ភ្នំពេញ៖ នៅព្រឹកថ្ងៃអង្គារ ទី១៩ ខែមករា ឆ្នាំ២០២១ នៅទីស្តីការក្រសួងសេដ្ឋកិច្ច និង ហិរញ្ញវត្ថុ, មូលនិធិគន្ធបុប្ផាកម្ពុជា បានរៀបចំកិច្ចប្រជុំក្រុមប្រឹក្សាបរធនបាលលើកទី៣ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា ដើម្បីពិនិត្យ និងពិភាក្សាលើរបៀបវារៈមួយចំនួនរួមមានប្រតិបត្តិការរបស់មន្ទីរពេទ្យគន្ធបុប្ផា ស្ថានភាពហិរញ្ញវត្ថុរបស់មូលនិធិគន្ធបុប្ផាកម្ពុជា ការអនុវត្តសកម្មភាពរបស់មូលនិធិគន្ធបុប្ផាកម្ពុជា និងការងារពាក់ព័ន្ធមួយចំនួនទៀត។
បើតាមសេចក្តីប្រកាសព័ត៌មាន ស្តីពីលទ្ធផលកិច្ចប្រជុំក្រុមប្រឹក្សាបរធនបាល លើក ទី ៣ នៃមូលនិធិគន្ធបុប្ផាកម្ពុជា
ដើម្បីពិនិត្យ និងពិភាក្សាលើរបៀបវារៈ សំខាន់ៗ ដូចខាងក្រោម ៖
១៖ ប្រតិបត្តិការរបស់មន្ទីពេទ្យគន្ធបុប្ផា និងស្ថានភាពហិរញ្ញវត្ថុ របស់មូលនិធិគន្ធបុប្ផាកម្ពុជា៖
ក្នុងឆ្នាំ២០២០នេះ, មន្ទីរពេទ្យគន្ធបុប្ផាបានទទួលកុមារមកពិគ្រោះ និងព្យាបាលនៅក្នុងផ្នែកពិគ្រោះជំងឺក្រៅ ចំនួន ៦៣៩ ២៦៨ ករណី, ស្ត្រីមានផ្ទៃពោះទទួលបានការពិនិត្យ និងព្យាបាល នៅផ្នែកពិគ្រោះជំងឺក្រៅផ្នែកសម្ភព ចំនួន១៣២ ៤៤៣ ករណី, កុមារបានសម្រាកព្យាបាលក្នុងមន្ទីរពេទ្យចំនួន ១៣៣ ០២៦ នាក់, ជំងឺគ្រុនឈាមធ្ងន់ធ្ងរ ចំនួន ៤ ៤៨៨ នាក់, ជំងឺគ្រុនឈីក ចំនួន ១ ៤៩២ នាក់, និងវះកាត់សរុបចំនួន ២៤ ៨២២ នាក់។
«មូលនិធិគន្ធបុប្ផាកម្ពុជា» បានទទួលវិភាគទានសប្បុរសធម៌ សរុបចំនួនប្រមាណ ៦១ ៩៨១លានរៀល (ប្រមាណជាង១៥លានដុល្លារ) និង ៦ ០០០ ០០០ ដុល្លារអាមេរិក ក្នុងនោះ៖ វិភាគទានពីរាជរដ្ឋាភិបាលចំនួន ៤០ប៊ីលានរៀល, ការកាត់កម្រៃពីសំបុត្រចូលទស្សនាតំបន់រមណីយដ្ឋានអង្គរចំនួន ២លានដុល្លារអាមរិក, វិភាគទានពីកាកបាទក្រហម ចំនួន ១លានដុល្លារអាមេរិក និងថវិកាបរិច្ចាគពីសប្បុរសជនទូទៅចំនួនប្រមាណ ៧ ១៦៣ លានរៀល និង ៣ លានដុល្លារអាមេរិក។
បើប្រៀបធៀបនឹងឆ្នាំ ២០១៩, វិភាគទានទទួលបានក្នុងឆ្នាំ ២០២០ មានការថយចុះប្រមាណ ២០% (ដោយមិនរាប់បញ្ចូលថវិកាគម្រោង H.EQUIP និងការបរិច្ចាគផ្ទាល់នៅមន្ទីរពេទ្យ)។
ថវិកាសប្បុរសធម៌នេះ ត្រូវបានបង្វែរជូនមន្ទីរពេទ្យគន្ធបុប្ផា តាមការស្នើសុំ និងតម្រូវការជាក់ស្តែង ។ បើគិតចាប់ពីថ្ងៃសម្ពោធ រហូតដល់ថ្ងៃទី ៣១ ខែធ្នូ ឆ្នាំ ២០២០, «មូលនិធិគន្ធបុប្ផាកម្ពុជា» បានបង្វែរថវិកាជូនមន្ទីរពេទ្យគន្ធបុប្ផា បានចំនួន ២៤ លានដុល្លារអាមេរិក និង ៨ ប៊ីលានរៀល ក្នុងនោះ សម្រាប់ឆ្នាំ ២០២០ ចំនួន ៤លានដុល្លារអាមេរិក (ថវិកាទទួលបានពីកាកបាទក្រហមកម្ពុជាចំនួន ១ លានដុល្លារអាមេរិក, ថវិកាទទួលបានពីគ្រឹះស្ថានអង្គរក្នុងត្រីមាសទី ៤ ឆ្នាំ ២០១៩ និងត្រីមាសទី ១, ២, និងទី ៣ ឆ្នាំ ២០២០ ចំនួនប្រមាណ ២ លានដុល្លារអាមេរិក, និងថវិកាចូលរួមសាងសង់ និងបំពាក់ឧបករណ៍នៅមន្ទីរពេទ្យជ័យវរ្ម័នទី៧ [មន្ទីរគន្ធបុប្ផា ខេត្តសៀមរាប] ចំនួន១លានដុល្លារអាមេរិក) ។
