ភ្នំពេញ៖ សមាគមអ្នកវាយតម្លៃអចលនទ្រព្យកម្ពុជា និងក្លឹបអ្នកកាសែតកម្ពុជា បានរៀបចំកិច្ចពិភាក្សា ក្រោមប្រធានបទស្ដីពី តើត្រូវវិនិយោគលើអចលនវត្ថុ ដោយរបៀបណាក្នុងសម័យកូវីដ១៩ នៅថ្ងៃទី២៣ ខែមករា ឆ្នាំ២០២៣ នៅសណ្ឋាគារកាំបូឌីយ៉ាណា។
កិច្ចពិភាក្សានេះមានគោលបំណង ឱ្យអ្នកសារព័ត៌មាន បានស្វែងយល់ពីស្ថានភាពពិតប្រាកដនៃវិស័យអចលនទ្រព្យនៅកម្ពុជានាពេលបច្ចុប្បន្ន និងទៅអនាគត រួមទាំងសញ្ញាវិជ្ជមាន និងអវិជ្ជមាន នៃវិស័យនេះនៅកម្ពុជា នាសម័យកូវីដ-១៩។ ក្នុងកិច្ចពិភាក្សានេះ លោក ច្រឹក សុខនីម ប្រធានសមាគមអ្នកវាយតម្លៃអចលនទ្រព្យកម្ពុជា បានលើកឡើងថា ចរន្ដនៃការទិញលក់ វិស័យដីធ្លីក្នុងឆ្នាំ២០២០ ការទិញលក់មានការធ្លាក់ចុះបន្ដិច ធ្លាក់ចុះដោយសារតែវិបត្តិកូវីដ១៩ មិនមានវិនិយោគគិនបរទេស មកវិនិយោគ ហើយការវិនិយោគក្នុងស្រុកក៏មិនសូវមានសន្ទុះ។ ប៉ុន្តែលោកបានបញ្ជាក់ថា ទោះបីជាមានការធ្លាក់ចុះនៃចរន្ដទិញលក់ ក៏ពិតមែន ប៉ុន្ដែតម្លៃនៃអចលនទ្រព្យ មិនបានថមថយតម្លៃនោះឡើយ។
លោក ច្រឹក សុខនីម បានមានប្រសាសន៍ថា «ចរន្ដនៃការទិញលក់វិស័យដីធ្លីក្នុងឆ្នាំ២០២០ មានការធ្លាក់ចុះខ្លះ ប៉ុន្ដែសម្រាប់តម្លៃនៃការលក់មិនបានថមថយឡើយ។ មិនបានថមថយដោយសារតែ ចរន្ដទិញលក់ក្នុងស្រុកមិនបានធ្លាក់ចុះ ធ្លាក់ចុះតែការទិញលក់ពី សំណាក់វិនិយោគិនបរទេស ដែលមិនអាចចូលមកវិនិយោគនៅក្នុងប្រទេសកម្ពុជាបាន ព្រោះតែការរីករាលដាលនៃជំងឺកូវីដ១៩»។
ជាមួយគ្នានេះ លោក គាម សៀកឡុង ទីប្រឹក្សាផ្នែកអាជីវកម្មអវលវត្ថុសមាគមអ្នកវាយតម្លៃអចលនទ្រព្យ បានលើកឡើងផងដែរថា ដោយឡែកចរន្ដនៃការទិញលក់ខុនដូវិញ គឺមាន២ច្រកសំខាន់ៗគឺ ភ្ញៀវក្នុងស្រុក, និងភ្ញៀវបរទេស ជាក់ស្ដែងបន្ទាប់ពីការរីករាលដាល នៃជំងឺកូវីដ១៩ យើងឃើញថា ការទិញលក់ និងជួលខុនដូ មានការធ្លាក់ចុះ។ ប៉ុន្តែទោះបីក្នុងកាលៈទេសៈកូវីដ១៩នេះក្តី គម្រោងសាងសង់ធំៗ បានដំណើរការជាធម្មតាដូចជា បុរី ខុនដូ ឬ ក្រុងរណបជាដើម នៅតែសម្រុកសាងសង់ជាធម្មតា។
គួរបញ្ជាក់ថា អ្នកជំនាញវិស័យអចលនទ្រព្យនៅតែមាគំណិតសុទិដ្ឋិនិយមថា បើទោះបីជាសកម្មភាពជូញដូរស្ងាត់មែន ប៉ុន្តែតម្លៃផ្ទះនិងដីមិនធ្លាក់ថ្លៃទេ។ អ្នករកទទួលទានក្នុងវិស័យនេះ សង្ឃឹមថានៅពេលវ៉ាក់សាំងការពារជំងឺកូវីដ១៩ បានប្រើប្រាស់ទូលំទួលាយនោះ សកម្មភាពជូញដូរអចលនទ្រព្យនឹងសកម្មឡើងវិញ ហើយក៏ជាឱកាសសម្រាប់អ្នកទិញអចលនវត្ថុទុកចំណេញផងដែរ៕ រក្សាសិទ្ធិដោយ ៖ CEN