ខេត្តត្បូងឃ្មុំ៖ កម្មវិធីទូរស័ព្ទដៃដែលមានឈ្មោះថា Angkor salad app ជាប្រភពចំណេះដឹងលើបច្ចេកទេសដាំដុះបន្លែដ៏ទំនើបមួយ ជាមួយនឹងទិន្នន័យដែលផ្តល់ដោយផ្កាយរណប និងជាកម្មវិធីទំនើបមួយ ជាបច្ចេកវិទ្យាថ្មី សម្រាប់ផ្តល់ព័ត៌មាន ចំណេះដឹងដល់ប្រជាកសិករ អាជីវករ និងអ្នកពាក់ព័ន្ធមួយចំនួន។
តាមរយៈកម្មវិធីនេះ កសិករខេត្តត្បូងឃ្មុំមួយចំនួនកំពុងទទួលបានចំណេះដឹងតាមរយៈការបណ្តុះបណ្តាលដោយមន្ត្រីជំនាញកសិកម្ម ដើម្បីឱ្យបានយល់ដឹងបន្ថែមលើការដាំដុះ និងការថែទាំ ការដាំដុះបន្លែ តាមរយៈគម្រោងទិន្នន័យភូមិសាស្ត្រសម្រាប់កសិកម្ម និងទឹកក្នុងកម្មវិធីទូរស័ព្ទដៃ ដែលមានឈ្មោះថា Angkor salad app។
យោងតាមមន្ត្រីកម្មវិធី Angkor salad appនេះ បានឱ្យដឹងថា កម្មវិធីនេះប្រមូលផ្តុំទៅដោយសេវាកម្មព័ត៌មានពាក់ព័ន្ធទៅនឹងកសិកម្ម ដោយគោលដៅចម្បងគឺ កាត់បន្ថយការប្រើប្រាស់ធន់ធានច្រើនហួសទៅលើការដាំដុះ ដូចជាការប្រើប្រាស់ ទឹក ជី ជាដើម។ ចំណេះដឹងនេះទទួលបានតាមរយៈសិក្ខាសាលាមួយស្តីពីគម្រោងទិន្នន័យភូមិសាស្ត្រ សម្រាប់កសិកម្ម និងទឹក ក្នុងកម្មវិធីទូរស័ព្ទដៃ ដែលធ្វើនៅសាលាខេត្តត្បូងឃ្មុំនារសៀលថ្ងៃទី ១៩ ខែមករា ឆ្នាំ២០២១ ដោយក្រុមហ៊ុនជំនាញកសិកម្ម AGID ។
លោក អ៊ួន ប៊ុណ្ណារិទ្ធ តំណាងកម្មវិធី Angkor salad បានឱ្យដឹងថា កម្មវិធីនេះជាកម្មវិធីទំនើបមួយសម្រាប់ផ្តល់ព័ត៌មាន ក៏ដូចជាចំណេះដឹងដល់ប្រជាកសិករ អាជីវករ និងអ្នកពាក់ព័ន្ធមួយចំនួន ព្រោះវាជាបច្ចេកវិទ្យាថ្មី និងជាប្រភពចំណេះដឹងលើបច្ចេកទេសដាំដុះបន្លែដ៏ទំនើបមួយ ជាមួយទិន្នន័យដែលផ្តល់ដោយផ្កាយរណប។
លោក សេង សីសាក់ តំណាងមន្ទីរកសិកម្មខេត្តត្បូងឃ្មុំបានឱ្យដឹងដែរថា កម្មវិធី Appនេះ ពិតជាមានសារៈសំខាន់ ព្រោះវាជាសាលារៀនដែលអាចផ្តល់ចំណេះដឹងជាច្រើនដល់កសិករក្នុងការដាំដុះ ព្រមទាំងចំណេះដឹងលើការថែទាំ និងស្វែងរកទីផ្សារផងដែរ។
សូមបញ្ជាក់ថា តាមយៈការធ្វើបទបង្ហាញ នៅក្នុងកម្មវិធីសិក្ខាសាលានោះក៏មានការធ្វើបទបង្ហាញពីរបៀបនៃការដោនឡូត និងរបៀបប្រើកម្មវិធី Angkor salad app ដល់ប្រជាពលរដ្ឋដែលចូលរួមផងដែរ ខណៈដែលកសិករទទួលបានការផ្តល់ប្រឹក្សាទៅលើបច្ចេកទេសដាំដុះដំណាំ ការប្រើប្រាស់ប្រព័ន្ធស្រោចស្រព ការប្រើប្រាស់ជីត្រឹមត្រូវតាមប្រភេទដី និងតំបន់ ការគ្រប់គ្រងដំណាំទៅតាមរដូវកាល ការគ្រប់គ្រងកត្តាចង្រៃលើដំណាំ ព្រមទាំងមានទំនាក់ទំនងផ្ទាល់ជាមួយអ្នកពាក់ព័ន្ធផ្សេងៗ ពិសេសអ្នកប្រមូលទិញ៕
រក្សាសិទ្ធិដោយ ៖ CEN