បន្ទាប់ពីមានការកើនឡើងរយៈពេលប៉ុន្មានថ្ងៃជាប់គ្នារាប់ចាប់ពីដើមសប្តាហ៍មុនមក សន្ទស្សន៍ផ្សារមូលបបត្រកម្ពុជាជាថ្មីម្តងទៀត នាថ្ងៃអង្គារនេះបានកើនរហូតដល់៦៤៥,៣៧ពិន្ទុ ដែលតួលេខប្រហាក់ប្រហែលនេះត្រូវបានប្រទះលើកចុងក្រោយនៅចុង២០២០។
កំណើនជាង១%ក្នុងថ្ងៃនេះគឺបណ្តាលមកពីការឡើងថ្លៃភាគហ៊ុនភាគច្រើននៅលើទីផ្សារ។ ភាគហ៊ុនទាំងនោះ រួមមានរដ្ឋាករទឹកស្វយ័តក្រុងភ្នំពេញ (PWSA)កំពង់ផែស្វយ័តក្រុងភ្នំពេញ (PPAP)និងតំបន់សេដ្ឋកិច្ចពិសេសភ្នំពេញ (PPSP) និងភាគហ៊ុនអេស៊ីលីដា (ABC) ដែលបានបិទនៅ៦,២៨០រៀល ១១,៧៦០រៀល ១,៥៩០រៀល និង១៦,៩២០រៀល ដោយមានកំណើនចន្លោះពី ១០០រៀល ដល់២០០រៀល។
ភាគហ៊ុនផេសថិក (PEPC) បានរក្សាថ្លៃថេរដដែលត្រឹម២,៩៤០រៀល។ ផ្ទុយមកវិញ ភាគហ៊ុនកំពង់ផែស្វយ័តព្រះសីហនុ(PAS) និងភាគហ៊ុនហ្គ្រេនធ្វីន (GTI) បានធ្លាក់ចុះ២០រៀល និង១៥០រៀល មកត្រឹម១៣,៩៨០រៀល និង៣,៤០០រៀល។ ទំហំជួញដូរភាគហ៊ុនសរុបមានចំនួន ២៨៩,៤ លានរៀល៕
រក្សាសិទ្ធិដោយ ៖ CEN