ភ្នំពេញៈ តុលាការបានបន្តសវនាការសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍ នៅថ្ងៃទី២៨ ខែមករា ឆ្នាំ២០២១ នេះ។ បន្ទាប់ពីបើកសវនាការជំនុំជម្រះ កាលពីថ្ងៃទី១៤ ខែមករា ឆ្នាំ២០២១។
នៅក្នុងសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍ គឺមានមនុស្សសរុបចំនួន ១៣៩នាក់ ត្រូវបានកោះឲ្យចូលខ្លួនទៅក្នុងសវនាការ។
ការបន្តសវនាការនេះ គឺបន្ទាប់ពីតុលាការបានបើកសវនាការជំនុំជម្រះកាលពីថ្ងៃទីថ្ងៃទី២៦ ខែវិច្ឆិកា ឆ្នាំ២០២០ និងកាលពីថ្ងៃទី១៤ ខែមករា ឆ្នាំ២០២១ កន្លងមកនេះ ដោយក្នុងសវនាការនាពេលនោះ គឺមានជនជាប់ចោទតែចំនួន ៣៤នាក់តែប៉ុណ្ណោះបានចូលខ្លួននៅក្នុងសវនាការតាមការកោះហៅរបស់តុលាការ។ ចំណែកលោក សម រង្ស៊ី និងបក្ខពួកគឺមិនបានចូលខ្លួននៅក្នុងសវនាការននោះទេ។
លោកគុជ គឹមឡុង អ្នកនាំពាក្យសាលាដំបូងរាជធានីភ្នំពេញបានឲ្យដឹងថា សវនាការនេះ គឺលើបួនសំណុំរឿង ហើយក្រុមប្រឹក្សាជំនុំជម្រះបានសម្រេចបញ្ចូលជាពីរសំណុំរឿង ដោយសំណុំរឿងទី១. សវនាការកាលពីថ្ងៃទីថ្ងៃទី២៦ ខែវិច្ឆិកា ឆ្នាំ២០២០ និងកាលពីថ្ងៃទី១៤ ខែមករា ឆ្នាំ២០២១ បន្តមកថ្ងៃទី២៨ ខែមករា ឆ្នាំ២០២១ និងសំណុំរឿងទី២. បន្តសវនាការនៅថ្ងៃទី៤ ខែមីនា ឆ្នាំ២០២១។
លោកគុជ គឹមឡុង អ្នកនាំពាក្យសាលាដំបូងរាជធានីភ្នំពេញ បានឲ្យដឹងថា លោកសម រង្ស៊ី និងបក្ខពួកជាង ១០០នាក់ ត្រូវបានចោទប្រកាន់ពីបទ “រួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍” ប្រព្រឹត្តនៅប្រទេសកម្ពុជានិងទីកន្លែងផ្សេងៗទៀតកាលពីថ្ងៃទី២០-២១-២២-២៥-២៦ និងនៅថ្ងៃទី២៧ ខែមករា ឆ្នាំ២០១៩ និងកាលពីអំឡុងខែមិថុនា ឆ្នាំ២០១៩ តាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា៕ រក្សាសិទ្ធិដោយ : ចេស្តារ