ភ្នំពេញៈ តុលាការបានបន្តបើកសវនាការជំនុំជម្រះលើសំណុំរឿង ឧបឃាត ឬ «ការប៉ុនប៉ងធ្វើរដ្ឋប្រហារ» ដែលមានលោក សម រង្ស៊ី និងបក្ខពួកចំនួន ៨នាក់ នៅព្រឹកថ្ងៃទី២៩ ខែមករា ឆ្នាំ២០២១នេះ។ សំណុំរឿងនេះ តុលាការបានដំណើរការបើកសវនាការកាលពីថ្ងៃទី១១ ខែវិច្ឆិកា ឆ្នាំ២០២១ កន្លងមកនេះ។
នៅក្នុងសវនាការ គឺមិនមានវត្តមានជនជាប់ចោទទាំង ៩នាក់នោះទេ ប៉ុន្តែមានមេធាវីតំណាងចូលការពារក្តីនៅក្នុងសវនាការ។
សំណុំរឿង ឧបឃាត ឬ «ការប៉ុនប៉ងធ្វើរដ្ឋប្រហារ» គឺតាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី កាលពីថ្ងៃទី០៩ ខែវិច្ឆិកា ឆ្នាំ២០១៩។
លោក សម រង្ស៊ី និងអតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួន ៨រូបផ្សេងទៀតដែលកំពុងតែស្ថិតនៅក្រៅប្រទេស ត្រូវបានតុលាការចេញដីកាបង្គាប់ឲ្យចូលខ្លួននៅថ្ងៃទី១១ ខែវិច្ឆិកា ឆ្នាំ២០២០ ខាងមុខនេះ ដើម្បីឆ្លើយដោះសារពីការចោទប្រកាន់ពីបទ ឧបឃាត ឬ «ការប៉ុនប៉ងធ្វើរដ្ឋប្រហារ» តាមរយៈផែនការនៃការវិលត្រឡប់មកកម្ពុជាវិញរបស់លោក សម រង្ស៊ី នៅថ្ងៃទី០៩ ខែវិច្ឆិកា ឆ្នាំ២០១៩។
ដីកាបង្គាប់ឲ្យចូលខ្លួននេះ ចេញដោយលោកសេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១៩ ខែតុលា ឆ្នាំ២០២០ ដែលត្រូវបានសមត្ថកិច្ចយកទៅបិទនៅអតីតទីស្នាក់ការនៃអតីតគណបក្សសង្គ្រោះជាតិ នៅសង្កាត់ចាក់អង្រែលើ ខណ្ឌមានជ័យ កាលពីរសៀលថ្ងៃទី២០ ខែតុលា ឆ្នាំ២០២០។
មន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួន ៩នាក់ ដែលបង្គាប់ឲ្យចូលខ្លួនមានដូចជាៈ ១. លោកសម រង្ស៊ី ២. លោកអេង ឆៃអ៊ាង ៣. លោកស្រី មូរ សុខហួរ ៤. លោកអ៊ូ ច័ន្ទឫទ្ធិ ៥. លោកហូរ វ៉ាន់ ៦. លោកឡុង រី ៧. លោកម៉ែន សុថាវរិន្ទ្រ ៨. លោកស្រី ជូឡុង សូមូរ៉ា និង៩. លោកនុត រំដួល។
យោងតាមមាត្រា ៤៥១ ៖ បទឧបឃាត គឺជាការប្រព្រឹត្តអំពើហិង្សាមួយ ឬច្រើន ក្នុងគោលបំណងបង្កឲ្យមានគ្រោះថ្នាក់ដល់ស្ថាប័ន នៃព្រះរាជាណាចក្រកម្ពុជា ឬនាំឲ្យមានការប៉ះពាល់ដល់បូរណភាពនៃដែនដីជាតិ។ បទឧបឃាត ត្រូវផ្តន្ទាទោសដាក់ពន្ធនាគារពី ១៥ឆ្នាំ ទៅ ៣០ឆ្នាំ។
គួរបញ្ជាក់ថា កាលពីថ្ងៃទី៣ ខែតុលា ឆ្នាំ២០១៩ តុលាការបានចេញដីកាឲ្យចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំង ៨រូប។ ដីកាចាប់ខ្លួននេះ ធ្វើឡើងក្រោមបទចោទ «ឧបឃាត» ឬ «ការប៉ុនប៉ងធ្វើរដ្ឋប្រហារ» តាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី នៅថ្ងៃទី០៩ ខែវិច្ឆិកា ឆ្នាំ២០១៩។ មនុស្សទាំង៩នាក់នេះ ត្រូវបានអយ្យការអមសាលាដំបូងរាជធានីភ្នំពេញចោទប្រកាន់នៅក្នុងសំណុំរឿងព្រហ្មទណ្ឌលេខ ៦៥៣៦ ចុះថ្ងៃទី១៩ ខែកញ្ញា ឆ្នាំ២០១៩ ពីបទ «ឧបឃាត» តាមមាត្រា ២៧ និងមាត្រា ៤៥១ នៃក្រមព្រហ្មទណ្ឌកម្ពុជា។
ជាបទចោទពាក់ព័ន្ធនឹងអង្គហេតុនៃ «ការប៉ុនប៉ងធ្វើរដ្ឋប្រហារ» ផ្តួលរំលំរដ្ឋាភិបាលកម្ពុជា ក្រោមឧបាយកលជា «ផែនការនៃការវិលត្រលប់មកកម្ពុជាវិញរបស់លោក សម រង្ស៊ី» ដោយមានការអំពាវនាវ និងប្រើថវិកាប៉ុនប៉ងបង្កើតកងកម្លាំងឧទ្ទាមប្រដាប់អាវុធខុសច្បាប់ ដើម្បីចូលរួមអនុវត្តផែនការនេះ៕ រក្សាសិទ្ធិដោយៈ ចេស្តារ