លេខ ០១ , ២. កុច ណុំ ទទួលបានឡូតិ៍លេខ ០២ , ៣. ផាវ ឈឿម ទទួលបានឡូតិ៍លេខ ០៣ , ៤. នូ រ៉ា ទទួលបានឡូតិ៍លេខ ០៤ , ៥. ប៊ុន ខាន ទទួលបានឡូតិ៍លេខ ០៥ , ៦. ផុន សាវុន ទទួលបានឡូតិ៍លេខ ០៦ , ៧. ជាង ស៊ីម ទទួលបានឡូតិ៍លេខ ០៧
សូមបញ្ជាក់ថា ប្រជាពលរដ្ឋដែលបានតាំងទីនៅខុសច្បាប់ក្នុងឧទ្យានមានចំនួន ៣១គ្រួសារ។ គណៈកម្មការចម្រុះថ្នាក់ខេត្ត ថ្នាក់ស្រុក ថ្នាក់ឃុំ និងឧទ្យាន នឹងបន្តពន្លឿន នីតិវិធី ដើម្បីផ្ទេរប្រជាពលរដ្ឋដែលនៅសល់ទាំង ២៣គ្រួសារ នៅដំណាក់កាលបន្ទាប់ទៀត។
លោកបណ្ឌិត សុខ ទូច បានថ្លែងថា ខ្ញុំពិតជាអស់កម្លាំងខ្លាំងណាស់ ក្រោយពីបានដើរល្បាតនៅជ្រុងម្ខាងនៃឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ត្រូវបានជនល្មើសកាប់បំផ្លាញព្រៃឈើអស់៣០០ដើម ដែលអ្នកកាប់បំផ្លាញនេះបានដឹងថា ខ្ញុំមិនបានធ្វើការល្បាតរយៈពេលប្រមាណជិត១ខែ ដោយសារមានធុរៈមមាញឹកខ្លាំង។ អ្នកដែលកាប់បំផ្លាញទាំងនេះ គឺជាអ្នកដែលទើបតែបានរស់នៅក្នុងឧទ្យាននេះ នៅក្រោយព្រះមហាក្សត្រ ឡាយព្រះហស្តលេខាលើព្រះរាជក្រឹត្យ ស្ដីពី ការបង្កើតឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប និងដាក់ឧទ្យាននេះទៅជាឧទ្យានសម្រាប់ធ្វើការអភិរក្ស។ ក្រុមការងារបានចុះទៅត្រួតពិនិត្យផ្ទះរបស់ប្រជាពលរដ្ឋទាំង៣១គ្រួសារ ដែលរស់នៅក្នុងឧទ្យាននេះចំនួន១៥ខ្នង និងបានរកឃើញថា នៅក្នុងផ្ទះទាំង១៥ខ្នងនេះ សុទ្ធសឹងតែមានឈើដែលត្រូវបានកាប់បំផ្លាញពីឧទ្យាន។ ដោយមានកិច្ចសហការពីរដ្ឋបាលខេត្តព្រះវិហារ ឯកឧត្ដមអភិបាលខេត្តព្រះវិហារ បានចាត់តាំងអភិបាលរងខេត្តមួយរូប ដើម្បីដាក់ចេញនូវចំណាត់ការ និងដោះស្រាយបញ្ហាជូនដល់ប្រជាពលរដ្ឋទាំង៣១គ្រួសារនេះ ដោយអាជ្ញាធរខេត្តបានសម្រេចផ្ដល់ជូននូវដីដែលមានទំហំ១៥០០ម៉ែត្រក្រឡា (ទទឹងប្រវែង៣០ម៉ែត្រ បណ្ដោយប្រវែង៥០ម៉ែត្រ) ព្រមទាំងមានហេដ្ឋារចនាសម្ព័ន្ធគ្រប់គ្រាន់ដូចជា សាលារៀន វត្តអារ៉ាម ភូមិ និងអណ្ដូងទឹក ដោយនៅពេលដែលពួកគាត់តាំងទីលំនៅក្នុងឧទ្យាននេះ ពួកគាត់ពុំទទួលបានហេដ្ឋារចនាសម្ព័ន្ធទាំងអស់នេះឡើយ។
អាស្រ័យហេតុនេះ ខ្ញុំសូមអំពាវនាវដល់អាជ្ញាធរដែលមានសមត្ថកិច្ច មេត្តាជួយពន្លឿនការចាត់វិធានការ និងដំណោះស្រាយជូនដល់ប្រជាពលរដ្ឋទាំង៣១គ្រួសារនេះ ឱ្យបានកាន់តែឆាប់រហ័ស៕ រក្សាសិទ្ធិដោយ៖បញ្ញាស័ក្តិ
