ភ្នំពេញ ៖ខណៈដែលវ៉ាក់សាំងជាជំនួយរបស់ចិត្តនឹងត្រូវមកដល់កម្ពុជានៅចុងសប្តាហ៍នេះ រាជរដ្ឋាភិបាលកម្ពុជា នៅថ្ងៃទី០៣ ខែកុម្ភៈ ឆ្នាំ២០២១នេះ បានសម្រេចបង្កើតក្រុមការងារអន្តរក្រសួងគ្រប់គ្រង ការអនុវត្តយុទ្ធសាស្ត្រ និងកិច្ចប្រតិបត្តិការចាក់វ៉ាក់សាំងកូវីដ១៩
ក្រុមការងារអន្តរក្រសួងគ្រប់គ្រងការអនុវត្តយុទ្ធសាស្ត្រ និងកិច្ចប្រតិបត្តិការ ចាក់វ៉ាក់សាំងកូវីដ-១៩នេះមានលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ជាប្រធាន, លោកស្រី យក់ សម្បត្តិ និងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និង លោក ម៉ៅ ប៊ុនណារិន រដ្ឋលេខាធិការក្រសួងមហាផ្ទៃ ជាអនុប្រធាន និង មានមន្ត្រីមកពីក្រសួងពាក់ព័ន្ធចំនួន ១២រូប ជាសមាជិក និងជាលេខាធិការ។
ក្រុមការងារអន្តរក្រសួងនេះមានតួនាទីដូចខាងក្រោម៖
– អនុវត្តការងារជាជំហានៗ តាមផែនការលទ្ធកម្ម ដែលបានសម្រេចដោយក្រុមការងារអន្តរក្រសួងទទួលបន្ទុកការចរចា និងការពិគ្រោះយោបល់ទិញវ៉ាក់សាំងកូវីដ១៩ ដឹកនាំដោយក្រសួងសេដ្ឋកិច្ច និងហិរញ្ញវត្ថុ
– ត្រួតពិនិត្យលក្ខខណៈបច្ចេកទេសរបស់វ៉ាក់សាំងកូវីដ១៩ នៅពេលមកដល់ឃ្លាំងឱសថកណ្តាល ការថែរក្សាទុក ការបែងចែក និងការដឹកជញ្ជូន
– សម្របសម្រួលជាមួយវិស័យឯកជនក្នុងការថែរក្សា និងដឹកជញ្ជូនវ៉ាក់សាំងកូវីដ១៩
– អនុវត្តពិធីសារស្តីពីយុទ្ធនាការចាក់វ៉ាក់សាំងកូវីដ១៩ ផែនការជាតិស្តីពីយុទ្ធនាការចាក់វ៉ាក់សាំងកូវីដ១៩ និងគោលការណ៍ណែនាំប្រតិបត្តិសម្រាប់យុទ្ធនាការផ្តល់ថ្នាំបង្ការកូវីដ១៩
– សម្របសម្រួលការគ្រប់គ្រង តាមដាន អនុវត្តយុទ្ធនាការនៃការចាក់វ៉ាក់សាំងកូវីដ១៩
– គ្រប់គ្រង និងតាមដានលទ្ធផលនៃយុទ្ធនាការចាក់វ៉ាក់សាំងកូវីដ១៩
– សម្របសម្រួលការងារអប់រំ ផ្សព្វផ្សាយ និងលើកកម្ពស់ការយល់ដឹងនៃការចាក់វ៉ាក់សាំងកូវីដ១៩
– រៀបចំចាត់ចែងការចាក់វ៉ាក់សាំងកូវីដ១៩ ដោយបុគ្គលិកសុខាភិបាល ទៅតាមលំដាប់ក្រុមគោលដៅ និងទីកន្លែងដែលបានកំណត់តាមពិធីសារស្តីពីយុទ្ធនាការចាក់វ៉ាក់សាំងកូវីដ១៩
– ធ្វើការចុះឈ្មោះតាមប្រព័ន្ធអេឡិចត្រូនិក និងអនុវត្តប្រព័ន្ធវ៉ាក់សាំងឆ្លាត
– គ្រប់គ្រង និងដោះស្រាយបញ្ហានានា ពាក់ព័ន្ធនឹងការចាក់វ៉ាក់សាំង ដូចជាផលប៉ះពាល់អវិជ្ជមានជាដើម
– ធ្វើរបាយការណ៍អំពីលទ្ធផលារងារ ព្រមទាំងគោរពសុំគោលការណ៍សម្រេចដ៏ខ្ពង់ខ្ពស់លើវិធានការចាំបាច់នានាពីសម្តេចតេជោ ហ៊ុន សែន ប្រធានគណៈកម្មការជាតិប្រយុទ្ធនឹងជំងឺកូវីដ១៩។
លោក វ៉ាង វិនធានឯកអគ្គរដ្ឋទូតចិនប្រចាំនៅកម្ពុជា បានឱ្យដឹងថា វ៉ាក់សាំងស៊ីណូហ្វាម ដែលជាជំនួយរបស់រដ្ឋាភិបាលចិន ប្រមាណ ៦០ម៉ឺនដូស ក្នុងចំណោម១លានដូស នឹងមកដល់ប្រទេសកម្ពុជានៅចុងសប្តាហ៍នេះ៕ រក្សាសិទ្ធិដោយ៖បញ្ញាស័ក្តិ
