នាយករដ្ឋមន្ត្រីសិង្ហបុរី លី សៀនឡុង និយាយថា លោកបានត្រៀមខ្លួនជាស្រេចក្នុងការលាលែងពីមុខតំណែង1-2 ឆ្នាំទៀត ហើយនឹងជ្រើសរើសអ្នកបន្តវេនចេញពីគណៈរដ្ឋមន្ត្រីរបស់ខ្លួន។
នាយរដ្ឋមន្ត្រីសិង្ហបុរីលី សៀនឡុង
“ខ្ញុំបានត្រៀមខ្លួនជាស្រេច” នេះជាចម្លើយរបស់នាយករដ្ឋមន្ត្រីសិង្ហបុរី លី សៀនឡុង ក្នុងកិច្ចសម្ភាសន៍ជាមួយ CNBC កាលពីម្សិលមិញ ខណៈពេលគេបានសួរលោកថា តើមានបានត្រៀមខ្លួនលាលែងពីតំណែងក្នុងរង្វង់ 1-2 ឆ្នាំទៀតដែរឬទេ។
នាយករដ្ឋមន្ត្រី លី ត្រូវការចាំបាច់អ្នកបន្តវេនលោកដើម្បីដឹកនាំប្រទេស។ ការបោះឆ្នោតអាចត្រូវបានរៀបចំ នៅអំឡុងមុនឆ្នាំ 2021 ក្នុងអំឡុងពេលដែលរដ្ឋសភាសិង្ហបុរីបញ្ចប់អាណត្តិ៥ឆ្នាំរបស់ខ្លួន ។
សំណួរចោទសួរថា តើអ្នកបន្តវេនជានរណា? លោកលី គ្រាន់តែឲ្យដឹងបន្ថែម “មនុស្សនោះអាចស្ថិតក្នុងគណៈរដ្ឋមន្ត្រី ប៉ុន្តែវាត្រូវការពេលវេលា ដើម្បីកំណត់ថា នោះគឺជាអ្នកណា”។ បើតាមប្រព័ន្ធឃោសនា និងអ្នកវិភាគនៅប្រទេសសិង្ហបុរី អ្នកបន្តវេនលោក លី អាចជារដ្ឋមន្ត្រីហិរញ្ញវត្ថុ Heng Swee Keat ឬរដ្ឋមន្ត្រីខុទ្ទកាល័យនាយករដ្ឋមន្ត្រី Chan Chun Sing។ រីឯឧបនាយករដ្ឋមន្ត្រី Tharman Shanmugaratnam ថ្វីត្បិតតែជាបេក្ខភាពម្នាក់ដែរ ប៉ុន្តែលោកធា្លប់ប្រកាសថា លោកពុំចង់រ៉ាប់រងមុខតំណែងនាយករដ្ឋមន្ត្រី។
បញ្ហាអ្នកបន្តវេននាយករដ្ឋមន្ត្រីលី សៀនឡុង ចាប់ផ្តើមកើតឡើងបន្ទាប់ពីលោកដួលសន្លប់គ្រាដែលលោកថ្លែងសុន្ទរកថា នៅក្នុងស្ថានីយ៍ទូរទស្សន៍កាលពីខែសីហា ឆ្នាំ ២០១៦។ សេចក្តីថ្លែងការណ៍របស់នាយករដ្ឋមន្ត្រីសិង្ហបុរីពេលនោះបញ្ជាក់ថា លោកលី គ្រាន់តែទ្រេតទ្រោតព្រោះឈរយូរពេក ក្តៅហើយបាត់បង់ជាតិទឹក ប៉ុន្តែសភាពបេះដូងនៅស្ថិរភាព ហើយលោកពុំបានស្ត្រូបឡើយ។
គួររំលឹកថា នៅឆ្នាំ២០១៥ នាយករដ្ឋមន្ត្រីសិង្ហបុរីរូបនេះបានធ្វើការវះកាត់ជំងឺមហារីកក្រពេញប្រូស្តាត។ កាលពីឆ្នាំ១៩៩២ លោកលី ត្រូវបានវេជ្ជបណ្ឌិតវិនិច្ឆ័យថា មានជំងឺមហារីកគ្រាប់ឈាម ប៉ុន្តែគេបានធ្វើការព្យាបាលដោយជោគជ័យ។
ឃ្លីប៖ នាយករដ្ឋមន្ត្រីសិង្ហបុរីដួលសន្លប់នៅស្ថានីយ៍ទូរទស្សន៍កាលពីខែសីហា ឆ្នាំ២០១៦
