ភ្នំពេញ៖ រាជរដ្ឋាភិបាល គ្រោងនឹងសាកល្បង បោះមូលបត្របំណុល ដើម្បីប្រមូលមូលនិធិពីទីផ្សារក្នុងស្រុក ជាជាង ខ្ចីបំណុលពីទីផ្សារក្រៅប្រទេស។ ឯកឧត្តមវង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ឆាប់ៗខាងមុខនេះ ពោលគឺនៅក្នុងអាណត្តិនេះផ្ទាល់តែម្តង រាជរដ្ឋាភិបាល ពិចារណាក្នុងការបោះបណ្ណបំណុលរបស់រដ្ឋលក់នៅក្នុងស្រុក ឯកឧត្តម វង្សី វិស្សុត ពន្យល់ថា ជាគោលដៅ ដើម្បីប្រមូលមូលនិធិថវិកាទាំងនោះទៅធ្វើការវិនិយោគក្នុងវិស័យរដ្ឋសម្រាប់រយៈពេលវែង ហើយវាក៏ជាផ្នែកមួយជួយដោះស្រាយពេលរដ្ឋាភិបាលជួបប្រទះបញ្ហា ខ្វះសាច់ប្រាក់ អំឡុងពេលមានវិបត្តិសេដ្ឋកិច្ចកើតឡើងផងដែរ។
ឯកឧត្តម បានគូសបញ្ជាក់បន្ថែមទៀតថា មូលហេតុ ដែលរដ្ឋមិនធ្វើការបោះបណ្ណបំណុលភ្លាមៗ ដោយសារតែកម្ពុជានៅមានលទ្ធភាពអាចខ្ចី ពីក្រៅប្រទេសបាន ជាមួយនឹងអត្រាការប្រាក់ទាប បើធៀបនឹងកម្ចីក្នុងស្រុកដែលមានការប្រាក់ខ្ពស់ ខណៈការរៀបចំទីផ្សារនៅមិនទាន់ដើរទៅរលូននៅឡើយ។
មូលបត្ររដ្ឋគឺជាឧបករណ៍ហិរញ្ញវត្ថុសំខាន់មួយសម្រាប់បម្រើឲ្យរាជរដ្ឋាភិបាលក្នុងការកៀរគរហិរញ្ញប្បទានទាំងក្នុងស្រុក និងក្រៅស្រុកពីវិស័យឯកជនសម្រាប់ការអភិវឌ្ឍសេដ្ឋកិច្ច និងសង្គម»។ ឯកឧត្តម ស៊ូ សុជាតិ អគ្គនាយកគណៈកម្មការមូលបត្រកម្ពុជា បានឲ្យដឹង មូលបត្រនេះនឹងអាចឲ្យរដ្ឋាភិបាលបោះផ្សាយដើម្បីកៀរគរហិរញ្ញប្បទានពីសាធារណជន ជាពិសេសពីវិស័យឯកជនសម្រាប់ការអភិវឌ្ឍប្រទេសជាតិ។
បើតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា គិតត្រឹមបំណាច់ឆ្នាំ២០២០កន្លងទៅថ្មីៗនេះ សន្និធិបំណុលសាធារណៈក្រៅប្រទេសរបស់កម្ពុជា មានចំនួនជាង ៨ពាន់ ៨រយលានដុល្លារអាមេរិក ដែលក្នុងនោះភាគច្រើនខ្ចីពី ប្រទេសចិន ជប៉ុន កូរ៉េ និងបំណុលទ្វេភាគីផ្សេងៗទៀត។ ចំណែកឯបំណុលសាធារណៈក្នុងប្រទេសវិញ ត្រូវបានរាជរដ្ឋាភិបាល ទូទាត់បញ្ចប់កាលពីដើមខែកុម្ភៈ ឆ្នាំ២០២០រួចអស់ហើយ៕
រក្សាសិទ្ធិដោយ៖CEN
