ភ្នំពេញ៖ បន្ទាប់ពីអាក់ខានដំណើរការជើងហោះហើរក្នុងតំបន់ ដោយសារការរីករាលដាលនៃជំងឺឆ្លង កូវីដ១៩ កាលពីអំឡុងឆ្នាំ២០២០កន្លងនេះ អាជ្ញាធរខេត្តសៀមរាប គ្រោងនឹងដាក់សំណើទៅអាកាសចរណ៍ស៊ីវិល ដើម្បីបើកឱ្យមានជើងហោះហើរ ក្នុងតំបន់ឡើងវិញ ក្រោយពេលស្ថានភាពប្រឈមនិងជំងឺកូវីដ១៩ ត្រូវបានថមថយ។
អភិបាលខេត្តសៀមរាប ឯកឧត្តម ទៀ សីហា បានឱ្យដឹងថា រដ្ឋបាលខេត្ត គ្រោងនឹងស្នើសុំអាកាសចរណ៍ស៊ីវិល ដើម្បីបើកដំណើរការជើងហោះហើរទូលាយឡើងវិញ បន្ទាប់ពីស្ងប់ស្ងាត់មួយរយៈពេល ដោយសារការឆ្លងរាលដាលជាសកល នៃជំងឺកូវីដ-១៩ ដោយឯកឧត្តមរំពឹងថា ព្រលានយន្តហោះខេត្តសៀមរាប អាចនឹងចាប់ផ្តើមដំណើរការនាចុងឆ្នាំ២០២១ ឬដើម ឆ្នាំ២០២២ខាងមុខ។
ឯកឧត្តម ជឿជាក់ថា កំណើនអ្នកដំណើរអ្នកដំណើរតាមផ្លូវអាកាសអាចមានសន្ទុះឡើងវិញ នៅចុងឆ្នាំ២០២១ ឬ២០២២នេះ បន្ទាប់ពីមានការស្នើសុំទៅអាកាសចរណ៍ស៊ីវិល ក្នុងការបើកជើងហោះហើរឡើងវិញ។
អាកាសយានដ្ឋានអន្តរជាតិខេត្តសៀមរាប គឺជាព្រលានយន្តយោះ លំដាប់លេខ២នៅកម្ពុជា ដែលកាលមិនទាន់ មានករណីឆ្លងជំងឺកូវីដ១៩ សៀមរាបជាខេត្តដែលមានសក្តានុពលលើវិស័យទេសចរណ៍យ៉ាងខ្លាំង រហូតដល់មានភ្ញៀវទេសចរជាតិ និងអន្តរជាតិ ជាច្រើននាក់បានចូលទៅកម្សាន្ត និងទស្សនាខេត្តទេសចរណ៍វប្បធម៍មួយនេះយ៉ាងច្រើនកោះករ។
កាលពីពុំទាន់មានករណីឆ្លងកូវីដ១៩ ពោលគឺគិតត្រឹមឆ្នាំ២០១៩ រដ្ឋលេខាធិការដ្ឋានអាកាសចរស៊ីវិលបានចេញអនុញ្ញាតការហោះហើរជាប្រក្រតី (IATA Summer Season) ជូនក្រុមហ៊ុនអាកាសចរណ៍ក្នុង និងក្រៅប្រទេសបានចំនួន៤៧ក្រុមហ៊ុន ក្នុងនោះ ក្រុមហ៊ុនក្នុងស្រុកមានចំនួន ៦ក្រុមហ៊ុន។
សព្វថ្ងៃនេះ ព្រលានយន្ដហោះអន្ដរជាតិកម្ពុជា ដែលដាក់ឲ្យដំណើរការ មានចំនួន ៣ ធំៗ មាននៅក្នុង រាជធានីភ្នំពេញ ខេត្ដសៀមរាប និងក្រុងព្រះសីហនុ។
បើយោងតាមរដ្ឋលេខាធិការដ្ឋានអាកាសចរស៊ីវិល ទុនវិនិយោគ ក្នុងវិស័យអាកាសយានដ្ឋាន និងពង្រឹងដែនអាកាសនៅកម្ពុជាឆ្នាំ ២០១៥-២០២៣ មានទុនវិនិយោគសរុបប្រមាណជា ៣៥០៦ លានដុល្លារ ក្នុងនោះ ទុនវិនិយោគបន្ថែមរបស់ក្រុមហ៊ុន SCA លើអាកាសយានដ្ឋានអន្តរជាតិទាំង៣ ភ្នំពេញ សៀមរាប និងខេត្តព្រះសីហនុ មានប្រមាណ ៦៨៦លានដុល្លារ៕
រក្សាសិទ្ធិដោយ៖CEN
