ភ្នំពេញ: ប្រធានសម្ព័ន្ធសហជីពជាតិ លោកហ្វា សាលី ត្រូវបានតុលាការខេត្តកំពង់ឆ្នាំងចេញដីកាបង្គាប់ឲ្យចូលឆ្លើយបំភ្លឺនៅថ្ងៃទី៣ ខែកុម្ភៈ ឆ្នាំ២០២១ អំពីដំណើររឿង “បរិហាកេរ្តិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍” ប្រព្រឹត្តនៅចំណុចភូមិទួលងោក ឃុំកំពង់ល្លួង ស្រុកពញាឮ ខេត្តកណ្តាល កាលពីថ្ងៃទី២២ ខែធ្នូ ឆ្ននាំ២០២០។ នេះបើយោងតាមដីកាកោះដែលចេញដោយលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង កាលពីថ្ងៃទី១៤ ខែមករា ឆ្នាំ២០២១។ ដីកានេះត្រូវបានសមត្ថកិច្ច ទើបតែយកទៅប្រគល់ឲ្យលោកហ្វា សាលី នៅថ្ងៃទី៣០ ខែមករា ឆ្នាំ២០២១។
បន្ទាប់ពីទទួលបានដីកាកោះ លោកហ្វា សាលី បានសរសេរសារនៅក្នុងហ្វេសប៊ុកនៅថ្ងៃទី៣០ ខែមករា នេះថា “កាដូឆ្នាំថ្មី របស់ថៅកែរោងចក្រកាបូប ខាយ ណេង ដែលបានប្តឹងខ្ញុំផ្តល់តែម្តងមកតុលាការ ដោយសារតែការបង្ហោះខ្លឹមសារ និងរូបភាពទាំងនេះ ។ សូមជួយពិនិត្យមើលផង ថាតើខ្លឹមសារទាំងនេះជាការញុះញង់ឲ្យប្រព្រឹត្តបទឧក្រិដ្ឋដែរទេ? ដូចនេះយើងខ្ញុំក៏សូមអំពាវនាវដល់ សាលាដំបូងខេត្តកំពង់ឆ្នាំងមេត្តាពិនិត្យនឹងផ្តល់ភាពស្អាតស្អំ និងយុត្តិធម៌ដល់យើងខ្ញុំ និងស្ថាប័នយើងខ្ញុំផង។ ថៅកែខូចសូមកុំកាន់ជើងឲ្យសោះ”។
លោកហ្វា សាលី បានបញ្ជាក់ថា លោកនឹងចូលខ្លួនទៅឆ្លើយបំភ្លឺ តាមការកោះហៅរបស់តុលាការខេត្តកំពង់ឆ្នាំងនៅថ្ងៃទី៣ ខែកុម្ភៈ ឆ្នាំ២០២១៕ រក្សាសិទ្ធិដោយៈ ចេស្តារ