ស្ត្រីម្នាក់នៅក្នុងប្រទេសម៉ិកស៊ីកូ ត្រូវបានគេរាយការណ៍ថា បានចាក់ប្តីរបស់ខ្លួនជាច្រើនកាំបិតស្ទើរក្ស័យជីវិត បន្ទាប់ពីកើតការសង្ស័យ និងចោទប្រកាន់ថា ប្តីកំពុងលួចមានស្រីក្រៅផិតក្បត់ខ្លួន។
យោងតាមកាសែត Daily Star បានរាយការណ៍ឲ្យដឹងថា ជនសង្ស័យមានឈ្មោះ Leonora N តែងតែកើតភ្លើងប្រច័ណ្ឌជារឿយៗ និងនៅថ្ងៃកើតហេតុ បានផ្ទុះកំហឹងយ៉ាងខ្លាំងក្លាតែម្តង បន្ទាប់ពីបានរកឃើញរូបភាពប្តីរបស់នាង ថតជាមួយ “នារីវ័យក្មេង” ម្នាក់នៅក្នុងទូរស័ព្ទរបស់គាត់ ដោយមិនបានដឹងថា វាជារូបភាពរបស់នាង កាលពីនាងនៅវ័យក្មេងម្ល៉េះ។
ជាលទ្ធផល នាងបានចាក់ប្តីរបស់នាងជាច្រើនកាំបិត មុនពេលដែលគាត់បានព្យាយាមចាប់យកកាំបិតពីនាង។ បន្ទាប់មក គាត់បានពន្យល់ថា វាជារូបភាពរបស់ពួកគេទាំងពីរកាលពីប៉ុន្មានឆ្នាំមុន នៅពេលដែលពួកគេនៅស្គម និងនៅក្មេង។ គាត់បានបន្តពន្យល់យ៉ាងច្បាស់ថា រូបភាពទាំងនោះត្រូវបាន Edit ជីឌីថល និងរក្សាទុកនៅលើទូរស័ព្ទរបស់គាត់។
តែយ៉ាងណា ស្ត្រីជាប្រពន្ធរូបនេះត្រូវបានចាប់ខ្លួន ខណៈការចោទប្រកាន់របស់នាងកំពុងរង់ចាំ ក្រោយពីប៉ូលិសទទួលបានសេចក្តីរាយការណ៍ពីអ្នកជិតខាង ដែលបានឮសំឡេងឈ្លោះប្រកែកគ្នាខ្លាំងៗពីក្នុងផ្ទះរបស់ពួកគេ និងក៏បានឃើញហេតុការណ៍ដ៏រន្ធត់កើតឡើងទៅលើបុរសជាប្តី៕ រក្សាសិទ្ធិដោយ៖ លឹម ហុង