ភ្នំពេញ៖ អ្នកជំនាញក្នុងវិស័យផ្សារមូលបត្រកម្ពុជា បានអះអាងថា នៅឆ្នាំ២០២០ វិស័យផ្សារមូលបត្រកម្ពុជា នៅតែមានកំណើនល្អ បើទោះបីមានជំងឺកូវីដ១៩ ក៏ដោយ។
អ្នកជំនាញ បានឱ្យដឹងថា បើទោះបីជានៅឆ្នាំ២០២០ មានវិបតិ្តដោយសារជំងឺកូវីដ-១៩ ប៉ុន្ដែ វាជាឆ្នាំមួយល្អ សម្រាប់វិស័យមូលបត្រកម្ពុជា ព្រោះថាចំនួននៃ ការបោះផ្សាយមូលបត្រ និងក្រុមហ៊ុន ចុះបញ្ជីមានការកើនឡើងជាងឆ្នាំមុន។ ក្រុមហ៊ុន ដែលបានចុះបញ្ជីថ្មី នៅឆ្នាំ២០២០ ក្នុងផ្សារមូលបត្រកម្ពុជា បាន ប្រមូលចំណូលពីទីផ្សារដល់ទៅជាង ៩០លានដុល្លារ។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជា CSX បានឱ្យដឹងថា ឆ្នាំ២០២០ បើទោះបីជាមាន វិបត្តិកូវីដ-១៩ មករំខាន ក៏ទីផ្សារមូលបត្រកម្ពុជានៅតែទទួលបានក្រុមហ៊ុនចុះបញ្ជីរហូតដល់ ៥ ក្រុមហ៊ុនឯណោះ។ ឯកឧត្តម បានគូសបញ្ជាក់ថា នៅឆ្នាំ២០២០ បើគិតពីទំហំជួញដូរជាមធ្យមប្រចាំថ្ងៃ គឺមានប្រមាណជិត ១៤ម៉ឺនដុល្លារ ប៉ុន្តែតួលេខនេះ មានការធ្លាក់ចុះបន្តិច បើប្រៀបធៀបនឹង ឆ្នាំ២០១៩ ដែលមាន ដល់ទៅប្រមាណ ១៥ម៉ឺនដុល្លារ។ ឯកឧត្តមបានសង្កត់ធ្ងន់ថា បើគ្មានវត្តមានក្រុមហ៊ុនទាំង៥នេះទេ វិស័យផ្សារមូលបត្រកម្ពុជា នៅឆ្នាំ២០២០ អាចនឹងត្រូវជួបបញ្ហាប្រឈមខ្លាំង។
គួរបញ្ជាក់ថា បើគិតត្រឹមដំណាច់ឆ្នាំ ២០២០ ចំនួនក្រុមហ៊ុនដែលបានបោះផ្សាយលក់មូលបត្រ កម្មសិទ្ធិ មានចំនួន ៧ និងប្រមូលដើមទុនបានប្រមាណ ១០១លាន ដុល្លារ ខណៈក្រុមហ៊ុន បោះផ្សាយលក់មូលបត្រ បំណុលមានចំនួន ៦ និងប្រមូលដើមទុនបាន ១៤៣លាន ដុល្លារពីទីផ្សារមូលបត្រកម្ពុជា៕
រក្សាសិទ្ធិដោយ៖CEN