២៖ ការអនុវត្តសកម្មភាពរបស់មូលនិធិគន្ធបុប្ផាកម្ពុជា៖
ក្នុងរយៈពេល ១២ខែ នៃឆ្នាំ ២០២០ កន្លងទៅនេះ, «មូលនិធិគន្ធបុប្ផាកម្ពុជា» បានអនុវត្តសកម្មភាពសំខាន់ៗ រួមមាន៖ ការកៀរគរ និងទទួលការបិរច្ចាគវិភាគទានសប្បុរសធម៌, ការទំនាក់ទំនងសាធារណៈ និងការផ្សព្វផ្សាយអំពីមន្ទីរពេទ្យ និងមូលនិធិ ។
គិតត្រឹមខែ ធ្នូឆ្នាំ ២០២០, «មូលនិធិគន្ធបុប្ផាកម្ពុជា» សម្រេចបានការងារសំខាន់ៗ ដូចជាបានសហការ និងដាក់ហិបមូលនិធិនៅតាមក្រុមហ៊ុន និងទីតាំងសំខាន់ៗ សរុបចំនួន ១៦៦ ហិប, បានទទួលការផ្តល់វិភាគទានសប្បុរសធម៌ ដោយផ្ទាល់ជាមួយសប្បុរសជនទាំងពីក្រសួង-ស្ថាប័នរដ្ឋ និងឯកជនជាបន្តបន្ទាប់, បានសហការ និងផលិតឃ្លីបវីដេអូខ្លីអំពីមូលនិធិគន្ធបុប្ផាកម្ពុជា និងមន្ទីរពេទ្យគន្ធបុប្ផា ចំនួន ២៤ ឃ្លីប, ទទួលបានការគាំទ្រ និងបរិច្ចាគបណ្តើៗតាមរយៈទំព័រហ្វេសប៊ុកផ្លូវការរបស់មូលនិធិ, បានរៀបចំធ្វើបច្ចុប្បន្នកម្មប្រព័ន្ធគ្រប់គ្រងទិន្នន័យមូលនិធិគន្ធបុប្ផាកម្ពុជា ដែលអាច ទាញយកទិន្នន័យសប្បុរសជន និងបង្កើតលិខិតថ្លែងអំណរគុណជាទម្រង់ឌីជីថល, បាន និងកំពុងរៀបចំធ្វើបច្ចុប្បន្នកម្មគេហទំព័រ មូលនិធិគន្ធបុប្ផាជាមួយ និងការរចនាថ្មី, ក៏ដូចជាបានចេញសេចក្ដីប្រកាសព័ត៌មានប្រចាំខែ និងត្រីមាស ជាសាធារណៈអំពីវឌ្ឍនភាពនៃមូលនិធិគន្ធបុប្ផាកម្ពុជា ដើម្បីបង្ហាញអំពីតម្លាភាព, បាន និងកំពុងសហការជាមួយគ្រឹះស្ថានហិរញ្ញវត្ថុ និងធនាគារ និងក្រុមហ៊ុនផ្សេងៗ សរុបចំនួន ១៣ ស្ថាប័ន ដើម្បីសម្រួលការបរិច្ចាគ ក៏ដូចជាពង្រឹង និងពង្រីកការបរិច្ចាគតាមថ្នាលឌីជីថល ជាដើម ។
ក្រុមប្រឹក្សាបរធនបាល ក៏បានពិនិត្យពិភាក្សា និងអនុម័តលើផែនការសកម្មភាពឆ្នាំ ២០២១ និងបានផ្តល់ការណែនាំឱ្យបន្តការបង្កើត និងពង្រីករចនាសម្ព័ន្ធទ្រទ្រង់មូលនិធិគន្ធបុប្ផាកម្ពុជា នៅតាមបណ្តាខេត្ត និងក្រសួង-ស្ថាប័ន ផងដែរ ។
អគ្គបណ្ឌិតសភាចារ្យ ឧបនាយករដ្ឋមន្ត្រី បានណែនាំឱ្យលេខាធិការដ្ឋាន «មូលនិធិគន្ធបុប្ផាកម្ពុជា» ខិតខំបន្ថែមទៀត ក្នុងការផ្សព្វផ្សាយដល់សាធារណជនឱ្យបានយល់ដឹងអំពីវត្តមាន និងសារៈសំខាន់នៃការបង្កើតមូលនិធិគន្ធបុប្ផាកម្ពុជានេះ ក្នុងគោលដៅកៀរគរវិភាគទានសប្បុរសធម៌ ពីគ្រប់ទិសទីបន្ថែមទៀត ដើម្បីបន្តរួមចំណែកទ្រទ្រង់ដល់ប្រតិបត្តិការ និងនិរន្តរភាពរបស់មន្ទីរពេទ្យគន្ធបុប្ផា និងលើកស្ទួយស្មារតី «ខ្មែរជួយខ្មែរ» ឱ្យបានកាន់តែទូលំទូលាយ៕ រក្សាសិទ្ឌិដោយ៖បញ្ញាស័ក្តិ
