ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិជំរឿនទូទៅប្រជាជននៅព្រះរាជាណាចក្រកម្ពុជា ឆ្នាំ២០១៩ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសផ្សព្វផ្សាយរបាយការណ៍ជាតិនៃលទ្ធផលចុងក្រោយ ជំរឿនទូទៅប្រជាជននៅព្រះរាជាណាចក្រកម្ពុជាឆ្នាំ ២០១៩ នៅសណ្ឋាគារសូហ្វីតែលភ្នំពេញភូគីត្រា នៅព្រឹកថ្ងៃ២៦ ខែមករា ឆ្នាំ២០២១។
សម្តេចក្រឡាហោម ស ខេង បានមានប្រសាសន៍ថា ការប្រកាសផ្សព្វផ្សាយរបាយការណ៍ជាតិនៃលទ្ធផលចុងក្រោយជំរឿនទូទៅប្រជាជននៅព្រះរាជាណាចក្រកម្ពុជាឆ្នាំ២០១៩ ដែលជាព្រឹត្តិការណ៍ប្រវត្តិសាស្ត្រដ៏សំខាន់មួយសម្រាប់ព្រះរាជាណាចក្រកម្ពុជា ដែលបានប្រព្រឹត្តទៅប្រកបដោយជោគជ័យ ស្របតាមច្បាប់ជាធរមាន។ ការដឹកនាំគ្រប់សកម្មភាពការងារជំរឿនទូទៅប្រជាជនឆ្នាំ២០១៩ បានប្រព្រឹត្តទៅល្អប្រសើរ និងរលូនតាមផែនការជំរឿន។ គុណភាពជំរឿនឆ្នាំ២០១៩ បានកើនឡើងប្រៀបធៀបនឹងជំរឿនឆ្នាំ២០០៨កន្លងមក ជាទូទៅគឺមានតែការធ្វើជំរឿនប្រជាជនប៉ុណ្ណោះទេ ដែលអាចផ្តល់នូវការឆ្លុះបញ្ចាំងអំពីស្ថានភាពប្រជាជនរបស់ ប្រទេសរហូតដល់កម្រិតថ្នាក់ក្រុមតូចៗ និងជួយដល់រាជរដ្ឋាភិបាលក្នុងការរៀបចំតាក់តែង អនុវត្តគោលនយោបាយ មានប្រសិទ្ធិភាព ដូចជា គោលនយោបាយជាតិប្រជាជន និងរៀបចំគម្រោងកម្មវិធីផ្សេងៗ ដើម្បីទទួលបាននូវ តុល្យភាពរវាងប្រជាជន និងការអភិវឌ្ឍ។ ជំរឿនប្រជាជន គឺជាប្រភពព័ត៌មានតែមួយគត់ស្តីអំពីចំនួន និងចរិត លក្ខណៈប្រជាជន។
សម្តេចក្រឡាហោមបានបញ្ជាក់ថា ជំរឿនប្រជាជនមាន វិសាលភាពរឹងមាំ ល្អិតល្អន់ និងអាចផ្តល់អោយនូវចំនួនប្រជាជនក្នុង តំបន់រហូតដល់ថ្នាក់តូចៗថែមទៀត ដែលប្រភពទិន្នន័យផ្សេងៗទៀតមិនមានឡើយ។
