ភ្នំពេញ៖ វៀតណាម ជាប្រទេសគេស្គាល់ថា ផលិតអង្ករស បានបែបទិសដៅមកផលិតអង្ករក្រអូប ខណៈដែលប្រទេសកម្ពុជា មានកេរ្តិ៍ឈ្មោះល្អក្នុងទីផ្សារអង្ករក្រអូបនេះ។
ទន្ទឹមនិងនេះដែរ ការប្តូរមកផលិតអង្ករក្រអូបរបស់វៀតណាមនេះ អ្នកជំនាញក្នុងវិស័យស្រូវអង្ករកម្ពុជា បានអំពាវនាវដល់អ្នករកស៊ីស្រូវអង្ករ ត្រូវធ្វើយ៉ាងណារក្សាកេរ្តិ៍ឈ្មោះ និងទីផ្សារអង្ករក្រអូបរបស់ខ្មែរ ខណៈដែលកម្ពុជាកំពុងឈាន ដល់ដំណាក់កាលប្រកួតប្រជែង ជាមួយប្រទេសវៀតណាម លើការនាំចេញអង្ករក្រអូប។
កម្ពុជាបានក្លាយជាប្រទេសមួយ ក្នុងចំណោមប្រទេស៣ ដែលនាំចេញអង្ករមានភាពវិជ្ជមាន ក្នុងឆ្នាំ២០២០ ក្នុងនោះអង្ករក្រអូបបានឈរលំដាប់ថ្នាក់ល្អ ក្នុងការនាំចេញ។ ការប្រែប្រួលគួរឲ្យកត់សម្គាល់ ដែលវៀតណាម ជាប្រទេស ផលិតអង្ករស បែបជាប្តូរមកផលិតអង្ករក្រអូបវិញ ហើយធ្វើឱ្យមានការខ្វះខាតអង្ករស ដោយត្រូវទិញអង្ករពីប្រទេសឥណ្ឌា និងសម្រុកទិញស្រូវពីកម្ពុជា។
ការផ្លាស់ប្តូរនេះ បានបង្កើតក្តីបារម្ភសម្រាប់កម្ពុជាផងដែរ ដែលទាមទារឲ្យអ្នករកស៊ីក្នុងវិស័យស្រូវអង្ករត្រូវគិតគូរខ្លាំងជាងមុន លើការងារថែរក្សាកេរ្តិ៍ឈ្មោះអង្ករក្រអូបរបស់កម្ពុជា។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា បានឱ្យដឹងថា ការផ្លាស់ប្ដូររបស់វៀតណាម ក៏ជាក្ដីព្រួយបារម្ភសម្រាប់កម្ពុជា ព្រោះការនាំចេញអង្ករក្រអូបរបស់វៀតណាម នាំចេញក្នុងតម្លៃចន្លោះពី៥៥០-៦០០ដុល្លារ ប៉ុន្ដែតម្លៃអង្ករក្រអូបរបស់កម្ពុជាវិញ នាំចេញមានតម្លៃមិនក្រោម៧០០ដុល្លារនោះឡើយ។ ជាក្ដីបារម្ភរបស់កម្ពុជាត្រង់ថា វៀតណាមអាចទាញយកទីផ្សារកម្ពុជា តាមរយៈតម្លៃនេះ។
ប៉ុន្តែលោកឧកញ៉ាគូសបញ្ជាក់ថា ចំណុចពិសេសរបស់អង្ករក្រអូបកម្ពុជា លើសវៀតណាម គឺរសជាតិអង្ករក្រអូប ដែលមានរសជាតិឆ្ងាញ់ រូបរាងល្អ និងមានគុណភាពខ្ពស់ ក្នុងការរក្សាទុកបានយូរ ប៉ុន្ដែចំពោះអង្ករក្រអូបវៀតណាមវិញ មានរសជាតិអាចត្រឹមរយៈពេលត្រឹម១ខែប៉ុណ្ណោះ។ ដូចនេះ រស់ជាតិ អង្ករកម្ពុជា ឈរលំដាប់ថ្នាក់ល្អជាងវៀតណាម ប៉ុន្ដែតម្លៃកម្ពុជា ខ្ពស់ជាងវៀតណាម។
លោកឧកញ៉ាបន្ថែមថា កេរ្តិ៍ឈ្មោះអង្កររបស់កម្ពុជា គឺជាប្រទេសគោរពនូវបរិស្ថាន ដោយដាំដុះមិនប្រើសារជាតិដែលបំផ្លាញបរិស្ថាន ការប្រើប្រាស់ថ្នាំពុលមានការគ្រប់គ្រងបានល្អ ការប្រើប្រាស់ជីគីមីក៏គ្រប់គ្រងបានល្អប្រសើរ និងក្លាយជាប្រទេសមួយដែលគេទទួលស្គាល់ថា ជាប្រទេសផលិតអង្ករ ដែលមានសុវត្ថិភាព នេះជាចំណុចមួយទៀតដែលកម្ពុជា អាចទាញយកទីផ្សារឈរជើងបាន ត្បិតថាវៀតណាមផលិតអង្ករក្រអូបដូចកម្ពុជាក៏ពិតមែន ប៉ុន្ដែដំណើរការនៃការដាំដុះ ការផលិតមានភាពខុសគ្នា និងរសជាតិខុសគ្នា។ ដូច្នេះកម្ពុជានៅតែអាចរក្សាបានចំណែកទីផ្សារ ក្នុងកម្រិតមធ្យម និងខ្ពស់ ហើយវៀតណាមអាចចាប់យកចំណែកទីផ្សារ ក្នុងកម្រិតមធ្យម និងទាប។
សូមជម្រាបថា នៅឆ្នាំ២០២០ វៀតណាមនាំចេញអង្ករបានជាង ៦លានតោន ខណៈនៅឆ្នាំ២០២០ ប្រទេសកម្ពុជា បាននាំចេញអង្ករជិត ៧០ម៉ឺនតោន ទៅកាន់ទីផ្សារ ៦០ប្រទេស នៅលើពិភពលោក៕
រក្សាសិទ្ធិដោយ៖CEN