ភ្នំពេញ៖ ប្រិយមិត្ត និងមហាជនបានទទួលជ្រាបច្បាស់ហើយ ជុំវិញរឿងរ៉ាវលែងលះប្តីប្រពន្ធដ៏មិននឹកស្មានដល់ រវាងលោកឧកញ៉ា ឌួង ឆាយ និងអតីតភរិយាអ្នកនាង ដែត ម៉ាលីណា ក្រោយពីអ្នកនាងបានប្រកាសការលែងលះគ្នានេះជាសាធារណៈ បង្កការភ្ញាក់ផ្អើលពេញបណ្តាញសង្គម កាលពីពេលកន្លងទៅនេះ។
ពិតមែនហើយ ក្រោយចែកផ្លូវគ្នា បើទោះជាអតីភរិយាបង្ហោះសារនិយាយដាក់បន្ទុកមកលើខ្លួន ជាអ្នកធ្វើឲ្យនាងដំបៅក្នុងចិត្តអស់រយៈពេលជិត ១៣ ឆ្នាំយ៉ាងណា ក៏លោកឧកញ៉ា ឌួង ឆាយ ពុំធ្វើការតបតអ្វីទាំងអស់ និងផ្ទុយមកវិញ គឺលោកមានតែបង្ហោះរូបចតចាស់ៗជុំនឹងភរិយា និងកូនៗ ដែលសបញ្ជាក់ឲ្យឃើញថា លោកប្រហែលជាពុំចង់បែកបាក់ជីវិតប្តីប្រពន្ធជាមួយភរិយាជាទីស្រឡាញ់សូម្បីតែបន្តិចសោះឡើយ។
តែទោះយ៉ាងណា ក្រោយសម្ងំស្ងាត់ពុំធ្វើការតបត និងក៏ដូចបកស្រាយអ្វីទាំងអស់ ស្រាប់តែប៉ុន្មានថ្ងៃមុននេះ លោកបានសម្រេចចិត្តបង្ហោះសារផ្តាំទៅអតីតភរិយា កុំចូលចិត្តដើរលេង ជួបជុំមិត្តភក្តិផឹកស៊ីសប្បាយរហូតខ្លាំងពេកគួរណាស់ មានពេលមើលថែកូនៗខ្លះ ពួកគេត្រូវការភាពកក់ក្តៅពីម្តាយ។
ដោយឡែក កាលពីម៉ោងជាង ៨ យប់ ថ្ងៃទី២៤ ខែមករា ឆ្នាំ២០២១ ម្សិលមិញនេះ លោកឧកញ៉ា ដួង ឆាយ បានធ្វើឲ្យពុកម៉ែបងប្អូនគ្រប់គ្នា ស្ទើរស្រក់ទឹកភ្នែក ខណៈលោកបានបង្ហោះសារសុំទោសទៅកាន់កូនៗ ព្រោះតែលោកអស់សមត្ថភាពនឹងការនិយាយអង្វរអតីភរិយា។ ក្នុងនោះលោកបានរៀបរាប់ទាំងរំជួលចិត្តថា៖ «ពុកសូមទោសណាកូនប្រុសមាសឪពុក ពុកបានព្យាយាមអស់ពីលទ្ធភាព និងសម្ថភាពរបស់ពុកហើយណា។ ពុកសន្យានឹងខិតខំប្រឹងប្រែងធ្វើអោយបានល្អជាទីបំផុត ដើម្បីកូនៗណាចាប់ពីពេលនេះ។ សូមអរគុណណា ពូមីងបងប្អូនទាំងអស់គ្នា ចំពោះការបារម្ភស្រឡាញ់រាប់អានណា អ្វីៗដែលនៅសល់ទុកឲ្យព្រហ្មលិខិត ព្រេងវាសនា និស្ស័យ និងពេលវេលាជាអ្នកកំណត់ទៅចុះណាបាទ ឌួង ឆាយ»។
ក្នុងនោះផងដែរ អ្វីដែលធ្វើឲ្យពូមីងពុកម៉ែបងប្អូន កាន់តែរំជួលចិត្តខ្លាំងបំផុតនោះ គឺកូនប្រុសច្បងរបស់លោកឧកញ៉ា បាននិយាយនៅក្នុងវីដេអូ សុំឲ្យម៉ាក់មកជួបជុំគ្នាវិញ ដោយកូនប្រុសទី២របស់អ្នកទាំងពីរបាននិយាយទាំងទឹកមុខស្រពោនបែបនេះថា៖ «ម៉ាក់ៗ ឈប់ឈ្លោះគ្នាជាមួយប៉ាៗបានទេ ខ្ញុំចង់ហៅម៉ាក់មកជុំគ្នា នៅពេលនេះ សូមម៉ាក់មកមើលមុខគ្នាវិញទៅ! ម៉ាក់អាចមកផ្ទះយើងវិញមក ប៉ាៗសុំអភ័យទោស អូខេ ម៉ាក់…!!»។
ក្រោយពីបានឃើញបែបនេះ អ្នកប្រើប្រាស់បណ្តាញសង្គម បានចូលខមិនសម្តែងនូវក្តីអាណិតអាសូរថា៖ «អាណិតក្មួយណាស់ ចេះឆ្លាត គួរអោយស្រឡាញ់ណាស់, ខ្លោចចិត្តណាស់… រឹងមាំឡើងកូន ពេលកូនធំដឹងក្តីទើបកូនយល់ពីតម្លៃនៃការចាកចេញមួយនេះ …. សូមព្រះប្រទានពរកូនឆាប់ធំដឹងក្តី នឹងបានមើលថែបងប្រុស និងប្អូនស្រីផង កូនឆ្លាត, អ្នកបែកបាក់ឪពុកម្តាយ ទើបយល់អារម្មណ៍មួយនេះ , អាណិតក្មួយណាស់. ប្អូនជូនពរអោយបងទាំងពីរបានជួបជុំគ្នាវិញណា»។ រីឯអ្នកខ្លះទៀត ក៏បានលើកឡើងថា៖ «មនុស្សស្រីគឺបែបនឹង បេីគាត់សំរេចចិត្តថាទៅផ្លូវណាហេីយ គឺមិនងាកក្រោយឡេីយ ព្រោះមុនពេលដែលគាត់សំរេចចិត្ត គាត់បានគិតច្បាស់លាស់ហេីយ គិតម្តងហេីយម្តងទៀត ដែលគ្មាននរណារម្នាក់ដឹង, ខ្ញុំគិតថាមុនពេលសម្រេចចិត្តនឹង គឺទ្រាំឆ្អែកឆ្អន់ហួសកករទៀត ហើយក៏ស្រោចស្រង់មិនតិចដងដែរ អ៊ីចឹងបានគេថា លែងដាច់មិនដាច់ គឺលើមនុស្សស្រី តែយ៉ាងណាអាណិតក្មេង»៕ រក្សាសិទ្ធិដោយ៖ លឹម ហុង