ភ្នំពេញៈ អ្នកនាំពាក្យក្រសួងការបរទេសកម្ពុជា លោកកុយ គួង បានបញ្ជាក់ ភាគីឥណ្ឌាបានកំពុងតែធ្វើការទំនាក់ទំនងជាមួយក្រសួងសុខាភិបាលកម្ពុជា ដើម្បីពិនិត្យនូវភាពចាំបាច់ចំពោះសំណើរបស់រាជរដ្ឋាភិបាលកម្ពុជា ស្នើសុំជំនួយវ៉ាក់សាំងចាក់ការពាជំងឺកូវីដ-១៩ ពីប្រទេសឥណ្ឌា។
លោកកុយ គួង បានបន្តថា នៅក្នុងជំនួបពិភាក្សាការងារជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី២៥ ខែមករា ឆ្នាំ២០២១ គឺលោកស្រី ដេវីយ៉ានី ឧត្តាំ ខូប្រាហ្គោដ (Devyani Uttamkhobragade) ឯកអគ្គរដ្ឋទូតថ្មី នៃសាធារណរដ្ឋឥណ្ឌាប្រចាំកម្ពុជា បានបញ្ជាក់ថា តាមសំណើរបស់សម្តេចអគ្គមហាសេនាបតីតេជោ ហ៊ុន សែន ប្រមុខដឹកនាំរាជរដ្ឋាភិបាលកម្ពុជា ស្នើសុំជំនួយវ៉ាក់សាំងចាក់ការពាជំងឺកូវីដ-១៩ ពីប្រទេសឥណ្ឌា គឺភាគីឥណ្ឌាកំពុងតែធ្វើការទំនាក់ទំនងជាមួយក្រសួងសុខាភិបាលកម្ពុជា ដើម្បីពិនិត្យនូវភាពចាំបាច់ថា តើក្រសួងសុខាភិបាលត្រូវការអ្វីខ្លះ?។
“តាមសំណើរបស់រដ្ឋាភិបាលកម្ពុជាអំពីវ៉ាក់សាំងចាក់ការពារជំងឺកូវីដ-១៩ ពីប្រទេសឥណ្ឌា តាមការបញ្ជាក់របស់ឯកអគ្គរដ្ឋទូតឥណ្ឌា គឺឥណ្ឌាកំពុងតែធ្វើការទាក់ទងជាមួយក្រសួងសុខាភិបាលយើង ដើម្បីពិនិត្យនូវភាពចាំបាច់ថា តើក្រសួងសុខាភិបាលត្រូវការអ្វីខ្លះ?”។
គួរបញ្ជាក់ថា នៅក្នុងជំនួបពិភាក្សារវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយនឹងលោកជំទាវ Devyani Uttamkhobragade ឯកអគ្គរដ្ឋទូតថ្មី នៃសាធារណរដ្ឋឥណ្ឌាប្រចាំកម្ពុជា កាលពីព្រឹកថ្ងៃទី១៨ ខែមករា ឆ្នាំ២០២១ សម្តេចតេជោបានស្នើសុំជំនួយវ៉ាក់សាំងចាក់ការពាជំងឺកូវីដ-១៩ ពីប្រទេសឥណ្ឌា។ សំណើនេះ ត្រូវបានសម្តេចតេជោនាយករដ្ឋមន្ត្រី ហ៊ុន សែន បានស្នើតាមរយៈឯកអគ្គរដ្ឋទូតទៅកាន់នាយករដ្ឋមន្ត្រីឥណ្ឌា Narendra Damodardas Modi ព្រោះប្រទេសឥណ្ឌាបានផលិតវ៉ាក់សាំងកូវីដ១៩ បានដោយខ្លួនឯង ហើយគ្រោងនឹងចាក់ជូនប្រជាពលរដ្ឋរបស់ខ្លួនជាង ៣០០លាននាក់នៅក្នុងឆ្នាំនេះផងដែរ៕ រក្សាសិទ្ធិដោយ : ចេស្តារ