ភ្នំពេញ ៖ រថយន្តRAV4 ពន្លះគូទរថយន្តដឹកដីពីក្រោយយ៉ាងពេញទំហឹង បណ្ដាលឲ្យខ្ទេចរថយន្តមួយកំណាត់មុខ យ៉ាងដំណំលើស្ពានលីយ៉ុងផាត់ ទៅមុខលែងរួច បង្កការកកស្ទះយ៉ាងខ្លាំង ផ្អើលដល់ប្រជាការពារមកជួយសម្រួលចរាចរណ៍។
ហេតុការណ៍នេះបានកើតឡើងនៅវេលាម៉ោង២និង០០នាទីសៀលថ្ងៃទី០៧ខែកុម្ភៈឆ្នាំ២០២១ ស្ថិតនៅលើស្ពានលីយ៉ុងផាត់ខាងកើត ក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។
យោងតាមប្រភពពីអ្នកបើកបរបានប្រាប់ភ្នាក់ងារCENយើងឲ្យដឹងថា ពួកគាត់ទាំងពីរធ្វើដំណើរស្របទិសគ្នាពីកើតទៅលិច ដោយរថយន្តដឹកដីធុនធំពណ៌ខៀវ ពាក់ផ្លាកលេខកំពងចាម 3A-0244 ពីមុខ និងមានគ្នា២នាក់ប្រពន្ធ នៅក្នុងរថយន្តដោយដឹកដីពីរណ្ដៅដី (តាកៅ) ទៅចាក់នៅជិតវិមានឈ្នះឈ្នះ ចាក់ដីរួចត្រឡប់មកវិញដល់ចំណុចកើតហេតុ បានអកហ្សើជាមួយរថយន្តមួយគ្រឿងទៀត ក៏ជាន់ហ្វ្រាំងភ្ញុចជាប់ បណ្ដាលឲ្យរថយន្តRAV4 ពណ៌ឈាមជ្រូកពាក់ផ្លាកលេខភ្នំពេញ 2C-4142 ដែលធ្វើដំណើរ២នាក់ឪពុកនិងកូន ពីផ្ទះស្ពានលេខ២ ខណ្ឌជ្រោយចង្វា គោលបំណងទៅមើលតាឈឺនៅម្ដំសាលាកូរ៉េ ឡើងស្ពានបន្តិច បានជ្រុលបុកចំកាងដែករថយន្តធុងធំដឹកដីពីក្រោយយ៉ាងពេញទំហឹង បណ្ដាលឲ្យរថយន្តRAV4 រងការខូចខាតមួយកំណាត់មុខយ៉ាងដំណំ ក្នុងហេតុការណ៍នេះ មិនបណ្ដាលឲ្យរងរបួសនរណាម្នាក់ឡើយ។
ក្រោយពេលកើតហេតុភាគីទាំងពីរ បានធ្វើការចរចាគ្នាសម្របសម្រួលគ្នា ដោយខាងរថយន្តRAV4 សុំទៅខាងរថយន្តដឹកដី ជួយចេញថ្លៃដឹកដល់ការ៉ាស់ជុសជុល តែភាគីរថយន្តដឹកដីជួយចេញ 50$ ទើបយល់ព្រមទទួលយកបញ្ចប់រឿង ដោយមិនរំខានដល់កម្លាំងសមត្ថកិច្ចឡើយ៕ រក្សាសិទ្ធិដោយ៖ សារឿន
