ភ្នំពេញ ៖ រថយន្ដCRV ១គ្រឿងបានរងការខូចខាតយ៉ាងដំណំ និងរបាំងថ្មពុះចែកទ្រូងផ្លូវបាក់ខ្ទាត១កង់ ដោយសាររថយន្តតែជាប់ចង្កូត បើកបរមិនប្រយ័ត្នបុកពេញទំហឹង នាវេលាម៉ោង៩ នឹង៣០នាទីព្រឹកថ្ងៃទី២៥ ខែមករា ឆ្នាំ២០២១ តាមបណ្តោយផ្លូវកម្ពុជាក្រោម ខាងក្រោយទីស្ដីការគណៈរដ្ឋមន្ដ្រី ស្ថិតក្នុងសង្កាត់មិត្តភាព ខណ្ឌ ៧មករា រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឱ្យដឹងថា រថយន្ដCRV ពាក់ផ្លាកលេខ កំពង់ចាម 2A ~ 2781 បើកចេញពីព្រែកលៀប បំណងយករថយន្ដទៅធ្វើ ខណៈមកដល់ពាក់កណ្តាលផ្លូវ ក្រោយទីស្ដីការគណៈរដ្ឋមន្ដ្រីស្រាប់តែរថយន្តគាត់ជាប់ចង្គូត ស្របពេលនោះមានម៉ូតូមួយទៀតបើកនៅពីមុខ ធ្វើឲ្យអ្នកបើកបររថយន្ដទាញចង្កូតមកជ្រុលបុកក្បាលពុះចែកទ្រូងផ្លូវ ពេញទំហឹងបណ្តាលឱ្យរងការខូចខាតយ៉ាងដំណំ និងបាក់របាំងថ្មពុះចែកទ្រូងផ្លូវ១កង់ផងដែរ តែមិនមានអ្នករងរបួសនោះទេ ។
ក្រោយកើតហេតុសមត្ថកិច្ចមូលដ្ឋាន និងជំនាញបានមកដល់កន្លែងកើតហេតុដើម្បីសម្រួលចរាចរណ៍ និងបានធ្វើការវាស់វែងយកទៅរក្សាទុក នៅការិយាល័យចរាចរណ៍ជើងគោករាជធានីភ្នំពេញ ដោះស្រាយតាមនីតិវិធី ៕ រក្សាសិទ្ធិដោយ ៖ ពន្លឺ និង ហេងវុត្ថា