ភ្នំពេញ៖ រដ្ឋមន្ត្រីក្រសួងយុត្តិធម៌ ឯកឧត្តម កើត រិទ្ធ ថ្មីៗនេះ បានចេញសេចក្ដីសម្រេច ចំនួន ២ ដាច់ដោយឡែកពីគ្នា ស្ដីពីការបង្កើតគណៈកម្មការ រៀបចំដំណើរការតុលាការ ពាណិជ្ជកម្ម និង តុលាការការងារ ដើម្បីដោះស្រាយភាពចាំបាច់នៃសំណុំរឿង ដែលរំពឹងថា នឹងដាក់ឱ្យដំណើរការ នៅចុងឆ្នាំ២០២១នេះ។
តុលាការពាណិជ្ជកម្ម និងតុលាការការងារ នឹងបង្កើនជំនឿទុកចិត្ដដល់អ្នកវិនិយោគ។ អ្នកនាំពាក្យក្រសួងយុត្តិធម៌ ឯកឧត្តម ជិន ម៉ាលីន បានគូសបញ្ជាក់ថា អ្នកវិនិយោគនឹងមានទំនុកចិត្ត តាមរយៈបង្កើនគុណភាពនៃសេវាយុត្តិធម៍ ក្នុងការដោះស្រាយសំណុំរឿងក្ដី ទៅតាមជំនាញនីមួយៗ ដែលចូលរួមកាត់បន្ថយការកកស្ទះសំណុំរឿងតុលាការ តាមរយៈដំណើរការនីតិវិធី បានលឿនជាងមុន។ ហើយសំណុំរឿងនីមួយៗ នឹងត្រូវបានដោះស្រាយ ដោយតុលាការ និងចៅក្រម លើជំនាញនីមួយៗ។ តុលាការជំនាញទាំង២នេះ មិនមែនជាតុលាការជំនាញដាច់ដោយឡែក ពីតុលាការធម្មតានោះទេ វាគឺនៅក្នុងតុលាការធម្មតាដដែល គ្រាន់តែបែងចែកជាជំនាញប៉ុណ្ណោះ។ នេះបើតាមការបញ្ជាក់ពីអ្នកនាំពាក្យក្រសួងយុត្តិធម៌។
ឯកឧត្តមអ្នកនាំពាក្យក្រសួងយុត្តិធម៌ បានប្រាប់ឱ្យដឹងទៀតថា បើទោះបីពីមុនមក កម្ពុជាអត់ទាន់មានតុលាការជំនាញខាងពាណិជ្ជកម្ម និងការងារក៏ពិតមែន ក៏មិនមែនមានន័យថា សំណុំរឿងការងារ និងពាណិជ្ជកម្ម មិនបានដោះស្រាយនោះទេ ដោយសំណុំរឿងទាំងនេះ បានដោះស្រាយដោយរដ្ឋប្បវេណី។
បើយោងតាមអ្នកជំនាញផ្នែកច្បាប់ បានឱ្យដឹងថា ការបង្កើតនូវតុលាការជំនាញទាំង២នេះ នឹងជួយឱ្យការដោះស្រាយវិវាទពាណិជ្ជកម្ម និងការងារ កាន់តែមានសុក្រិតភាព តម្លាភាព និងការកាត់សេចក្ដីមានយុត្តិធម៌។ ហើយប្រសិនបើតុលាការមិនសូវល្អ អ្នកវិនិយោគក៏គេមិនសូវមកដែល ដោយសារតែពួកគេមានការភ័យខ្លាច៕
រក្សាសិទ្ធិដោយ៖CEN