ភ្នំពេញៈ សមត្ថកិច្ចបានឃាត់ខ្លួនជនជាតិចិនចំនួន ៣នាក់ ដែលពាក់ព័ន្ធនឹងករណីឃាតកម្មបាញ់សម្លាប់ជនជាតិចិន នៅខេត្តព្រះសីហនុ កាលពីព្រឹកថ្ងៃទី២១ ខែមករា ឆ្នាំ២០២១ និងនៅសល់បក្ខពួកមួយចំនួនទៀតសមត្ថកិច្ចកំពុងតែតាមចាប់។
មន្ត្រីជាន់ខ្ពស់អគ្គស្នងការដ្ឋាននគរបាលជាតិ បានប្រាប់សារព័ត៍មាន CEN នៅរសៀលថ្ងៃទី២២ ខែមករា នេះថា សមត្ថកិច្ចបានចាប់ខ្លួនជនសង្ស័យបានចំនួន ៣នាក់ ពាក់ព័ន្ធករណីឃាតកម្មបាញ់សម្លាប់ជនជាតិចិនដូចគ្នា កាលពីព្រឹកថ្ងៃទី២១ ខែមករា ឆ្នាំ២០២១។ ក្រៅពីការឃាត់ខ្លួនសមត្ថកិច្ចបានរកឃើញគ្រឿងញៀនមួយចំនួនផងដែរ និងរថយន្តចំនួនពីរគ្រឿង ដែលធ្វើសកម្មភាពជិះដេញបាញ់ជនរងគ្រោះ និងជិះបិទគូថពីក្រោយ។
ប្រភពដដែលបានបន្តថា នៅក្នុងករណីឃាតកម្មបាញ់សម្លាប់ជនជាតិចិននេះ គឺមាននៅសល់បក្ខពួកមួយចំនួនទៀត ដែលសមត្ថកិច្ចកំពុងតែតាមចាប់ខ្លួន។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានបញ្ជាក់ថា ពិតជាមានការឃាត់ខ្លួនមនុស្សមួយចំនួនប្រាកដមែន ប៉ុន្តែលោកមិនទាន់អាចបញ្ជាក់លម្អិតបាននៅឡើយទេ។
សូមជម្រាបថា ជនរងគ្រោះជាជនជាតិចិន ជិះរថយន្ដមួយគ្រឿង ម៉ាក Rang Rover ពណ៌ខ្មៅ ពាក់ផ្លាកលេខភ្នំពេញ2AL-9459 ត្រូវបានខ្មាន់កាំភ្លើងជិះរថយន្តដេញបាញ់ពីតាមបណ្តោយផ្លូវសណ្ឋារគារឯករាជ្យ ឬសណ្ឋាគារ ៧ជាន់ ស្ថិតនៅភូមិ១ សង្កាត់៣ ក្រុង-ខេត្តព្រះសីហនុ។ ជនរងគ្រោះបានត្រូវគ្រាប់កាំភ្លើងមួយគ្រាប់ ចំលើដោះខាងឆ្វេងបណ្តាលឲ្យស្លាប់ភ្លាមៗនៅក្នុងរថយន្ត។
ជនសង្សយ័ដែលធ្វើសកម្មភាពបាញ់សម្លាប់ជនជាតិចិន បានជិះរថយន្ដម៉ាក Ford Ranger Rapter ពណ៌ខ្មៅ ពាក់ផ្លាកលេខភ្នំពេញ 2BI-1413។ បន្ទាប់ពីធ្វើសកម្មភាពរួចបានយករថយន្ត ទៅទុកផ្លុងចោលនៅជិតផ្សារដំរី៥ ហើយរត់គេចខ្លួនបាត់៕ រក្សាសិទ្ធិដោយៈ ចេស្តារ