បាត់ដំបង៖ប្រជាកសិកររស់នៅឃុំស្នឹងស្រុកបាណន់ដែលអាស្រ័យផលពីប្រឡាយមួយខ្សែប្រវែងជាង១០គីឡូម៉ែត្រ បានធ្វើស្រែ២ដងក្នុងមួយឆ្នាំ បន្ទាប់ពីអាជ្ញាធរខេត្តបាត់ដំបងជួយស្ដារប្រឡាយមួយខ្សែ ដើម្បីឲ្យជីវភាពកាន់តែគ្រាន់បើជាងមុន។
ប្រជាកសិររស់នៅភូមិក្រសារឃុំស្នឹង បាននិយាយប្រាប់ថា បើទោះបីតំបន់ ពួកគាត់រស់នៅជិតអាងកំពីងពួយ ប៉ុន្តែពួកគាត់អាចធ្វើស្រែបានតែមួយដងក្នុងមួយឆ្នាំ ព្រោះពិបាកក្នុងការនាំទឹកមកស្រោចស្រពស្រូវ។ ប៉ុន្តែបន្ទាប់ពីឯកឧត្តម គៀត ច័ន្ធថារិទ្ធ ប្រធានក្រុមការងារចុះជួយឃុំស្នឹងនិងសហការរី តាមរយៈមន្ទីរធនធានទឹកនិងឧតុនិយមខេត្ត បានជួយស្ដារប្រឡាយ រយៈពេល២ឆ្នាំមកនេះ ពួកគាត់អាចធ្វើស្រែបាន ២ដងក្នុងមួយឆ្នាំ ដោយអាចនាំយកទឹកមកធ្វើស្រែបានគ្រប់គ្រាន់ មិនមានការព្រួយបារម្ភ ពីការខ្វះខាតទឹកស្រោចស្រពដូចមុន។
លោក ឡុង ផលគុណ ប្រធានមន្ទីរធនធានទឹកនិងឧតុនិយម បានមានប្រសាសន៍ថា សម្រាប់ស្រែដែលអាចធ្វើការស្ដារឡើងវិញដែលនៅជាប់នឹងប្រឡាយនេះគឺខេត្តអនុញ្ញាតឲ្យពួកគាត់ធ្វើបានតែ ៦០០ហិកតាប៉ុណ្ណោះ ព្រោះអាចនាំទឹកពីអាងកំពីងពួយជួយស្រោចស្រពបាន ហើយឥឡូវស្រូវទាំងអស់នោះ កំពុងមានទឹកដាក់គ្រប់គ្រាន់ មិនជួបគ្រោះរាំងស្ងួតនោះទេ។
លោក ឡុង ផលគុណ បានបញ្ជាក់ថា រហូតមកដល់ពេលនេះ ស្រូវក្នុងផែនការដែលត្រូវធ្វើការស្ដារឡើងវិញនៅក្នុងខេត្តបាត់ដំបងមានប្រមាណ ២ម៉ឺនហិកតា កំពុងមានទឹកស្រោចស្រពគ្រប់គ្រាន់ ខណៈមានស្រូវក្រៅផែនការមួយចំនួនទៀត ដែលខ្វះទឹកដាក់ខ្លះនោះ ក៏ត្រូវបានអាជ្ញាធរខេត្តនិងមន្ទីរជំនាញជួយអន្តរាគមន៍នាំទឹកពីប្រភពនានា មកជួយសង្គ្រោះតាមលទ្ធភាពជាបន្តបន្ទាប់ផងដែរ៕រក្សាសិទ្ទិដោយៈអ៊ុងសារុំ
