ភ្នំពេញ ៖ ក្នុងរយៈពេល១១ខែឆ្នាំ២០២០ កម្ពុជា បាននាំចេញទំនិញទៅកាន់ប្រទេសជប៉ុនមានទំហំទឹកប្រាក់សរុប ១ ៤៨៦ លានដុល្លារ ថយចុះ ១៤ភាគរយ ធៀបនឹងរយៈពេលដូចគ្នា កាលពីឆ្នាំ ២០១៩។ នេះបើយោងតាមរបាយការណ៍អង្គការពាណិជ្ជកម្មក្រៅប្រទេសជប៉ុន ហៅកាត់ថា (JETRO)។ ដោយឡែក ក្នុងរយៈពេលដូចគ្នានេះដែរ កម្ពុជា បាននាំចូលទំនិញពីប្រទេសជប៉ុនវិញ មានទំហំទឹកប្រាក់ ៤៣២លានដុល្លារ ថយចុះ ៧ភាគរយ។
ទំហំពាណិជ្ជកម្មទ្វេភាគី រវាងប្រទេសកម្ពុជា និងប្រទេសជប៉ុន សម្រេចបាន ១,៩ ពាន់លានដុល្លារ នៅក្នុងរយៈពេល១១ខែ ឆ្នាំ២០២០។ របាយការណ៍ JETRO បានបង្ហាញថាទំហំពាណិជ្ជកម្មរវាងប្រទេសកម្ពុជា និងប្រទេសជប៉ុន ក្នុងរយៈពេល ១១ខែ ធ្លាក់ចុះ ៨,៧ភាគយ ធៀបនឹងរយៈពេលដូចគ្នាកាលពីឆ្នាំមុន។
ភាគច្រើនផលិតសក្តានុពលដែលកម្ពុជានាំចេញទៅប្រទេសជប៉ុន មានដូចជា ផលិតសម្លៀកបំពាក់ កង់ គ្រឿងបង្គំអេឡិចត្រូនិក និងផលិតកសិកម្ម។ កាលពីឆ្នាំ២០១៩ ការដោះដូរពាណិជ្ជកម្មទ្វេភាគី រវាងប្រទេសទាំងពីរ មានទឹកប្រាក់សរុប ២,២ពាន់លានដុល្លារ កើនឡើង១៣ ភាគរយ ធៀបនឹងឆ្នាំ២០១៨៕
រក្សាសិទ្ធិដោយ៖CEN