ស្ទឹងត្រែង ៖ គ្រោះថ្នាក់ចរាចរណ៍ដ៏រន្ធត់មួយ រវាងរថយន្តបុកជាមួយម៉ូតូ បណ្ដាលឲ្យក្មេងប្រុសម្នាក់ ស្លាប់នៅនឹងកន្លែងកើតហេតុយ៉ាងអាណោចអាធ័ម។ ហេតុការណ៍នោះបានកើតឡើងនៅលើកំណាត់ផ្លូវលំ មានចម្ងាយពីចំណុចដុងក្រឡប្រមាណជា ១ គីឡូម៉ែត្រផ្លូវចូលស្រុកសៀមប៉ាង ខេត្តស្ទឹងត្រែង វេលាម៉ោងជិត ១២ ថ្ងៃត្រង់ថ្ងៃទី ២ ខែមករា ឆ្នាំ ២០២១។
ប្រភពព័ត៌មានពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ គឺរថយន្តបុកម៉ូតូបណ្ដាលឲ្យអ្នកបើកបរម៉ូតូស្លាប់
នៅនឹងកន្លែង ស្ថិតក្នុងភូមិឬទ្ធីសែនជ័យមួយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។
ប្រភពបានឱ្យដឹងទៀតថា ម៉ូតូដែលជនរងគ្រោះជិះម៉ាកហុងដាឌ្រីម ស៊េរីឆ្នាំ២០២០ ពណ៌ខ្មៅ ផ្លាកលេខ ស្ទឹងត្រែង 1C 3832 ។ រីឯរថយន្តម៉ាកFord RANGER ពណ៌ទឹកប្រាក់ ផ្លាកលេខ ភ្នំពេញ2AX 6766។
បើតាមការពិនិត្យនៅនឹងកន្លែងកើតហេតុថា អ្នកបើកបរម៉ូតូក្នុងទិសដៅបញ្ច្រាសទិសគ្នា នៅលើកំណាត់ផ្លូវលំ។ រថយន្តបានធ្វើដំណើរក្នុងទិសដៅពីស្ទឹងត្រែង ឆ្លងកាត់ដំក្រឡ ឆ្ពោះទៅកាន់ស្រុកសៀមប៉ាង។ អ្នកបើកបរម៉ូតូមានឈ្មោះ សំរិត មាស អាយុ១៥ឆ្នាំ ទីលំនៅ ភូមិណាអូង ឃុំអូរស្វាយ ស្រុកបុរី
អូរស្វាយសែនជ័យ ខេត្តស្ទឹងត្រែង។ អ្នកបើកបររថយន្តមិនស្គាល់អត្តសញ្ញាណ បានរត់គេចខ្លួន ក្រោយពេលមានហេតុការណ៍កើតឡើងភ្លាម។
នៅក្រោយកើតហេតុ សមត្ថកិច្ចបានប្រគល់សពជនរងគ្រោះ ទៅឲ្យក្រុមគ្រួសារ រីឯរថយន្តនិងម៉ូតូ ត្រូវបានយកទៅរក្សាទុកនៅអធិការដ្ឋាននគរបាលស្រុកបុរីអូរស្វាយសែនជ័យ ដើម្បីរង់ចាំការដោះស្រាយតាមផ្លូវច្បាប់៕ រក្សាសិទ្ធិដោយ៖សំណាង
