ភ្នំពេញ ៖ ជនសង្ស័យដែលជំនាញគាស់ផ្ទះរបស់ប្រជាពលរដ្ឋយ៉ាងសកម្មម្នាក់ នៅក្នុងរាជធានីភ្នំពេញ ត្រូវបានកម្លាំងជំនាញខណ្ឌដង្កោសហការ ជាមួយកម្លាំងនគរបាលរដ្ឋបាលប៉ុស្តិ៍ដង្កោ ធ្វើការឃាត់ខ្លួន ខណៈពេលកំពុងធ្វើសកម្មភាពលួចគាស់ផ្ទះរបស់ជាពលរដ្ឋមួយកន្លែង នៅក្នុងបុរីលឹម ឈាងហាក់ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង ៤និង៣០នាទីទៀបភ្លឺព្រឹកថ្ងៃទី៨ ខែកុម្ភៈ ឆ្នាំ២០២១។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនខាងលើមានឈ្មោះ ម៉ៅ ទិត្យ ភេទប្រុស ឣាយុ ២៤ឆ្នាំ មុខរបរមិនពិតប្រាកដ ស្នាក់នៅបន្ទប់ ភូមិម័ល សង្កាត់ដង្កោខណ្ឌដង្កោ រាជធានីភ្នំពេញ។
លោកវរសេនីយ៍ទោ ជាង ហុកសែ ឣធិការរងទទួលផ្នែកនគរបាលយុត្តិធម៌ បានឲ្យដឹងថា មុនពេលឃាត់ខ្លួនជនសង្ស័យខាងលើ កម្លាំងជំនាញនិងកម្លាំងប៉ុស្តិ៍នគរបាលសង្កាត់ដង្កោ បានធ្វើការល្បាតពួនស្ទាក់ការពារសុវត្ថិភាព ជូនប្រជាពលរដ្ឋក្នុងមូលដ្ឋាន ក៏បានប្រទះឃើញជនសង្ស័យ កំពុងធ្វើសកម្មភាពដើរចូលទៅក្នុងផ្ទះល្វែង រួចធ្វើសកម្មភាពគាស់ទ្វារបម្រុងចូលលួចទ្រព្យសម្បត្តិ ភ្លាមៗនោះកម្លាំងសមត្ថកិច្ចមានក៏សង្ស័យបានធ្វើការឆែកឆេរ រកឃើញគ្រឿងញៀន១កញ្ចប់ និងសោមួយឈុត រួចក៏បានធ្វើការឃាត់ខ្លួនជនសង្ស័យយកមកកាន់ប៉ុស្តិ៍នគរបាលរដ្ឋបាលសង្កាត់ដង្កោ ដើម្បីធ្វើការសាកសួបន្ត ។
នៅចំពោះមុខសមត្ថកិច្ច ជនសង្ស័យបានសារភាពទាំងទឹកមុខញញឹមញញ៉េមថា រូបគេធ្លាប់ធ្វើសកម្មភាពលួចគាស់ទ្វារយកទ្រព្យសម្បត្តិប្រជាពលរដ្ឋ បានសម្រេចជាច្រើនដងមកហើយ ហើយគ្រឿងញៀន១កញ្ចប់នេះ គឺរូបគេទិញចំនួន១០ដុល្លារទុកសម្រាប់ជក់កុំឲ្យងងុយដេក។
បច្ចុប្បន្នជនសង្ស័យខាងលើ ត្រូវបានឃុំខ្លួនបណ្តោះឣាសន្ន នៅឣធិការដ្ឋានខណ្ឌដង្កោ និងកសាងសំណុំរឿងបញ្ជូនទៅកាន់តុលាការ ចាត់ការបន្តតាមនីតិវិធី៕ រក្សាសិទ្ធិដោយ៖សួង សាម
