បាត់ដំបង៖ស្រូវជួបគ្រោះរាំងស្ងួតជាង៣០០ហិកតា ត្រូវបានអាជ្ញាធរនិងមន្ត្រីជំនាញមន្ទីរធនធានទឹនិងឧតុនិយមខេត្តបាត់ដំបងខេត្តបាត់ដំបងចុះអន្តរាគមន៍នាំទឹកពីទំនប់អាងកំពីងពួយ ជួយសង្គ្រោះស្ថិតក្នុងឃុំចំនួន២នៅស្រុកថ្មគោល។
លោក សៅ សារ៉ន ប្រធានសហគមន៍កសិករប្រើប្រាស់ទឹកនៃទំនប់អាងកំពីងពួយ បានមានប្រសាសន៍ថាស្រូវជួបបញ្ហាខ្វះទឹកនេះស្ថិតក្នុងឃុំរូងជ្រៃនិងឃុំបន្សាយត្រែង ខណៈតំបន់ទាំងនោះ នៅឆ្ងាយពីប្រភពទឹក ហើយពិបាកក្នុងការនាំទឹកទៅសង្គ្រោះ ព្រោះប្រឡាយត្រូវនាំទឹកទៅ មានលក្ខណៈតូចចង្អៀតនិងមិនមានភ្ជាប់ទៅដល់ទៀត។ទោះជួបឧបសគ្គយ៉ាងនេះក្តី អាជ្ញាធរនិងមន្ត្រីជំនាញ នៅតែបើកទឹក ដើម្បីយកទៅសង្គ្រោះស្រូវរបស់ប្រជាពលរដ្ឋទៅតាមលទ្ធភាពជាក់ស្ដែង ខណៈទឹកនេះក៏ត្រូវសម្រាប់ផ្គង់ផ្គង់ដល់ស្រូវប្រាំងចំនួន១២០០០ហិកតាផ្សេងទៀត ដែលស្ថិតក្នុងផែនការស្ដារឡើងវិញ បន្ទាប់ពីទឹកជំនន់បានស្រកទៅ រួមទាំងសម្រាប់ទុកប្រើប្រាស់ក្នុងរដូវប្រាំង។
លោក យូ សឿម មេឃុំរូងជ្រៃ តំណាងឲ្យប្រជាពលរដ្ឋ បានមានប្រសាសន៍លើកឡើងថាកាលពីចុងឆ្នាំ២០២០ ក្នុងតំបន់នេះ បានជួបគ្រោះទឹកជំនន់ បណ្ដាលឲ្យលិចលង់នូវស្រូវអស់ជាច្រើនហិកតា ហើយបន្ទាប់ពីទឹកស្រក កសិករមួយចំនួនបាននាំគ្នាធ្វើការដាំដុះស្រូវស្ដារឡើងវិញ ហើយបានជួបបញ្ហាខ្វះទឹកស្រោចស្រព។ប៉ុន្តែអាជ្ញាធរខេត្តនិងមន្ត្រីជំនាញចុះជួយអន្តរាគមន៍ ធ្វើឲ្យពួកគាត់សប្បាយចិត្តយ៉ាងខ្លាំង។
លោក ហួត ច័ន្ទតារារិទ្ធ អនុប្រធានមន្ទីរធនធានទឹក និងឧតុនិយមខេត្តបាត់ដំបង បានមានប្រសាសន៍ក្នុងពេលចុះជួបដោះស្រាយនិងពិនិត្យស្ថានភាពនាំទឹកជួយសង្គ្រោះស្រូវពលរដ្ឋក្នុងឃុំទាំងពីរនេះថាសម្រាប់ផែនការរបស់ខេត្ត ក្នុងការស្ដារឡើងវិញនៃការដាំដុះស្រូវ បន្ទាប់ពីគ្រោះទឹកជំនន់ស្រកមានប្រមាណ២០ ០០០ហិកតា ដោយស្ថានភាពស្រូវទាំងអស់នោះ មានភាពល្អប្រសើរ ពុំមានខ្វះខាតទឹកស្រោចស្រពនោះទេ ប៉ុន្តែមានស្រូវមួយចំនួនស្ថិតនៅក្រៅផែនការ កំពុងខ្វះខាតទឹកដាក់ ត្រូវបានអាជ្ញាធរ កំពុងជួយសង្គ្រោះជាបន្តបន្ទាប់តាមលទ្ធភាព។
លោក ហួត ច័ន្ទតារារិទ្ធ បានអំពាវនាវទៅដល់ពលរដ្ឋ សូមស្ដាប់តាមការណែនាំរបស់ជំនាញពាក់ព័ន្ធនឹងការធ្វើស្រូវប្រាំងនៅឆ្ងាយពីប្រភពទឹកនិងនៅក្រៅផែនការ ចៀសវាងខ្វះទឹកស្រោចស្រព ធ្វើឲ្យរងការខូចខាត ធ្វើឲ្យជីវភាពកាន់តែលំបាក ហើយក៏សូមស្នើទៅអាជ្ញាធរមូលដ្ឋាន សូមជួយណែនាំពលរដ្ឋបន្ត ខណៈរាល់ផែនការដាំដុះ ក៏បានផ្សព្វផ្សាយដល់អាជ្ញាធផងដែរនោះ៕រក្សាសិទ្ធិដោយ៖អ៊ុងសារុំ
