ភ្នំពេញ៖ អ្នកជំនាញផ្នែកហិរញ្ញវត្ថុនៃក្រុមហ៊ុន IFX Market បានព្យាករណ៍ថា ថ្វីត្បិតតែវ៉ាក់សាំងជំងឺកូវីដ១៩ បានរកឃើញហើយក្តី ប៉ុន្តែតម្លៃមាស នៅឆ្នាំ២០២១នេះ នឹងបន្តកើនឡើងលើសឆ្នាំមុន ដែលបើតាមការប៉ាន់ប្រមាណ នៅដើមឆ្នាំ២០២១នេះ មានអាចនឹងបន្តកើនឡើងដល់ ២៦០០ដុល្លារអាមេរិកក្នុងមួយតំឡឹង។
លោកអួង សោភ័ណ្ណារ័ត្ន អ្នកគ្រប់គ្រងជាន់ខ្ពស់នៃក្រុមហ៊ុន IFX Market បានលើកហេតុផលថា ការបន្តកើនឡើងនេះ ដោយសារការអូសបន្លាយនៃជំងឺកូវីដ១៩ ខណៈនៅពេលថ្មីៗនេះ លោក ចូ ប៉ៃឌិនប្រធានាធិបតីអាមេរិកថ្មី ប្រកាសថា លោកគ្រោងនឹងបញ្ចេញថវិកាជាតិប្រមាណ១.៩ទ្រីលាន ដើម្បីជួយស្តារសេដ្ឋកិច្ចត្រឡប់មកវិញ ដែលកត្តានេះ នឹងជំរុញឱ្យមាសឡើងថ្លៃ ព្រោះនឹងធ្វើឱ្យប្រាក់ដុល្លារអាមេរិក ចុះថោក ដោយសារតែមាស គឺជាវត្ថុធាតុមួយធៀបនឹងលុយដុល្លារអាមេរិក បើសិនលុយដុល្លារអាមេរិកធ្លាក់ចុះ នឹងរុញឱ្យមាសឡើងថ្លៃ។
លោកអួង សោភ័ណ្ណារ័ត្ន បានបន្ថែមថា នៅពេលដែលពិភពលោកប្រកាសរកឃើញវ៉ាក់សាំងការពារជំងឺកូវីដ១៩ បានធ្វើឱ្យតម្លៃមាសនឹងធ្លាក់ចុះតិចតួច។ តែយ៉ាងណាក៏ដោយ ប្រសិនបើសេដ្ឋកិច្ច និងការវិនិយោគអាមេរិកនៅបន្តជាប់គាំង នឹងធ្វើឱ្យមាសបន្តឡើងថ្លៃ។ មួយវិញទៀត ប្រសិនបើកោះតៃវ៉ាន់ប្រកាសខ្លួនឯករាជ្យភ្លាម ក៏នឹងជំរុញឱ្យមាសឡើងថ្លៃផងដែរ។
នៅឆ្នាំ២០២០ គឺជាឆ្នាំដែលមាសឡើងថ្លៃមិនធ្លាប់មានពីមុន ខណៈមុនពេលផ្ទុះជំងឺកូវីដ១៩ តម្លៃមាស នៅត្រឹមមួយអោន១៤០០ដុល្លារ ឬមួយតំឡឹង ១៧០០ដុល្លារប៉ុណ្ណោះ ប៉ុន្តែចាប់តាំងពីផ្ទុះជំងឺកូវីដ១៩ មក តម្លៃមាសបានកើនឡើងរហូតដល់ ២៥០០ក្នុងមួយតំឡឹង៕
រក្សាសិទ្ធិដោយ៖CEN