ភ្នំពេញ៖ ក្នុងបរិបទកូវីដ ១៩ នេះ មុខរបរចិញ្ចឹមសត្វចង្រឹត បានជួយផ្គត់ផ្គង់ជីវភាពគ្រួសាររបស់ប្រជាកសិករមួយចំនួនផងដែរ។ ចង្រឹតជាប្រភេទសត្វ ដែលងាយស្រួលថែទាំជាងសត្វផ្សេងៗទៀត ព្រោះថាការចិញ្ចឹម គ្រាន់តែមានអាង និងទិញពូជជាការស្រេច ហើយរៀបចំសំបុក ដោយយកក្រដាសកេះដែលគេដាក់ពងមាន់ ឬពងទាឱ្យបានច្រើនទុកនៅអាង រួចយកកូនចង្រិត ដែលបានទិញមកដាក់ក្នុងអាងជាការស្រេច។
វិធីចិញ្ចឹមចង្រឹតគេអាចចិញ្ចឹមក្នុងអាង ឬក៏ទ្រុង។ ចំពោះទំហំអាងចង្រឹត គេអាចធ្វើចាប់ ពី៣ម៉ែត្រការ៉េ ឡើងទៅ ព្រោះទំហំនេះ អាចផលចង្រឹតបាន ១០គីឡូក្រាម។ រីឯកម្ពស់ត្រូវធ្វើចាប់ពី ៧តឹកឡើង ហើយត្រូវបិទស្គត់នៅមាត់អាងដើម្បីកុំឲ្យចង្រឹតលោតចេញ។ ការសាងដំបូលរោងគេធ្វើពីស្លឹក ឬស័ង្កសី ហើយត្រូវសង់ឲ្យខ្ពស់ពីលើអាង ដើម្បីការពារកុំឲ្យ ចង្រឹតក្តៅក្នុងអាង។
បន្ទាប់មកគេអាចដាក់ចំណីផ្សេងៗដែលម៉ត់ដើម្បីឲ្យកូនចង្រឹត ស៊ីរួមមាន ចំណីកូនមាន់ កន្ទក់ ឬស្លឹករុក្ខជាតិខ្ចីៗ ដូចជាស្លឹកបាស ស្លឹកផ្ទី ត្រកួន ល្ពៅជាដើម។ល។ ហើយអ្នកចិញ្ចឹមត្រូវ តែប្រយ័ត្នចំពោះស្ពៃមួយចំនួនអាចធ្វើឲ្យចង្រឹតងាប់ ដូចជាស្ពៃដែលហិល ស្ពៃខ្មៅ ព្រោះ វាមានជាតិហាង ហើយនឹងស្ពៃខ្លះទៀតដែលមានជាតិគីមី។ រយៈពេលមួយសប្តាហ៍ចង្រិតចាប់ផ្តើមញាស់ ។ នៅពេលដែលចង្រិតញាស់ហើយ គឺត្រូវចាប់ផ្តើមដាក់ចំណី និងបាញ់ទឹកតិចៗ ពីលើមួយថ្ងៃបីដង។ ត្រូវធ្វើសំណាញ់បិទជុំវិញ ដើម្បីការពារកណ្តុរ មាន់ ទា និងសត្វផ្សេងៗចូល។ ការចិញ្ចឹមចង្រិត មានពីរប្រភេទគឺចង្រិតក្រហម និងចង្រិតខ្មៅ ហើយមានរយៈពេលចាប់ពី៣៥ថ្ងៃរហូត៤៥ថ្ងៃ គឺគិតចាប់ពីពេលញាស់ រហូតដល់ថ្ងៃទទួលផល។
ប្រជាកសិករចិញ្ចឹមសត្វចង្រឹត អ្នកស្រី ជុំ សារ៉ាត់ រស់នៅភូមិកូនដំរី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានឱ្យដឹងថា មុខរបរចិញ្ចឹមសត្វចង្រឹតនេះ បានកែប្រែជីវភាពរបស់គាត់មួយកម្រិត។ អ្នកស្រីបានប្រកបរបរចិញ្ចឹមសត្វចង្រឹតនេះ រយៈពេលជិត៥ឆ្នាំមកហើយ ដោយក្នុងកសិដ្ឋានរបស់អ្នកស្រីមានអាងចិញ្ចឹមសត្វចង្រឹតចំនួន១០អាង ដោយក្នុងមួយអាងអាចទទួលផលចំនួន១០០គីឡូក្រាម។
គួរបញ្ជាក់ថា បើតាមប្រជាកសិករ ចង្រឹតដែលបំពងហើយ លក់ក្នុងមួយគីឡួក្រាម ថ្លៃមួយម៉ឺនរៀល ដោយអ្នកទទួលទាន បានអះអាងថា ចង្រឹតដែលចិញ្ចឹមក្នុងកសិដ្ឋាន ហូបទៅឈ្ងុយឆ្ងាញ់ជាប់មាត់៕
រក្សាសិទ្ធិដោយ៖CEN
