ភ្នំពេញៈ សម្តេចនាយករដ្ឋមន្ត្រី ហ៊ុន សែន បានកោតសរសើរចំពោះចំណាត់ការរបស់អភិបាលខេត្តកែប ដែលបានចុះរុះរើរបងថ្ម និងទ្វារដែក បិទផ្លូវប្រជាពលរដ្ឋធ្លាប់ធ្វើដំណើរឆ្លងកាត់នៅតំបន់ស្រែអំបិល ស្ថិតនៅក្នុងភូមិដំណាក់ចំបក់ សង្កាត់អូរក្រសារ ក្រុងកែប កាលពីថ្ងៃទី១៥ ខែមករា ឆ្នាំ២០២១។ ការកោតសរសើរនេះ បានធ្វើឡើងនៅក្នុងខមមិនហ្វេសប៊ុនរបស់លោកសោម ពិសិដ្ឋ អភិបាលខេត្តកែប ដែលបានដឹកនាំគណៈបញ្ជាការឯកភាពរដ្ឋបាលក្រុងកែប ចុះទៅរុះរើរបងថ្ម និងទ្វារដែកដែលភាគីម្ខាងធ្វើបិតផ្លូវមិនឲ្យប្រជាពលរដ្ឋធ្វើដំណើរ។
នៅក្នុងខមមិនរបស់សម្តេចនាយករដ្ឋមន្ត្រី ហ៊ុន សែន បានកោតសរសើររចំពោះចំណាត់ការរបស់អភិបាលខេត្តកែប ដើម្បីផលប្រយោជន៍រួមរបស់ប្រជាពលរដ្ឋ។
សម្តេចតេជោ ហ៊ុន សែន បានខមមិនថា “តាមហេតុការណ៍ដែលបានកើតឡើងកន្លងមកនេះ អាជ្ញាធរគួរតែរើរបងនេះចោល តាំងពីរបងនេះចាប់ផ្តើមធ្វើមកម្ល៉េះ ហើយអ្នកធ្វើរបងបិទផ្លូវសាធារណៈគួរតែត្រូវតែអប់រំ ឬវិធានការរដ្ឋបាលតាំងពីដំបូង។ មិនត្រូវទុកឲ្យបុគ្គលម្នាក់ ឬពីរនាក់ បំផ្លាញផលប្រយោជន៍របស់ប្រជាជនច្រើននាក់នោះឡើយ។ ថ្ងៃក្រោយមិនត្រូវឲ្យមានរឿងបែបនេះ កើតឡើងទៀតទេ មិនត្រឹមតខេត្តកែបប៉ុណ្ណោះទេ គឺត្រូវធ្វើនៅគ្រប់ខេត្តទាំងអស់”។
លោកសោម ពិសិដ្ឋ អភិបាលខេត្តកែប បានឲ្យដឹងថា កាលពីថ្ងៃទី១៥ ខែមករា ឆ្នាំ២០២១ គណៈបញ្ជាការឯកភាពរដ្ឋបាលក្រុង សហការជាមួយស្នងការដ្ឋាននគរបាល និងបញ្ជាការដ្ឋានអាវុធហត្ថខេត្ត អាជ្ញាធរមូលដ្ឋានពាក់ព័ន្ធ ចុះរុះរើរបងថ្មនិងទ្វារដែក ដែលបានសាងសង់គ្មានច្បាប់អនុញ្ញាតបិទផ្លូវប្រជាពលរដ្ឋធ្លាប់ធ្វើដំណើរឆ្លងកាត់នៅតំបន់ស្រែអំបិល ហើយកំពុងមានទំនាស់ជាប់បណ្ដឹង មានទីតាំងស្ថិតនៅក្នុងភូមិដំណាក់ចំបក់ សង្កាត់អូរក្រសារ ក្រុងកែប។
លោកអភិបាលខេត្តបានបញ្ជាក់ថា ការចុះរុះរើនេះ គឺដើម្បីរក្សាស្ថានភាពដើម និងបើកផ្លូវសាធារណៈជូនដល់ប្រជាពលរដ្ឋ មហាជនសម្រាប់ប្រើប្រាស់ជាផលប្រយោជន៍សាធារណៈ។
ជាមួយគ្នានេះ អភិបាលខេត្តកែប បានអំពាវនាវដល់សាធារណជនទូទៅ កុំប្រព្រឹត្តនិងយកគំរូតាមករណីការឆ្លៀតឱកាសបែបនេះ ដែលមើលឃើញតែផលប្រយោជន៍ផ្ទាល់ខ្លួន ហើយធ្វើឲ្យប៉ះពាល់យ៉ាងធ្ងន់ធ្ងរដល់ផលប្រយោជន៍សាធារណៈ ។
ក្នុងករណីនេះមានការអបអរសាទរពីសំណាក់ប្រជាពលរដ្ឋ ដែលពួកគាត់ធ្លាប់អាស្រ័យផលលើផ្លូវនេះ ហើយពួកគាត់គាំទ្រចំណាត់ការរបស់អាជ្ញាធរ និងគោរពថ្លែងអំណរគុណដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដឹកនាំប្រទេសឲ្យមានសន្តិភាព នៅមូលដ្ឋានមានការរីកចម្រើនគ្រប់ទីកន្លែង និងសូមគោរពជូនពរសម្តេចតេជោមានសុខភាពល្អ ដើម្បីបន្តដឹកនាំនាវាកម្ពុជាឲ្យមានការអភិវឌ្ឍរីកចម្រើនជាបន្តទៀត ៕រក្សាសិទ្ធិដោយ៖ចេស្តារ