ស្ទឹងត្រែងៈ អ្នកស្រុកជាច្រើនគ្រួសារដែលមានផ្ទះសម្បែង តូបលក់ដូរ នៅតាមមាត់ច្រាំងទន្លេ ទីរួមស្រុកសៀមប៉ាង ភាគច្រើនមិនទាន់បានរុះរើផ្លាស់ប្ដូរទីលំនៅទៅកាន់កន្លែងថ្មីនៅឡើយទេ។ ថែមទាំងបានដាក់សំណើជំទាស់ ទៅនឹងគម្រោងផ្លាស់ប្ដូរលំនៅឋាន របស់រដ្ឋបាលស្រុកសៀមប៉ាងទៀតផង។
នៅថ្ងៃទី ១៥ ខែមករាឆ្នាំ ២០២១ អ្នកយកព័ត៌មានបានជួបសម្ភាសន៍ ជាមួយពលរដ្ឋដែលមានទីលំនៅមាត់ច្រាំងទន្លេស្រុកសៀមប៉ាង បានប្រាប់ឲ្យដឹងថា ពួកគាត់គាំទ្រចំពោះការអភិវឌ្ឍ ឱ្យមានការរុះរើលំនៅឋានចេញពីមាត់ច្រាំងទន្លេ។ តែគម្រោងរើលំនៅឋានទៅកាន់កន្លែងថ្មីនោះធ្វើឱ្យពួកគាត់មិនសប្បាយចិត្តទាល់តែសោះ ដោយលើកហេតុផលថាមិនទាន់ទទួលបានបញ្ជីឈ្មោះ កម្មសិទ្ធិដីសម្រាប់ផ្លាស់ប្ដូរលំនៅឋានថ្មី។ ម្យ៉ាងទៀតទីតាំងថ្មីនៅឆ្ងាយពីមាត់ទន្លេសេកុង ថែមទាំងគ្មានប្រព័ន្ធទឹកភ្លើង សម្រាប់ប្រើប្រាស់ក្នុងជីវភាពប្រចាំថ្ងៃទៀតផង។
អ្នកស្រុកជាច្រើនគ្រួសារបានជំទាស់ផ្តិតមេដៃ ទៅវ៉ាស្នើសុំទៅអាជ្ញាធរខេត្ត ឲ្យមានដំណោះស្រាយចំពោះគម្រោងផ្លាស់ប្ដូរលំនៅឋានថ្មី របស់រដ្ឋបាលស្រុកសៀមប៉ាង។
អ្នកស្រុកបានប្រាប់ឲ្យដឹងទៀតថា កន្លងទៅថ្មីៗនេះ មានការរុះរើផ្ទះមួយចំនួនមែន។ អ្នកយល់ព្រមរុះរើផ្ទះចាកចេញពីមាត់ច្រាំងទន្លេភាគច្រើន គឺជាអ្នកមានផ្ទះនៅម្ខាងផ្លូវស្រាប់រួចទៅហើយ។ រីឯអ្នកមិនទាន់ចាកចេញ គឺពួកគាត់មិនទាន់បានត្រៀមខ្លួនមានដីធ្លីផ្ទះសម្បែងជាមុន។
ដោយលើកហេតុផលរិះគន់ទៅលើរដ្ឋបាលស្រុកថា ការបែងចែកដីធ្លីមិនច្បាស់លាស់ ឲ្យពួកគាត់ទៅរស់នៅកន្លែងឆ្ងាយពីប្រភពទឹកប្រើប្រាស់គ្មានភ្លើងអគ្គិសនីគ្រប់គ្រាន់។
សូមបញ្ជាក់ថា អ្នកស្រុកសៀមប៉ាង ជាង ២០០ គ្រួសារ កំពុងរស់នៅតាមជួរមាត់ទន្លេសេកុង ត្រូវបានរដ្ឋបាលស្រុកសៀមប៉ាង មានគម្រោងអភិវឌ្ឍន៍ ទីរួមស្រុកឲ្យមានសោភ័ណភាព សំដៅទាក់ទាញអ្នកទេសចរ ។
អ្នកស្រុកដែលយល់ព្រមរើផ្ទះរបស់ខ្លួនចេញបានប្រាប់ថា មាត់ទន្លសេកុងនេះ នៅខែវស្សាម្តងៗ ទឹកទន្លេឡើងមកខ្លាំង និងហូរច្រោះ បាក់ដីបង្កឲ្យកើតមានហានិភ័យ និងរងផលប៉ះពាល់ដល់ផ្ទះសម្បែង ។
លោក ផាន់ យុត អភិបាលស្រុកសៀមប៉ាង ព្យាយាមមិនឆ្លើយតបជាមួយអ្នកសារព័ត៌មាន ដោយលើកហេតុផលថា ជាប់ប្រជុំកាលពីល្ងាចថ្ងៃទី ១៥ ខែមករាឆ្នាំ ២០២១។
ក៏ប៉ុន្តែលោក សំ ប៊ុនធិន អភិបាលរងស្រុកសៀមប៉ាង ធ្លាប់បាននិយាយថាៈ បញ្ហាប្រឈមពិតជាបង្ក ការគ្រោះថ្នាក់ខ្លាំងណាស់ដល់ ប្រជាពលរដ្ឋដែលអាស្រ័យលំនៅដ្ឋាន នៅតាមជួរមាត់ទន្លេ ។ នៅពេលដែលប្រជាពលរដ្ឋ និងបងប្អូនអាជីវករព្រមផ្លាស់ប្តូរលំនៅ ឋានហើយនោះ អាជ្ញាធរស្រុកនឹងរៀបចំទីតាំងតាមជួរមាត់ទន្លេសេកុងនេះ ឲ្យប្រែក្លាយទៅជាសួនច្បារ កន្លែងអង្គុយលំហែ កន្លែងហាត់ប្រាណ ជាដើម ដើម្បីឲ្យមានសោភ័ណភាពស្អាត និងលើកមុខមាត់របស់ស្រុក ក៏ដូចជាទាក់ទាញអ្នកទេសចរផងដែរ ។
ការផ្លាស់ប្តូរលំនៅឋានចំពោះប្រជាពលរដ្ឋ និងអាជីវករដែលមាន លំនៅដ្ឋានតាមជួរមាត់ទន្លេសេកុងនេះ គឺក្រុមការងារបានដោះស្រាយផលប៉ះពាល់ ដោយបានស្រង់បញ្ជីឈ្មោះរួចរាល់ ហើយនោះអាជ្ញាធរស្រុកនឹងផ្តល់ដីសម្បទានសង្គមកិច្ច ក្នុងមួយគ្រួសារទទួលបានក្បាលដីស្មើនឹង ២៥ ម៉ែត្រ ជម្រៅ ៤៥ ម៉ែត្រ សម្រាប់សាងសង់លំនៅដ្ឋាន និងមានរៀបចំទីផ្សារឲ្យលក់ដូរត្រឹមត្រូវ៕ រក្សាសិទ្ធិដោយៈ សំណាង