សម្តេចក្រឡាហោមបានបញ្ជាក់ថា តាមលទ្ធផលចុងក្រោយនៅថ្ងៃទី០៣ ខែមីនា ឆ្នាំ ២០១៩ ប្រជាជនកម្ពុជាមានចំនួន ១៥,៦ លាននាក់ កើនឡើងពី ១៣,៤លាននាក់នៅក្នុងឆ្នាំ២០០៨។ អត្រាកំណើនប្រចាំឆ្នាំមាន ១,៤ ភាគរយ នៅឆ្នាំ២០១៩។ អត្រាកំណើនបានធ្លាក់ចុះពី ១,៥ ភាគរយ នៅឆ្នាំ២០០៨។ ការធ្លាក់ចុះនេះ គឺដោយសារការ អនុវត្តដោយជោគជ័យនូវគោលនយោបាយជាតិប្រជាជន ក៏ដូចជាកិច្ចសហប្រតិបត្តិការជាសាធារណៈដើម្បីកាត់ បន្ថយលទ្ធភាពបង្កកំណើត និងមរណភាព។ អត្រាកំណើនប្រជាជននៅខ្ពស់ជាងអត្រាមធ្យមនៃប្រជាជាតិ អាស៊ីអាគ្នេយ៍។ នៅមានកិច្ចការជាច្រើន ដើម្បីធ្វើក្នុងការបង្កើននូវលក្ខខ័ណ្ឌសុខភាពប្រជាជនអោយប្រសើរ ឡើងនូវសេវាសុខភាពបន្តពូជរបស់ស្ត្រី និងការកាត់បន្ថយនូវមរណភាពកុមារ ទារក និងមរណភាពមាតា។
ក្នុងចំណោមរាជធានី ខេត្តទាំងអស់ រាជធានីភ្នំពេញមានប្រជាជនច្រើនជាងគេ គឺ ២.២៨១.៩៥១នាក់ ឬ ១៤,៧% តាមលំដាប់លំដោយ ខេត្តកណ្តាល (៧,៧%) ព្រៃវែង (៦,៨%) សៀមរាប (៦,៥%) បាត់ដំបង (៦,៤%) តាកែវ (៥,៨%) និងកំពង់ចាម (៥,៨%) ចំណែកខេត្តកែបវិញ មានប្រជាជនទាបបំផុត (០,៣%) ប៉ុណ្ណោះ ។
សម្តេចក្រឡាហោនបានបញ្ជាក់ទៀងថា “យើងសង្កេតឃើញមាននិន្នាការកើនឡើងនូវតំបន់ទីប្រជុំជនទូទាំងប្រទេស។ ភាគរយនៃប្រជាជន ទីប្រជុំជនបានកើនេពី ១៩,៥ ភាគរយ នៅឆ្នាំ២០០៨ ដល់ ៣៩,៤ ភាគរយ នៅឆ្នាំ ២០១៩ ដែលបញ្ជាក់ពី ជោគជ័យក្នុងការដឹកនាំរបស់រាជរដ្ឋាភិបាល។ ប្រជាជនដែលធ្លាប់ធ្វើការផ្លាស់ប្តូរលំនៅដ្ឋានក្នុងអតីតកាលមុនធ្វើ ជំរឿនមានតែ ២១,៥ភាគរយ ក្នុងចំណោមប្រជាជនសរុប។ ជំរឿនឆ្នាំ២០១៩ ប្រជាជនផ្លាស់ទីពីជនបទ នៅតំបន់ទីប្រជុំជនបានកើនឡើង។ នេះមានន័យថាទីក្រុង និងទីប្រជុំជនយើងមានប្រជាជនកាន់តែច្រើន ដែលនាំឱ្យមានតំរូវការលំនៅដ្ឋាន និងសម្ភារៈប្រើប្រាស់ផ្សេងៗទៀតកើនឡើង។ ជំរឿនបង្ហាញថា ភាសាខ្មែរ គឺជាភាសាកំណើតច្រើនលើសលុបនៅក្នុងប្រទេស គឺ ៩៥,៨ ភាគរយ។ អ្នកនិយាយភាសាកំណើតជនជាតិដើមភាគតិច រួមមាន ២,៩ ភាគរយ ។ អ្នកនិយាយភាសាបរទេសជាភាសាកំណើតរួមមានតែ១,៤ ភាគរយ ប៉ុណ្ណោះ”៕ រក្សាសិទ្ធិដោយៈ ចេស្តារ