គ្រប់គ្នាពិតជាសម្តែងនូវក្តីសោកសៅ និងស្រណោះសោកស្តាយជំនួសក្រុមគ្រួសារជាពន់ពេក ចំពោះការបាត់បង់ជីវិតនារីដ៏ស្រស់ស្អាតម្នាក់ ដោយសារគ្រោះថ្នាក់ចរាចរណ៍ត្រូវឡានស៊េរីទំនើប AlPHARD ១គ្រឿង បើកបុកម៉ូតូនាងកំពុងជិះសុខៗទាំងកម្រោល ខណៈឡានេះបានព្យាយាមបើករត់គេច ក្រោយពីបានបើកបុករថយន្ត២គ្រឿងម៉ាកម៉ាស្តា និងកាេមរីឆ្លាម រងការខូចខាតបន្តិចបន្តួច មិនឈប់ដោះស្រាយ។
គួរបញ្ជាក់ថា ហេតុការណ៍គ្រោះថ្នាក់ចរាចរណ៍ផ្តាច់យកជីវិតនារីដ៏ស្រស់ស្អាតខាងលើ ដែលពោរពេញដោយក្តីរន្ធត់គ្រប់ៗគ្នា ស្ថិតក្រោមសម្រែកទ្រហ៊ោយំ និងកំហឹងឈឺចាប់យ៉ាងខ្លាំងក្លាពីក្រុមគ្រួសារនេះ បានកើតឡើងកាលពីនៅវេលាម៉ោង៨យប់ ថ្ងៃសៅរ៏ ទី២៣ ខែមករា ឆ្នាំ២០២១ នៅត្រង់ចំណុចមុខបុរីប៉េងហួតខាងកើតច្រមុះជ្រូក ស្ទឹងមានជ័យ ចម្ងាយប្រហែល៥០ម៉ែត្រ តាមបណ្ដោយផ្លូវ ២១៧ក្នុងសង្កាត់ ស្ទឹងមានជ័យទី២ ខណ្ឌមានជ័យរាជធានីភ្នំពេញ។
អ្វីដែលគួរឲ្យរំជួលចិត្តសោកស្តាយខ្លាំងនោះ គឺសពនារីដែលបានស្លាប់ក្នុងគ្រោះថ្នាក់ចរាចរណ៍នេះ ត្រូវបានដឹងថា នាងក៏ជិតដល់ថ្ងៃរៀបការទៅហើយ ដោយក្នុងថ្ងៃកើតហេតុនោះ នាងបានធ្វើការជិះម៉ូតូទៅជួបគូដណ្តឹង ដើម្បីហូបអាហារជុំគ្នា តែជាអកុសល្យ ក៏ត្រូវជួបគ្រោះថ្នាក់បាត់បង់ជីវិតដ៏នឹកស្មានមិនដល់ ដែលធ្វើឲ្យគ្រប់គ្នាមានការសោកសៅជាខ្លាំង។
ដោយឡែក ងាកមើលក្នុង Status គណនីហ្វេសប៊ុករបស់នាងវិញ គឺមុនពេលគ្រោះថ្នាក់ស្លាប់មួយថ្ងៃ នាងបាន Share ការផុសមួយនៅថ្ងៃទី២២ ខែមករា ដោយភ្ជាប់នឹងពាក្យពេចន៍ដូចឲ្យហេតុមុន តែគ្រាន់តែគ្មានអ្នកណាចាប់អារម្មណ៍នូវរឿងមួយនេះ ដោយក្នុងនោះនាងបាននិយាយបែបនេះថា៖ «ក្មេងល្អៗ ម៉េចក៏ឆាប់ស្លាប់ម្ល៉េះ»។
ក្រោយរកឃើញថា នាងបានសរសេរពាក្យបែបនេះ អ្នកលេងបណ្តាញសង្គមក៏បានចូល Comment ទាំងនឹកស្មានមិនដល់យ៉ាងដូច្នេះថា៖ «ក្មេងល្អម្ដេចក៏ឆាប់ស្លាប់ម្លេះហឺ!សរសេរខ្លួនឯងដូចទាយទុកអ៊ីចឹង សូមឲអ្នកទៅកាន់សុខគតិភព, មិនគួរអញ្ចឹងទេ, Caption អោយហេតុណាស់, អ៊ីចឹងបាននិយាយថាជីវិតត្រូវអស់់ទោះគេចយ៉ាណាក៏មិនផុតដែរ….»៕ រក្សាសិទ្ធិដោយ៖ លឹម ហុង