នេះគឹជាខណៈពេលដ៏គួរឲ្យភ្ញាក់ផ្អើល និងញាក់សាច់តែម្តង ខណៈដែលសត្វខ្លាពេញវ័យមួយក្បាល មិនដឹងជាចងកំហឹងអ្វី បានព្យាយាមខាំហែករថយន្តអ្នកទេសចរ១គ្រឿងយ៉ាងសាហាវ។ ហើយជាមួយនឹងឥរិយាបទដ៏ចម្លែករបស់ប្រភេទសត្វ «ឆ្មាធំ» នេះផងដែរ ជូនកាលក៏បានធ្វើឲ្យអ្នកវិទ្យាសាស្ត្រពិបាកនឹងពន្យល់ណាស់។
យោងតាមកាសែត Daily Mail បានចុះផ្សាយឲ្យដឹងថា អ្នកទេសចរទៅកាន់ឧទ្យានជាតិ Bannerghatta ទីក្រុង Banglore ប្រទេសឥណ្ឌា ពិតជាមានការភ័យខ្លាចជាខ្លាំង ខណៈសុខៗ ស្រាប់តែខ្លា១ក្បាល ចេញមកវាយប្រហាររថយន្តរបស់ពួកគេទម្ងន់ជិត ២ តោន។ គេក៏មិនបានដឹងច្បាស់ថា តើមានការធ្វើឲ្យពួកវាមួរម៉ៅអ្វីពីមុននោះទេ ប៉ុន្តែ សត្វខ្លានោះបានខាំហែកកាងក្រោយឡានយ៉ាងខ្លាំង និងថែមទាំងទាញរថយន្តទៅក្រោយទៀតផង។
វីដេអូឃ្លីបនេះផងដែរ ត្រូវបានថតដោយភ្ញៀវទេសចរ ស្ថិតនៅក្នុងរថយន្តបន្ទាប់ ហើយពួកគេពិតជាបង្ហាញនូវអារម្មណ៍ភ័យខ្លាចជាខ្លាំង។ ក្នុងនោះ គេក៏បានឮស្ត្រីម្នាក់បានស្រែកថា៖ «តើធ្វើអ្វីខុសជាមួយខ្លា? វាធ្វើឲ្យខ្ញុំមានការអារម្មណ៍ភ័យខ្លាចណាស់»។
ភ្ញៀវទេសចរ ៤នាក់ នៅក្នុងរថយន្តដែលសត្វខ្លានោះវាយប្រហារ បានស្នើអ្នកបើកបរកុំចលនារថយន្ត ដើម្បីចៀសវាងបង្ករបួសដល់វា។
យោងតាមឧទ្យានជាតិ Bannerghatta សត្វខ្លារបស់ពួកគេមិនស្រែកឃ្លាននោះទេ។ សួនសត្វនេះត្រូវបានបង្កើតឡើងក្នុងឆ្នាំ ១៩៧០ និងជាជម្រកសត្វដែលមានគ្រោះថ្នាក់ជាច្រើនដូចជា ខ្លា តោ ដំរី និងពស់ ជាដើម។
អ្នកទស្សនានៅសួនសត្វនេះ គឺតម្រូវឲ្យអង្គុយនៅក្នុងឡានដែលត្រូវបានរៀបចំសុវត្ថិភាពយ៉ាងពិសេស ក្នុងករណីដែលពួកគេត្រូវបានវាយប្រហារដោយសត្វសាហាវៗទាំងនេះ។
សត្វខ្លាពេញវ័យអាចស៊ីសាច់ ៤០ គីឡូក្រាមក្នុងមួយថ្ងៃ និងតមអាហារបានរហូតដល់ ៣ សប្តាហ៍។ ពួកវាគឺស្ថិតក្នុងចំណោមសត្វថ្គាមដ៏មានឥទ្ធិពលបំផុត នៅលើភពផែនដី៕ រក្សាសិទ្ធិដោយ៖ លឹម ហុង
Bengaluru: Bengal tiger pulls safari vehicle in Bannerghatta National Park pic.twitter.com/HNIdsQ66s0
— Bangalore Mirror (@BangaloreMirror) January 17, 2021
