ភ្នំពេញ៖ ភាគហ៊ុនតំបន់សេដ្ឋកិច្ចពិសេសភ្នំពេញ (PPSP) ក្នុងថ្ងៃចន្ទម្សិលមិញនេះ បានបន្តកើនជាង៩%ទៀត ដែលធ្វើឱ្យថ្លៃភាគហ៊ុនមួយនេះឡើងដល់ដែនកំណត់ខ្ពស់បំផុតប្រចាំថ្ងៃគឺ ១,៤៨០រៀល ជាមួយនឹងទំហំជួញដូរសរុបប្រមាណ១៦៤លានរៀល។
ភាគហ៊ុនផេសថិក (PEPC) ហ្គ្រេនធ្វីន (GTI) និងកំពង់ផែស្វយ័តព្រះសីហនុ (PAS) ក៏បានកើនឡើង៤០រៀល ១៥០រៀល និង២០០រៀលរៀងគ្នា ដល់ ២,៩៤០រៀល ៣,៥៥០រៀល និង១៤,០០០រៀល។
ផ្ទុយមកវិញ ភាគហ៊ុនកំពង់ផែស្វយ័តក្រុងភ្នំពេញ (PPAP) និងភាគហ៊ុនអេស៊ីលីដា (ABC) បានធ្លាក់ចុះ៦០រៀល និង៨០រៀល មកត្រឹម១១,៦៤០រៀល និង១៦,៧២០រៀល។
ភាគហ៊ុនរដ្ឋាករទឹកស្វយ័តភ្នំពេញ (PWSA) បានរក្សាថ្លៃថេរដដែលត្រឹម៦,១៨០រៀល។ សន្ទស្សន៍ផ្សារមូលបត្រកម្ពុជានាថ្ងៃចន្ទនេះ បានធ្លាក់ចុះបន្តិចមកត្រឹម ៦៣៨,៩១ ពិន្ទុ។ ទំហំជួញដូរភាគហ៊ុនសរុបមានចំនួន ៤៥៣,៦ លានរៀល៕
រក្សាសិទ្ធិដោយ៖CEN
