ភ្នំពេញ ៖ លោកស៊ាង ថៃ រដ្ឋលេខាធិការក្រសួងពាណិជ្ជកម្ម នៅព្រឹកថ្ងៃទី១៥ ខែមករា ឆ្នាំ២០២០ បានធ្វើជាគណៈអធិបតីក្នុងកិច្ចប្រជុំលើកទី៧ ដើម្បីពិនិត្យមើលវឌ្ឍនភាព នៃការរៀបចំយុទ្ធសាស្ត្រពាណិជ្ជកម្ម ដើម្បីទាញយកប្រយោជន៍ជាអតិបរមាពីកិច្ចព្រមព្រៀងពាណិជ្ជកម្មសេរី (FTA)។
លោក រដ្ឋលេខាធិការបានមានប្រសាសន៍ថា ដោយផ្អែកតាមអនុសាសន៍របស់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានណែនាំឱ្យក្រុមការងារសិក្សាស្រាវជ្រាវលើតារាង ម៉ាទ្រិច (Matrix) ដោយមានរាយមុខទំនិញសក្តានុពលពី ៥០មុខទៅជា ៦៥ មុខទំនិញ ដោយត្រូវសិក្សាលើរបាំងបច្ចេកទេស របាំងពន្ធគយ ភាពអនុគ្រោះពន្ធនានា ដែលប្រទេសចិនផ្តល់ជូនកម្ពុជា ដើម្បីជំរុញការនាំចេញទៅប្រទេសចិនឱ្យបានជាអតិបរមា។ ការសិក្សាលើទំនិញទាំង ៦៥មុខនេះ ដោយផ្អែកលើឯកសារគោល ដែលបានដក ស្រង់ចេញពីឯកសារគោលនយោបាយពាណិជ្ជកម្ម និងពីក្រសួងកសិកម្ម រុក្ខាប្រមាញ់ និងនេសាទ ដែលមានមូល ដ្ឋានច្បាស់លាស់ និងមានមូលដ្ឋានសម្រាប់ធ្វើការនាំចេញ។
ជាមួយគ្នានេះដែរ លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មក៏បានស្នើឲ្យក្រុមការងារលេខាធិការដ្ឋានសិក្សាស្រាវជ្រាវបន្ថែមទៀត លើទំនិញគោល១មុខដែលអាចធ្វើការ កែច្នៃទៅជាទំនិញជាច្រើនមុខ(ទំនិញដេរីវ៉េ)តាមរយៈផលិតកម្ម ការកែច្នៃបង្កើតតម្លៃបន្ថែម ដោយត្រូវសិក្សាអំពីលេខបន្ទាត់ពន្ធគយ (HS code) របស់ទំនិញដេរីវ៉េទាំងនោះដែលអាចទទួលបានភាពអនុគ្រោះក្នុងការនាំចេញទៅកាន់ប្រទេសចិន ឯកឧត្តមបានផ្តល់អនុសាសន៍ឱ្យក្រុមការងារពិនិត្យការសិក្សាស្រាវជ្រាវលើទំនិញសំលៀកបំពាក់ដែលផលិតពីរោមសត្វសម្រាប់ធ្វើការនាំចេញ ទៅកាន់ប្រទេសចិន។
ជាលទ្ធផល អង្គរប្រជុំបានឯកភាពដាក់របៀបវារៈលើការសិក្សាលើតារាង ម៉ាទ្រិច (Matrix) ដោយមានរាយមុខទំនិញសក្តានុពលទាំង ៦៥ ទៅក្នុងកិច្ចប្រជុំលើកក្រោយទៀត និងបានឯកភាពគ្នាត្រូវបញ្ចប់តារាងម៉ាទ្រិចទំនិញទាំង ៦៥ មុខនោះសម្រាប់ទំនិញនាំចេញទៅកាន់ទីផ្សារចិនដំណាច់ខែមករាឆ្នាំ ២០២១នេះ។
សូមបញ្ជាក់ថា ឯកសារយុទ្ធសាស្ត្រពាណិជ្ជកម្មដើម្បីទាញយកប្រយោជន៍ជាអតិបរមាពីកិច្ចព្រមព្រៀងពាណិជ្ជកម្មសេរី (FTA) ដើម្បីជំរុញការនាំចេញទៅប្រទេសចិនឱ្យបានជាអតិបរមា គឺជាឯកសាររស់ ដែលនឹងត្រូវធ្វើការសិក្សាស្រាវជ្រាវលើមុខទំនិញសក្តានុពល ជាបន្តបន្ទាប់ទៀត និងត្រូវពង្រីកការសិក្សាស្រាវជ្រាវឯកសារនេះជាមួយបណ្តាប្រទេសដែលកម្ពុជាមានកិច្ចព្រមព្រៀងពាណិជ្ជកម្មសេរី(FTA) ទាំងថ្នាក់តំបន់ និងទ្វេភាគី ដើម្បីជំរុញការនាំចេញឱ្យបានជាអតិបរមាទៅតាមបណ្តាប្រទេសជាសមាជិកនៃកិច្ចព្រមព្រៀងពាណិជ្ជកម្មសេរីនីមួយៗ៕
រក្សាសិទ្ធិដោយ៖CEN
