ភ្នំពេញ ៖ ការនាំចេញអង្កររបស់កម្ពុជា ក្នុងខែមករាឆ្នាំ២០២១ ទៅកាន់ទិសដៅចំនួន២៨ប្រទេស សម្រេចបានជារួម ៣៤ ២៧៣ តោន គិតជាទំហំទឹកប្រាក់ចំនួន ៣០,៧៦លានដុល្លារអាមេរិក ដែលមានការថយចុះជារួម ជាង៣២ភាគរយ។
ការធ្លាក់ចុះនេះបណ្តាលមកពីការនាំចេញអង្ករទៅទីផ្សារអឺរ៉ុប បានថយចុះ ជិត ៦០ភាគរយ ខណៈដែលទីផ្សារប្រទេសចិន នៅតែបន្តមានភាពវិជ្ជមាន ពោលគឺកើនឡើងជិត ៨ភាគរយ បើប្រៀបធៀបនឹងខែមករា កាលពីឆ្នាំមុន។
ការធ្លាក់ចុះនៃការនាំចេញអង្ករ ក្នុងខែមករានេះ ជាពិសេសទៅកាន់ប្រទេសសមាជិកសភាពអឺរ៉ុប ដែលមានការធ្លាក់ចុះដល់ទៅជិត ៦០ភាគរយ គឺបណ្តាលមកពីមូលហេតុចម្បងគឺបញ្ហាដឹកជញ្ជូនតាមកប៉ាល់ ដោយកង្វះទូកុងទឺន័រសម្រាប់អង្ករ ដែលជាទំនិញធ្ងន់ មិនមានកន្លែងផ្ទុកគ្រប់គ្រាន់ របស់កប៉ាល់ ការដឹកជញ្ជូនពីកំពង់ផែក្រុងព្រះសីហនុ ទៅប្តូរនៅកប៉ាល់មេទៅអឺរ៉ុប និងតម្លៃទៀតសោត បានឡើងខ្ពស់ ដល់ទៅ ៥ដង នៃតម្លៃឆ្នាំមុន។
ចំពោះទីផ្សារចិនបានកាន់កាប់ចំណែក ៤៧ ភាគរយនៃការនាំចេញសរុដែលគិតជាចំនួនគឺមានចំនួន ១៦ ១៦៣តោន និងមានការកើនឡើង ៧,៧ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ចំពោះប្រភេទអង្ករនាំចេញក្នុងខែមករាឆ្នាំ២០២១ ឃើញថា ចំនួន ៨៧,៦ភាគរយ គឺអង្ករក្រអូប ដែលរួមមានទាំង ក្រអូបប្រណីត សែនក្រអូប អង្ករសរីរាង្គផ្ការម្លិះជាដើម៕
រក្សាសិទ្ធិដោយ៖CEN
