ភ្នំពេញ៖ ក្នុងរយៈពេលប៉ុន្មានទស្សវត្ស កន្លងមកនេះ ការវិនិយោគរបស់ក្រុមហ៊ុនជប៉ុននៅកម្ពុជា មានកំណើនគួរឲ្យកក់សម្គាល់ ។ ជប៉ុន ជាប្រទេស និងជាដៃគូវិនិយោគមួយយ៉ាងសំខាន់ក្នុងចំណោមដៃគូវិនិយោគធំៗ នៅប្រទេសកម្ពុជា។
ប្រទេសជប៉ុន បានដើរតួរយ៉ាងសំខាន់ ក្នុងការលើកស្ទួយសន្តិភាព និងការអភិវឌ្ឍសេដ្ឋកិច្ចក្នុងប្រទេសកម្ពុជា។ប្រទេសកម្ពុជា និង ជប៉ុន ជាដៃគូរយូរអង្វែង ដែលមានទំនាក់ទំនងកាទូតជាមួយគ្នាចាប់តាំងពីឆ្នាំ ១៩៥៣ មកម្ល៉េះ។ ទំនាក់ទំនងទ្វេភាគី ក៏បានអភិវឌ្ឍន៍ទៅជា ដៃគូយុទ្ធសាស្ត្រ តាំងពីខែ ធ្នូ ឆ្នាំ ២០១៣។
បើតាមប្រធានសភាពាណិជ្ជកម្មកម្ពុជា ហើយជាស្ថាប័នឯកជនដែលមានទំនាក់ទំនងយ៉ាងជិតស្និតជាមួយអ្នកវិនិយោគ និងពាណិជ្ជករទាំងនៅក្នុងស្រុក និងក្រៅស្រុក បានឱ្យដឹងថា មានក្រុមហ៊ុនជប៉ុន ជាង ១៥០០ ក្រុមហ៊ុន បានចុះបញ្ជីនៅក្នុងប្រទេសកម្ពុជា ក្នុងនោះក្រុមហ៊ុនធំ រួមមាន Minebea, AEON, Nippon Express, Denso, J Trust Bank, និង Somitomo។បន្ថែមពីលើសនេះទៅទៀត មានភោជនីយដ្ឋានជប៉ុនប្រមាណ ៣០០ កំពុងបើកដំណើរការនៅក្នុង ប្រទេសកម្ពុជា។
សូមជម្រាបថា បើតាមសភាពាណិជ្ជកម្មកម្ពុជា ក្នុងឆ្នាំ ២០១៩កន្លងទៅ ពាណិជ្ជកម្មទ្វេភាគី មានប្រមាណ ២.២៩ ប៊ីលានដុល្លារ និងក្នុងឆ្នាំ ២០២០ គិតត្រឹមរយៈពេលដប់ខែ ទំហំពាណិជ្ជកម្មសរុប មានទៅដល់ ១.៧៤ ប៊ីលានដុល្លារ។ ជាមួយគ្នានេះ កម្ពុជា នឹងបន្តទាក់ទាញ និងបង្ហាញពីសក្តានុពល ដល់អ្នកវិនិយោគជប៉ុន នៅក្នុងវិស័យជាច្រើនដូចជា ការកែច្នៃអាហារ អេកូរ-ទេសចរណ៍ ផលិតកម្ម និងការអភិវឌ្ឍធនធានមនុស្សជាដើម៕
រក្សាសិទ្ធិដោយ៖CEN